აჭარული ხაჭაპური და კიდევ 40 ქართული კერძი მსოფლიო კერძების ატლასზე

სულ ახლახან მსოფლიოს კერძების ატლასი გამოქვეყნდა – www.tasteatlas.com, რომელზეც საქართველო 41 კერძითაა წარმოდგენილი.

კერძების ატლასის მიზანია “ადგილობრივი” სამზარეულოს პოპულარიზაცია ტურისტებსა და გურმანებში, ასევე მათი ინფორმირება,სხვადასხვა ქვეყნის ტრადიციული კერძებისა და ინგრედიენტების შესახებ. “ჩვენი მისიაა მოვნიშნოთ მსოფლიოს კერძები და ინგრედიენტები, რომ გადავარჩინოთ ჩვენი ბებიების ტრადიციული რეცეპტები დავიწყებას და წავახალისოთ მოგზაურები, გაეცნონ სხვადასხვა კულტურას, ავთენტურ ადგილობრივ კერძებს”, – წერენ tasteatlas-ის შემქმნელები.

ატლასი შეიცავს 10 000-ზე მეტ კერძს, სასმელს, ინგრედიენტსა და საკვებ პროდუქტს, მათ შორის 41 დასახელების საკვებსა და ინგრედიენტს საქართველოდან. აჭარიდან რუკაზე, ჯერჯერობით, მხოლოდ აჭარული ხაჭაპურია, სხვა კუთხეებიდან კი – ფელამუში, ლობიო, საცივი, ბაჟე და სხვა კერძები.

TasteAtlas-ის შემქმნელები წერენ, რომ ეს არ არის დასრულებული პროექტი და რომ ატლასზე კერძები ყოველ დღე ემატება. პროექტი საინტერესოა რესტორნების მფლობელებისთვისაც, რადგანაც ატლასზე რესტორნების შესახებაც ნახავთ რეკომენდაციებს.

Mashable.com-ი წერს, რომ ხორვატიულ პროექტზე სამი წლის განმავლობაში  ავტორებისა და მკვლევარების 30-კაციანი გუნდი მუშაობდა.

 

ნეტგაზეთის მასალების სხვა გამოცემებში გადაბეჭდვის წესი


ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან