ქედელი მოჭიდავე მსოფლიო ჩემპიონატის პრიზიორია

21 წლის მარად გორგაძე აბა ჭიდაობაში მსოფლიო ჩემპიონატის პრიზიორია. 2018 წლის სექტემბერში, თურქეთის რესპუბლიკაში გამართულ მე-9 მსოფლიო ჩემპიონატზე, ქედელი მოჭიდავე, საქართველოს სახელით წარსდგა და 60 კგ წონით კატეგორიაში მესამე ადგილი მოიპოვა. ჩემპიონატში მსოფლიოს 40 ქვეყანა მონაწილეობდა.

მსოფლიო პრიზიორი მწვრთნელებთან და სასპორტო სკოლის დირექციასთან ერთად, დღეს მუნიციპალიტეტის პირველმა პირებმა მიიღეს. შეხვედრაზე მადლობა გადაუხადეს შრომისთვის, ქართველი ქომაგების გახარებისა და ქვეყნის სახელით მოპოვებული წარმატებებისათვის.

მარად გორგაძე 7 წლის ასაკიდან ქედის სასპორტო სკოლის ჭიდაობის სექციის სპორტსმენია, ამჟამად კი აჭარის ნაკრების წევრია. არის თავისუფალ ჭიდაობაში საქართველოს პრიზიორი, აჭარის მრავალგზის ჩემპიონი და არაერთი საერთაშორისო ტურნირის მონაწილე.

როგორც შეხვედრის დასასრულს აღინიშნა, ქედის მერია წარმატებულ სპორტსმენსა და მწვრთნელებს ჰონორარს ჩაურიცხავს.

ნეტგაზეთის მასალების სხვა გამოცემებში გადაბეჭდვის წესი


ავტორი