“შენ ქურდებს არ სცემდი პატივს… გოგოები გეზრდება…“ – კადრები ქურდული სამყაროს საქმეში

“შენ არც ქურდებს სცემდი პატივს, არც “ობშიაკი” იცოდი… 3 ათასს მოიტან იცოდე… გოგოები გეზრდება… ნუ ტირიხარ, თავს ნუ გვაცოდებ,”- ეს ფრაზები ერთ-ერთი ვიდეო ჩანაწერშია, რომელიც დღეს პროკურატურამ წარმოადგინა “ქურდული სამყაროს საქმეზე” .

ამ კონკრეტული ჩანაწერის მიხედვით, სამმა პირმა ავტომანქანით ჭადრაკის სახლის მიმდებარე ტერიტორიაზე მიიყვანეს დაზარალებული კ.კ.

კადრში მხოლოდ დაზარალებული კაცის სახე ჩანს, რომელიც ავტომანქანის საჭესთან ზის და მას მანქანაში მყოფი სხვა პირები აგრესიულად მიმართავენ. დაზარალებულს ეუბნებიან, რომ ის ნარკორეალიზატორია და ფული უნდა გადაიხადოს “ობშიაკისთვის”. კ.კ.-ს აგინებენ, ფიზიკური განადგურებით ემუქრებიან და სახეში სცემენ.

პროკურატურამ დღეს, 17 ოქტომბერს სასამართლოში რამდენიმე ვიდეო და აუდიო მტკიცებულება წარმოადგინა. პირველივე ვიდეო ჩანაწერის ჩვენების შემდეგ ბრალდებულებმა: ბადრი ქობულაძემ, გიორგი შავლიძემ და რამაზ კომახიძემ სხდომათა დარბაზი დატოვეს.

ქურდული სამყაროს წევრობისა და ქუჩურ გარჩევებში მონაწილეობის ბრალდებით სამართალდამცველებმა 11 პირი 17 ივლისს ბათუმში დააკავეს. საქმის მასალების მიხედვით, ბრალდებულები ემუქრებოდნენ დაზარალებულებს, სცემდნენ და დიდი ოდენობით თანხას სძალავდნენ ქურდული „ობშიაკის“ შესავსებად. საქმის მასალებში არის კიდევ ერთი საინტერესო დეტალიც – კანონიერ ქურდობაში ბრალდებულები „დაზარალებულებს  ემუქრებოდნენ სახელის გამტეხი ცნობების გავრცელებით“.

პროკურატურის თქმით, ბრალდებულები ბათუმში, გონიოსა და ახალშენში იბარებდნენ დაზარალებულებს და აიძულებდნენ ქურდული „ობშიაკისთვის“ თანხის შეწირვას.

ვიდრე ვიდეო კადრების ჩვენებას დაიწყებდნენ სასამართლო დარბაზში, მხარეებმა დიდხანს იმსჯელეს, უნდა დახურულიყო თუ არა სხდომა.

“უდანაშაულობის პრეზუმფციის დაცვისთვის უნდა დაიხუროს სხდომა… ამ კადრებს ტელევიზიით არასრულწლოვნებიც ნახავენ. თქვენ თუ თანახმა ხართ, ბატონო პროკურორო ამაზე, რომ ნახოს ხალხმა და აღშფოთდეს, მაშინ მეც თანახმა ვიქნები”, – აღნიშნა ადვოკატმა ია გაბედავამ.

“აქამდე ამბობდით, რომ არაფერია ამ კადრებში და რაზე უნდა აღშფოთდეს ხალხი?” – მიმართა ადვოკატს პროკურორმა ფრიდონ ქარცივაძემ.

პროკურორებს და ადვოკატებს შორის კამათი მოსამართლემ ასეთი გადაწყვეტილებით დაასრულა – გიორგი გრატიაშვილმა სხდომათა დარბაზიდან “აჭარის ტელევიზიის” ვიდეო აპარატურის გატანა მოითხოვა. მოსამართლემ “ბათუმელებსაც” მოგვიწოდა, ფოტო არ გადაგვეღო კადრების ჩვენების დროს.

მოსამართლე გიორგი გრატიაშვილის გადაწყვეტილებით, სხდომა არ დაიხურა, თუმცა კადრების ჩვენებამდე შესვენება გამოცხადდა და ბრალდებულის ყველა ახლობელმა სხდომათა დარბაზი დატოვა. დარბაზის დატოვებამდე მათ აგრესია ჟურნალისტების მიმართ გამოხატეს ფრაზებით: “ვინ დაგავალათ აქ მოსვლა”, “რატომ მოდით?”

მტკიცებულებების გამოკვლევის ეტაპზე ერთი ვიდეო და რამდენიმე აუდიო ჩანაწერი გამოიკვლიეს.

პროკურორების თქმით, ვიდეო, რომელშიც კ.კ.-ს სახეში სცემენ, ერთ-ერთმა ბრალდებულმა, ბადრი ქობულაძემ საკუთარი მობილური ტელეფონით გადაიღო. გამოძიებამ მობილურიდან ჩანაწერები ბრალდებულის დაკავებამდე ამოიღო – პროკურორ რამაზ შავაძის განმარტებით, მოსამართლის განჩინების საფუძველზე ბადრი შავლიძის ტელეფონში შეღწევა და იქ ჩანაწერების დათვალიერება ფიზიკური შეხების გარეშე, სოციალური კომპიუტერული პროგრამის საშუალებით მოხერხდა.

“ეს ხმის ჩანაწერი ლავასოღლის ეკუთვნის და იგი საერთოდ ზედმეტია ამ საქმეში, სირცხვილია ამის აქ მოსმენა,”- მიმართა მოსამართლეს ადვოკატმა დავით ჯაფარიძემ ერთ-ერთი აუდიო ჩანაწერის მოსმენის შემდეგ. ჩანაწერში კონკრეტული პირი ამბობს, რომ ის ლავასოღლია და მას ვისაც ურეკავს, მასთან გამოცხადებას სთხოვს. პირი, ვისი ხმაც ჩანაწერში ისმის, იმუქრება და მოპასუხეს აგინებს. ასევე ამბობს, რომ იგი მეგობრის შეურაცხყოფის გამოა განაწყენებული.

“ჩამოეთრიე, ერთი, აქ შენ… მე ლავასოღლი ვარ. ვის მეგობარს შეაგინე შენ?” – ისმის ჩანაწერში.

“სირცხვილი თქვენსკენ მოიკითხეთ…ეს ჩანაწერიც ბადრი ქობულაძის ტელეფონიდან არის ამოღებული,” – აღნიშნა პროკურორმა ფრიდონ ქარცივაძემ.

“ვისია ეს ხმები, გაურკვეველია, რას ამტკიცებს ეს?” – რამდენჯერმე ახსენეს ადვოკატებმა, თუმცა პროკურორებმა მათ არაფერი განუმარტეს.

“ვალდებული არ ვარ კითხვებს პასუხი გავცეთ,” – თქვა პროკურორმა ფრიდონ ქარცივაძემ. მოსამართლემაც დასძინა, რომ ის პროკურორებს განმარტების გაკეთებას ვერ დაავალებდა.

პროკურორის თქმით, რა ჩანს ამ ჩანაწერებიდან კონკრეტულად საბოლოო ეტაპზე გამოჩნდება მკაფიოდ.

“ვერაფრით ვერ დადგინდება ამ საქმეზე ქურდული სამყაროს წევრობა. თუ ეს ქურდული დაჯგუფება იყო, ვინ იყო ლიდერი? მტკიცებულებები უნდა იყოს მკაფიო. მე აქამდე ლავასოღლის ინტერესებს ვიცავდი და მას ვერავინ დაუმტკიცა, რომ კანონიერი ქურდია,” – უთხრა მოსამართლეს ადვოკატმა ია გაბედავამ.

სასამართლო პროცესი ამ საქმეზე 29 ნოემბერს გაგრძელდება.

საქმეზე კ.კ.-მ ჩვენება ადვოკატებსაც მისცა. ეს ის პირია, რომელსაც ვიდეო ჩანაწერის მიხედვით, ფულის მიტანას სთხოვენ.

“ამბობს, რომ პოლიციელებმა სცემეს და აიძულეს ჩვენების მიცემა ბრალდებულების წინააღმდეგ. მისი თქმით, ავტომანქანაში ის პირები არ იყვნენ, ვისაც ბრალი აქვთ წაყენებული,” – გვითხრა ადვოკატმა ზაზა პაპიძემ.

საუბარში პროკურორი რამაზ შავაძე ჩაერთო: “ისიც გეცოდინებათ, რომ დაწყებულია გამოძიება მოწმეზე ზემოქმედების მუხლით”.

კ.კ.-ს ჩვენება მოსამართლეს ჯერ არ მოუსმენია.

 

 

 

 

 

 

ნეტგაზეთის მასალების სხვა გამოცემებში გადაბეჭდვის წესი


ავტორი