ქობულეთის სანაპირო ზოლში ზღვისპირა პარკის მოსაწყობად გამოცხადებულ ტენდერში შესყიდვის პროცედურები შეჩერდა. მიზეზი ისაა, რომ ქობულეთის მუნიციპალიტეტის სატენდერო კომისიას ტენდერში მონაწილე კომპანიამ დავების საბჭოში უჩივლა. შესაბამისად, კომისია ვალდებულია შეაჩეროს პროცედურები და იმის მიხედვით განაახლოს, რა გადაწყვეტილებასაც დავების საბჭო მიიღებს. პარკის მოსაწყობად სატენდერო თანხა 3 11 440 ლარია.
მუნიციპალიტეტს შპს „მონოლითი-2005“ ედავება, რომელმაც ტენდერში ყველაზე დაბალი ფასი 2 408 820 ლარი დააფიქსირა. სატენდერო კომისიამ კომპანიას ჯერ დოკუმენტაციის დაზუსტება მოსთხოვა, მოგვიანებით კი მას დისკვალიფიკაცია მისცა. სატენდერო კომისია ამტკიცებს, რომ კომპანიის მიერ წარმოდგენილი დაზუსტებული დოკუმენტაცია ტენდერის მოთხოვნებს მაინც არ პასუხობდა.
საწინააღმდეგოს ამტკიცებს თავის საჩივარში „მონოლითი-2005“.
„ჩვენს მიერ სრულად იქნა შესრულებული [კომისიის] საოქმო გადაწყვეტილებითა და სატენდერო დოკუმენტაციით განსაზღვრული მოთხოვნები კერძოდ: წარდგენილი იქნა შემსყიდველის წერილი და მოქმედი კანონმდებლობით გათვალისწინებული ყველა დოკუმენტაცია… ჩვენს მიერ გამოცდილების დამადასტურებელ დოკუმენტაციებთან დაკავშირებით რიგ შემთხვევაში კომისიას გამიზნულად არ უმსჯელია (უგულებელყვეს) და წარდგენილი დოკუმენტაციის მიზანმიმართულად არასწორი, დაუსაბუთებელი ინტერპრეტაცია მოახდინეს, რის საფუძველზეც უკანონოდ და დაუსაბუთებლად მოახდინეს „მონოლითი 2005“-ის დისკვალიფიკაცია, მაშინ როდესაც სატენდერო დოკუმენტაციით მოთხოვნილ 7 მილიონი ლარის სამუშაოს შესრულების გამოცდილების დამადასტურებელი დოკუმენტების ნაცლად ატვირთული იქნა დაახლოებით 11 მილიონი ლარის ღირებულების სამუშაოს შესრულების გამოცდილების დამადასტურებელი დოკუმენტაცია“ – აღნიშნულია კომპანიის საჩივარში.
კომპანიაში აცხადებენ, რომ ქობულეთის მუნიციპალიტეტის სატენდერო კომისიის გადაწყვეტილებით, „დაირღვა სახელმწიფო შესყიდვების მარეგულირებელი კანონმდებლობა, უგულებელყოფილი იქნა სახელმწიფო შესყიდვების პროცედურაში თანასწორობის, სამართლიანი კონკურენციისა და მიუკერძოებლობის ფუნდამენტური პრინციპები და გვაქვს სადაო გადაწყვეტილების გაუქმების აბსოლუტური ფაქტობრივი და სამართლებრივი საფუძვლების მოცემულობა“.
დავების საბჭოში „მონოლითი-2005“ სატენდერო კომისიის გადაწყვეტილების გადასინჯვა-გაუქმებას ითხოვს – რათა კომისიამ წარდგენილი დოკუმენტაცია კანონმდებლობის სრული დაცვით შეაფასოს.
შესყიდვების სააგენტოს დავების საბჭო საკითხს მიმდინარე წლის 18 ოქტომბერს განიხილავს. იმ შემთხვევაში, თუ საბჭო „მონოლითი-2005“-ის სარჩელს არ დააკმაყოფილებს, სატენდერო კომისიას მოუწევს სხვა პრეტენდენტის წინადადების შესწავლა. ასეთი კი რუსეთის ფედერაციაში რეგისტრირებული კომპანიის „ვლადნეფტპროდუქტის“ წარმომადგენლობაა საქართველოში, რომელიც ქობულეთის მუნიციპალიტეტს პარკის მოწყობას, 291 180 ლარით ძვირად, 2,7 მილიონად სთავაზობს, ვიდრე „მონოლითი-2005“.
ქობულეთის მუნიციპალიტეტის მიერ გამოცხადებულ ტენდერში წინადადებების მიღება 2018 წლის 27 სექტემბერს დასრულდა. აღნიშნული კომპანიების გარდა მონაწილეობს თუ არა სხვა პრეტენდენტები უცნობია, ვინაიდან ტენდერი აუქციონის გარეშე ჩატარდა. რუსული კომპანიის წარმომადგენლობაც ტენდერში მონაწილეებს შორის მხოლოდ იმიტომ გამოჩნდა, რომ ყველაზე დაბალი ფასის შეთავაზების მქონე „მონოლითი-2005“-ს კომისიამ დისკვალიფიკაცია მისცა.
ამ თემაზე:
https://batumelebi.netgazeti.ge/news/156752/
