„საინფორმაციო შეხვედრის ჩატარებას ვთხოვთ მერამდენე თვეა ბათუმში მომუშავე კლინიკების ექიმებს. თითქმის ყველა კლინიკაში დავრეკეთ, ან მივწერეთ. „მაგნაირებთან არ მაქვს ურთიერთობაო” გვეუბნებიან,“ – ამ განცხადებას „ფეისბუქში“ ორგანიზაცია „იდენტობის“ ბათუმის ოფისის მენეჯერი, მარიამ ქაჯაია ავრცელებს.
მარიამ ქაჯაიას თქმით, სექსუალურ უმცირესობებთან კონსულტაციაზე უარი ბათუმში მომუიშავე ექიმებმა თქვეს. საუბარია საინფორმაციო ხასიათის ერთჯერად შეხვედრაზე, სადაც ორგანიზაცია ექიმს მცირედ ჰონორარსაც გადაუხდის.
მარიამ ქაჯაია, „იდენტობის“ მენეჯერი განმარტავს, რომ ექიმს სათემო ორგანიზაციის წევრებისთვის რომელიმე კონკრეტულ პრობლემაზე პრეზენტაცია უნდა მოემზადებინა, ან შეხვედრა კითხვა-პასუხის რეჟიმში გაიმართებოდა.
„გვითხრეს, რომ მოიფიქრებდნენ პასუხს. მოფიქრებული პასუხი კი ყოველთვის უარყოფითია, იმიზეზებენ უდროობას, აუდიტორიის შიშს, ჯანმრთელობის მდგომარეობას… თუ “იდენტობას” როგორც ორგანიზაციას არ იცნობენ, ორიოდე წინადადების თქმას გაცლიან, მაგრამ როგორც კი გააცნობ, იმ წამსვე თავის დაძვრენაზე გადადიან,“ – ამბობს მარიამ ქაჯაია.
„იდენტობის“ მენეჯერის თქმით, ბათუმის ოფისში ყოველდღიურად დაახლოებით 25-მდე წევრი დადის. მარიამ ქაჯაია თვლის, რომ ექიმების დამოკიდებულება არაეთიკური, არაპროფესიონალური და დისკრიმინაციულია. „ასეთი ტიპის დისკრიმინაციასთან ბრძოლის წინააღმდეგ ეფექტური მექანიზმი არ არსებობს,“ – ამბობს ის.
„ეს არის ილუსტრაცია იმისა, რომ ეს ადამიანები ვერ და არ გაუწევენ სრულფასოვან მომსახურებას იმ ადამიანებს, ვისზეც წინასწარ დაასკვნიან, რომ განსხვავდებიან მათთვის მისაღები ადამიანების ტიპისგან…“ – მიიჩნევს მარიამ ქაჯაია.
„იდენტობის“ მენეჯერს არ სურს კონკრეტული ექიმების დასახელება, რომლებმაც მას კონსულტაციაზე უარი უთხრეს. „ჩვენ დავუკავშირდით თითქმის ყველა კლინიკის დირექტორს, შემდეგ ისინი გვამისამართებდნენ კონკრეტულ ექიმებთან. ზოგიერთ კლინიკაში პირდაპირ ექიმს ვურეკავდით. არ მახსოვს ყველა მათგანის სახელი და გვარი. არც ეფექტური მგონია ამის გასაჯაროვება,“ – გვითხრა მარიამ ქაჯაიამ.
სოციალურ ქსელში გამოქვეყნებულ პოსტს „იდენტობის“ მენეჯერი მიმართვით ასრულებს: „მოკლედ, თუ იცით ვინმე ვენეროლოგი/ინფექციონისტი, უროლოგი, პროქტოლოგი, ენდოკრინოლოგი ან რომელიმე კლინიკა, რომელიც მის თანამშრომლებს ანტიდიკსიმინაციული მეთოდებით მუშაობას სთხოვს ბათუმში/ბათუმის მიმდებარედ, ძალიან დაგვეხმარებით.“
