მთავარი,სიახლეები

მოსაბრუნებელი გზა მახინჯაურის გვირაბის თავზე – დამატებით 4,4 მილიონი ლარი ბიუჯეტიდან

15.10.2018 • 3480
მოსაბრუნებელი გზა მახინჯაურის გვირაბის თავზე – დამატებით 4,4 მილიონი ლარი ბიუჯეტიდან

ჩაქვი-მახინჯაურის გვირაბთან მოსაბრუნებელი გზის მოსაწყობად საქართველოს საავტომობილო გზების დეპარტამენტმა ტენდერი გამოაცხადა. სავარაუდო თანხა 4 485 415 ლარია. მოსაბრუნებელი გზა, რომელიც მახინჯაურის მხრიდან გვირაბის თავზე გადაივლის, შესაბამისი ხელშეკრულების გაფორმებიდან რვა თვეში უნდა დასრულდეს, თუმცა, ჯერ ის ნაკვეთები, სადაც გზა გაივლის, კერძო მესაკუთრეებისგან სახელმწიფოს არ გამოუსყიდია.

მიწის ნაკვეთების გამოსყიდვაზე კერძო მესაკუთრეებთან შეთანხმება მიღწეული რომ არ არის, „ბათუმელებს“ გზების დეპარტამენტში დაუდასტურეს. რატომ გამოცხადდა ტენდერი ნაკვეთების გამოსყიდვის გარეშე და რამდენადაა შეფასებული ეს ნაკვეთები? – ამ კითხვებზე დეპარტამენტისგან პასუხები ჯერ ვერ მივიღეთ.

სატენდერო დოკუმენტების მიხედვით, აღნიშნული გზა გადის სახელმწიფოს საკუთრებაში არსებულ 7910 კვ/მ და კერძო საკუთრებაში არსებულ 2620 კვ/მ  მიწის ნაკვეთებზე. „ბათუმელების“ ინფორმაციით, ამ კერძო ნაკვეთებს სულ ცოტა 8-10 მესაკუთრე ჰყავს.

მოსაბრუნებელი გზის მოსაწყობად სამუშაოები 2017 წელს დაიწყო და იმავე წელს უნდა დასრულებულიყო. სამუშაოები დაიწყეს, თუმცა დროულად ვერც გეოლოგიური დასკვნა დაიდო, ვერც პროექტი და არც ის თანხა აღმოჩნდა საკმარისი, რაც კვანძის ასაშენებლად გათვალეს.

გზის გარკვეული ნაწილის მშენებლობაზე და შესაბამის კვლევა-პროექტირებაზე დეპარტამენტმა 2,5 მილიონი ლარი უკვე დახარჯა. სამშენებლო სამუშაოები კომპანია „გზამ“ შეასრულა. „ბათუმელების“ ინფორმაციით, ამჯერად შესრულებული სამუშაოების მიღება-ჩაბარების პროცედურა მიმდინარეობს.

მოსაბრუნებელი გზა გვირაბთან / პროექტი

„მახინჯაურიდან გასული ავტომანქანა, საჭიროების შემთხვევაში, გვირაბის მისასვლელიდან უკან დაბრუნებას ამ კვანძის საშუალებით შეძლებს. ეს კვანძი უფრო ქალაქში მოძრაობისთვისაა გათვლილი“ – განაცხადეს თავის დროზე დეპარტამენტში.

ეს კვანძი, ანუ მოსაბრუნებელი გზა, პროექტის მიხედვით, უშუალოდ გვირაბების თავზე გაივლის, შესაბამისად, როგორც „ბათუმელებმა“ გაარკვია, იგეგმება არსებული გვირაბების გამაგრებაც, რათა მან დატვირთვას გაუძლოს.

ტენდერში წინადადებების მიღება 2018 წლის 2 ნოემბერს დაიწყება და 7 ნოემბერს დასრულდება.

ამ თემაზე:

ფერდების მდგრადობა არ აკმაყოფილებს ნორმებს – მშენებლობა გვირაბთან 4,7 მილიონით ძვირდება

სტუდენტების საერთო საცხოვრებელთან ბიძინა ივანიშვილისთვის კიდევ ერთი ხე ამოთხარეს

მთავარი ფოტო: ჩაქვი-მახინჯაურის გვირაბი, სადაც მოსაბრუნებელი გზა უნდა მოეწყოს.

გადაბეჭდვის წესი


ასევე: