ბათუმში მცხოვრები 9 წლის დაჩი ცენტერაძის საშინაო დავალებამ, რომელიც მისმა ბებიამ ფეისბუქზე გამოაქვეყნა, ქართული ინტერნეტი მოიცვა.
“დააკვირდი ჰორიზონტს შენი საცხოვრებელი ბინის ფანჯრიდან ან აივნიდან. განსაზღვრე ჰორიზონტი ღიაა თუ დახურული. შეადგინე პატარა მოთხრობა თემაზე “ჰორიზონტი ჩემი საცხოვრებელი ბინიდან” – ასეთი იყო დავალება, რომელიც დაჩის უნდა შეესრულებინა.
“ჩემი ბინიდან ძალიან კარგი ხედები ჩანდა. განსაკუთრებით ლამაზი იყო ღამის ბათუმი. განათებული მედეას ქანდაკება, ეშმაკის ბორბალი. ძალიან ლამაზი იყო ანბანის კოშკი. ყოველ საღამოს ფერად-ფერადად განათებულ ქართულ ანბანს ვკითხულობდი კოშკზე. ე.ი. ჩემი ბინიდან ღია ჰორიზონტი იყო. ახლა კი ჩემი ბინიდან მხოლოდ ქვის კედლები მოსჩანს. იმდენი მაღალი შენობები ააშენეს, სულ დამიხურეს ჰორიზონტი. ახლა მანსარდაზე ავდივარ და იქედან ვუყურებ, ისიც მხოლოდ შერატონს. მალე ალბათ ისიც აღარ გამოჩნდება. აი, ეს არის დახურული ჰორიზონტი,” – წერს დაჩი.
https://www.facebook.com/photo.php?fbid=417914558738503&set=a.341652446364715&type=3&theater
თანამედროვე ბათუმში მიმდინარე ქაოსურ მშენებლობებზე არაერთი სტატია დაწერილა. ქალაქის ხელისუფლება ამტკიცებს, რომ ბათუმი სწორად და გეგმის მიხედვით ვითარდება.
9 წლის დაჩი ამბობს, რომ “მის პატარაობაში ბათუმი სხვანაირი იყო, უფრო ლამაზი”. დაჩის აზრით ახლა ბათუმი სხვანაირია, “ქვის კედლიანი”. ხედიდან, რომელსაც დაჩი ხედავდა და რომელიც ახლა ყრუ კედლებს აქვს ჩანაცვლებული, ჩანდა „ანბანის კოშკი“ და „ეშმაკის ბორბალი“. ბიჭს გული ყველაზე მეტად იმაზე წყდება, რომ აღარ შეუძლია მათი დანახვა.
დაჩის სასკოლო საგნებიდან ყველაზე მეტად მათემატიკა უყვარს. ამბობს, რომ როცა გაიზრდება, არქიტექტორი გამოვა და ბათუმში პატარა სახლებს ააშენებს, რათა ადამიანებმა თავიანთი სახლებიდან სხვა სახლების დანახვა შეძლონ.
სანამ არქიტექტორი გახდება, საკუთარი ფანტაზიით ლეგოს ქალაქს აშენებს. მის “ლეგოქალაქში” ყველაზე მაღალი “შენობა” სამსართულიანია.
დაჩი ცენტერაძე და მისი ლეგოქალაქი
https://www.facebook.com/batumelebi/videos/633844433679498/?__xts__[0]=68.ARDjm4YJ1Tlyz_Gc_4sVq3l4c_uwznIUtyLbMuIMsFS5yP3gQA2HBZuwEtrpFAVM7oub-hh2_lxpCyAIPOKIGhe8Btgz9aS-jnm4-MC0kejM_yrgff6mc1rwvXy1TxPUm7DZDJXYzEC6WjB4a9Ipk30p3wuwxUkozhuucAjYHwpPJSdKMSB2&__tn__=-R
