ანტიოკუპაციური სტიკერები ფრანკფურტის წიგნის ბაზრობაზე

„საქართველოს 20% ოკუპირებულია რუსეთის მიერ, ქართველი მწერლები და გამომცემლები არასდროს შეეგუებიან რუსულ ოკუპაციას“ –  ამ წარწერით სტიკერები ფრანკფურტის წიგნის ბაზრობაზე სხვა სასაჩუქრე გამოცემებთან, წიგნის სანიშნეებთან და ბუკლეტებთან ერთად რიგდება.

ფრანკფურტის წიგნის ბაზრობის გახსნამდე 4 საათით ადრე ბაზრობის „ბიზნესკლუბის“ პირველ პლატფორმაზე საქართველოს წიგნის გამომცემელთა და გამავრცელებელთა ასოციაციის თავმჯდომარემ, გვანცა ჯობავამ წიგნის ქართულ გამომცემლობებზე, ქართულ ანბანსა და რუსულ ოკუპაციაზე ისაუბრა:

„გასული საუკუნის 70 წელი საბჭოთა შემადგენლობაში გავატარეთ, 90-იანი წლებიდან კი, საბჭოთა კავშირის რღვევის შემდგომ, დამოუკიდებელ სახელმწიფოდ ჩამოყალიბების რთული პერიოდი განვვლეთ. საქართველო კავკასიის რეგიონში, თურქეთის, რუსეთის, აზერბაიჯანისა და სომხეთის მოსაზღვრედ მდებარეობს. თუმცა საქართველოს ორნაირი რუკა შეიძლება შეგხვდეთ, ერთი აღნიშნული საზღვრებით, მეორე კი რუკა, რომელიც მიანიშნებს, რომ 1992-93 წლებისა და 2008 წლის ომების შემდგომ, საქართველოს 20% რუსეთის მიერ არის ოკუპირებული. ჩვენ ამ რუკაზე ვამბობთ, რომ ეს არის საქართველო იმ სახით, როგორც რუსეთი გვხედავს.

დღემდე ხშირად ხდება ხოლმე, რომ უცხოელი ნაცნობები გვეკითხებიან, ვსაუბრობთ და ვწერთ თუ არა რუსულ ენაზე. ჩემი პასუხია, არა, ჩვენ ქართულ ენაზე ვსაუბრობთ. ქართული, ორიგინალური, სამსახოვანი დამწერლობა კი შესულია იუნესკოს კაცობრიობის არამატერიალური კულტურული მემკვიდრეობის წარმომადგენლობით ნუსხაში. დღეს აქ ამ თემას იმიტომ შევეხე, რომ ვფიქრობ, კულტურაs დაკავშირებულია პოლიტიკასთან და ამის შესახებ ჩვენ ბაზრობის სხვა დღეებშიც ვისაუბრებთ. ვფიქრობ, ეს აუცილებელია, იმიტომ რომ ბევრმა დღემდე არ იცის რა მოხდა საქართველოში 2008 წლის აგვისტოში. მინდა გითხრათ, რომ ომის შედეგად უამრავმა ადამიანმა დაკარგა საცხოვრებელი სახლი, იქცა დევნილად, თუმცა ამით ომი არ დასრულებულა. საქართველო დღემდე რუსეთის მხრიდან პერმანენტული მცოცავი ოკუპაციის მსხვერპლია. ფრანკფურტის წიგნის ბაზრობაზე საქართველოს, როგორც საპატიო სტუმრის პროექტი ჩვენთვის დიდი დაბრუნებაა ევროპაში. იმედი მაქვს ისიამოვნებთ საქართველოს პრეზენტაციით და ხელახლა აღმოაჩენთ ჩვენს ქვეყანას, რომელთანაც წლების განმავლობაში გამყოფი საბჭოთა რკინის ფარდა გაშორებდათ”.

ფრანკფურტის წიგნის ბაზრობა 5 დღე, 14 ოქტომბრამდე გრძელდება.

ქართული წიგნების თარგმანები, პუბლიკაციები, შეხვედრები გამომცემლებთან, საღამოები და სემინარები – გარდა ქართული ლიტერატურის პოპულარიზაციისა, მწერლებისა და გამომცემლებისგან შემდგარ ქართულ დელეგაციას საშუალება ეძლევა, გააცნოს ფრანკფურტის წიგნის ბაზრობის სტუმრებს საქართველოში მიმდინარე მნიშვნელოვანი მოვლენები.

 

 

ნეტგაზეთის მასალების სხვა გამოცემებში გადაბეჭდვის წესი


ავტორი
თამუნა ნერგაძე არის "ბათუმელების" რეპორტიორი 2017 წლის ოქტომბრიდან