დღეს, 9 ოქტომბერს, ბათუმის ამერიკულ კუთხეში „ტოლერანტობისა და მრავალფეროვნების“ ინსტიტუტმა საზოგადოებას საკონსტიტუციო სასამართლოს გადაწყვეტილება გააცნო, რომელიც შეეხება რელიგიური უმცირესობებისთვის საგადასახადო შეღავეთებისა და სახელმწიფო ქონებით სარგებლობის უფლებას.
საკონსტიტუციო სარჩელი ქონებრივ და საგადასახადო კანონმდებლობაში ამ უთანასწორობის აღმოფხვრას ეხებოდა.
„საგადასახადო კოდექსის პირველი მუხლი ამბობდა, რომ მხოლოდ მართლმადიდებელი ეკლესია იყო გათავისუფლებული დამატებითი ღირებულების გადასახადისგან მაშინ, როცა სხვები ამ გადასახადს იხდიდნენ.
მეორე ნაწილი ეხებოდა ქონების შესახებ კანონს, რომელიც ამბობდა, რომ სახელმწიფოს შეუძლია მისცეს უსასყიდლოდ სახელმწიფო ქონება მხოლოდ მართლმადიდებელ ეკლესიას, მაშინ როცა სხვა რელიგიური ორგანიზაციებისთვის არ შეეძლო მიცემა.
საკონსტიტუციო სასამართლომ, ამ ორივე ნაწილში დაადგინა დისკრიმინაცია და უთხრა პარლამენტს, რომ 2018 წლის 31 დეკემბრამდე ეს პრობლემა აღმოფხვრას“, – ამბობს „ტოლერანტობისა და მრავალფეროვნების ინსტიტუტის“ იურისტი, გიორგი ნონიაშვილი.
ნონიაშვილის განმარტებით, დღეს არსებული საკანონმდებლო რეგულაციით, მხოლოდ მართლმადიდებელ ეკლესიას აქვს უფლება, იყოს სახელმწიფო ქონების შემძენი უსასყიდლოდ.
„ასევე, ეკლესიების მშენებლობა, რესტავრაცია, მოხატვით მხოლოდ დომინანტური რელიგია სარგებლობს. მსგავსი პრივილეგიები კი არ გააჩნია სხვა რელიგიურ დენომინაციებს“.
საკონსტიტუციო სასამართლოს გადაწყვეტილების საფუძველზე, საქართველოს პარლამენტს შეუძლია უთანასწორობა გამოასწოროს ორი გზით – უნდა გაათანაბაროს ყველა რელიგიური ორგანიზაცია ამ პრივილეგიებთან მიმართებაში ან მართლმადიდებელ ეკლესიასაც ჩამოართვას ქონებრივი და საგადასახადო პრივილეგია.
„თუკი პარლამენტი მართლმადიდებელ ეკლესიას გაუთანაბრებს სხვა რელიგიურ ორგანიზაციებს, მაშინ ეს ორგანიზაციებიც ასევე შეძლებენ რელიგიური დაწესებულებების, სამლოცველოების მშენებლობას, რესტავრაციას, მოხატვას დღგ-ს გარეშე და მეორე მხრივ, ეს მათ შესაძლებლობას გაუჩენს, მიიღონ სახელმწიფო ქონება, თუ სახელმწიფომ ეს მიიჩნია საჭიროდ“.
ნონიაშვილის განმარტებით, ეს ნიშნავს, რომ რელიგიურ უმცირესობებს 18 პროცენტით უფრო იაფი დაუჯდებათ ფუნქციონირება, ვიდრე აქამდე, ისევე როგორც მართლმადიდებელ ეკლესიას.
საკონსტიტუციო სასამართლოში აღნიშნული სარჩელის წარმოება მიმდინარეობდა 2016 წლიდან. რელიგიური უმცირესობების ინტერესებს საკონსტიტუციო სასამართლოში იცავდა „ტოლერანტობისა და მრავალფეროვნების ინსტიტუტი“, თავისუფალ უნივერსიტეტთან ერთად.
საკონსტიტუციო სასამართლომ საქართველოს კანონის ეს ორი ნორმა არაკონსტიტუციურად 3 ივლისს ცნო.
TDI-ის შეხვედრა ბათუმის ამერიკულ კუთხეში საკონსტიტუციო სასამართლოს გადაწყვეტილებასთან დაკავშირებით
