მთავარი,სიახლეები

თურქეთი, ირანი, რუსეთი – რომელი ქვეყნის რამდენი მოქალაქე ცხოვრობს საქართველოში (ინფოგრაფიკა)

07.10.2018 • 39906
თურქეთი, ირანი, რუსეთი – რომელი ქვეყნის რამდენი მოქალაქე ცხოვრობს საქართველოში (ინფოგრაფიკა)

„ბათუმელებმა“  საქართველოს იუსტიციის სამინისტროსგან გამოითხოვა ოფიციალური სტატისტიკური მონაცემები, თუ უცხო ქვეყნის რამდენმა მოქალაქემ დაუკავშირა ბოლო ორი წლის განმავლობაში თავისი მომავალი საქართველოს. ამ მონაცემების მიხედვით, 2016 წლის 16 სექტემბრიდან 2018 წლის 17 აგვისტომდე პერიოდში, საქართველოს მოქალაქეობა მიუღია 15 229 უცხო ქვეყნის მოქალაქეს. აღმოჩნდა, რომ ყველაზე მეტი – 6 447 მოქალაქეობის მიმღები პირი არის რუსეთიდან, 298 თურქეთიდან, 194 კი ირანიდან.

ამ პირებს საქართველოში აქვთ ხმის მიცემის უფლება.

არჩევნებში ხმის მიცემის უფლება ასევე აქვთ იმ პირებსაც, ვინც ორმაგი მოქალაქეობის სტატუსი მოიპოვა. ორმაგი მოქალაქეობის მისაღებად კი საქართველოს იუსტიციის სამინისტროსთვის, ბოლო ორი წლის განმავლობაში, სულ  58 143 უცხო ქვეყნის მოქალაქეს მიუმართია. ამ სტატუსის მფლობელი სრული უმრავლესობაც – 41 631 პირი არის რუსეთის მოქალაქე, 2 336 თურქეთის მოქალაქე, ხოლო 525 ირანის მოქალაქე.

წყარო: საქართველოს იუსტიციის სამინისტრო. 

ვიდრე იუსტიციის სამინისტროს მიერ მოწოდებულ ოფიციალურ მონაცემების დეტალურ ანალიზს შემოგთავაზებთ, საქართველოს საარჩევნო კოდექსის ერთ ნაწილზე გავამახვილებთ ყურადღებას: 2016 წლის საპარლამენტო არჩევნებზე, მაგალითად, პარტია „პატრიოტთა ალიანსმა“ 88 097 ხმა მიიღო და პარლამენტში ექვსი დეპუტატი შეიყვანა. მაშინ პოლიტიკურ პარტიას პარლამენტში მოსახვედრად ხუთპროცენტიანი ბარიერის დაძლევა უწევდა. 2020 წლის საპარლამენტო არჩევნებისთვის, საარჩევნო კოდექსში შესული ცვლილების თანახმად, ბარიერი სამპროცენტამდე შემცირდა. ეს იმას ნიშნავს, რომ თეორიულად, პარლამენტში მოსახვედრად საკმარისი იქნება იმ ოდენობის ხმები, რუსეთის რამდენმა მოქალაქემაც მოიპოვა საქართველოში საარჩევნო ხმის უფლება ბოლო ორი წლის განმავლობაში.

ამ ოდენობით [რუსეთი] მოქალაქეების საქართველოში შემოდინება არ ფიქსირდება არც ერთი სხვა ქვეყნიდან. ამის მიუხედავად, საქართველოში არსებობენ ჯგუფები თუ პოლიტიკური გაერთიანებები, რომლებიც გამუდმებით ამტკიცებენ, რომ ყველაზე მეტად მიგრაცია აღმოსავლეთის ქვეყნებიდან იზრდება.

მაგალითად, ყოფილი პრეზიდენტი მიხეილ სააკაშვილი სულ ახლახან ფეისბუქში წერდა, რომ „ქართველების სამუშაო ადგილები წაიღეს ღარიბმა ირანელებმა, თურქებმა და სხვა უცხოელებმა. მდიდარი ინვესტორების ნაცვლად, რომელთაც ქართველები უნდა დაესაქმებინათ, მივიღეთ გაღლეტილი მიგრანტები“.

უცხოელებისთვის ბინადრობის უფლების შეზღუდვაზე საუბრობდა თბილისის მერი კახა კალაძეც. მან განაცხადა, რომ უცხოელებზე მუდმივი ბინადრობის უფლება იმ შემთხვევაში უნდა გაიცეს, თუ ისინი სულ ცოტა ასი ათასი დოლარის ქონებას შეიძენენ. „ძალიან ბევრი შემთხვევა გვაქვს, როდესაც ერთი ადამიანი ყიდულობს ბინას, შემდეგ კი, ფიქტიურად, სხვა პირზე გადააფორმებს. კანონის მიხედვით, ეს ადამიანებიც ანალოგიურად იღებენ ბინადრობის უფლებას. ანუ ისინი ე.წ კარუსელს ატრიალებენ. ეს ჩვენთვის კატეგორიულად მიუღებელია,” – თქვა კახა კალაძემ.

მმართველი პარტიის მხარდაჭერილმა პრეზიდენტობის კანდიდატმა, სალომე ზურაბიშვილმაც ამომრჩეველთან შეხვედრის დროს აქცენტი უცხოელებისთვის მოქალაქეობის მინიჭებაზე გააკეთა.

უფრო რადიკალური – ნეოფაშისტური თუ ქსენოფობიური განწყობების დაჯგუფებები განსაკუთრებული სიძულვილის ენით აღმოსავლეთისა და აფრიკის ქვეყნებიდან მიგრირებულ ადამიანებზე საუბრობენ. მათი აზრით, ირანელი, ჩინელი, თურქი და ა.შ. მოქალაქეების სიმრავლე საქართველოს როგორც პოლიტიკურ, ასევე ეკონომიკურ საფრთხეს უქმნის.

5 ოქტომბერს საქართველოს პარლამენტთან ამ ჯგუფების მიერ ორგანიზებული საპროტესტო აქციის მთავარი მოთხოვნაც საემიგრაციო პოლიტიკის გამკაცრებას უკავშირდებოდა. აქ გამომსვლელები აცხადებდნენ, რომ უნდა შეწყდეს ბინადრობის უფლების გაცემა იმ ქვეყნების მოქალაქეებზე, „საიდანაც მასობრივად ხდება საქართველოში მიგრაცია“. 

იუსტიციის სამინისტროს სტატისტიკა

  • ორმაგი მოქალაქეობა

იუსტიციის სამინისტროს ინფორმაციით, ამ დროისთვის საქართველოში ორმაგ მოქალაქეობას  58 143 ადამიანი ფლობს. რუსეთის მოქალაქეების გარდა, ბოლო ორი წლის განმავლობაში ორმაგი მოქალაქეობა მიენიჭა აშშ-ის 1768 მოქალაქეს. 1222 – აზერბაიჯანელს, 2336 – თურქეთის მოქალაქეს, 525 – ირანის მოქალაქეს, 2158 – ისრაელის, 1666 – საბერძნეთის, 1936- სომხეთის, 1061 – უკრაინის, 389 – ყაზახეთის მოქალაქეებს. დანარჩენი ქვეყნების მონაცემები ამ ნიშნულს ბევრად ჩამოუვარდება.

წყარო: საქართველოს იუსტიციის სამინისტრო – ორმაგი მოქალაქეობა

  • მოქალაქეობა

ბოლო ორი წლის განმავლობაში საქართველოს მოქალაქეობის მიღება მოითხოვა ავღანეთის სამმა მოქალაქემ, მათ უარი უთხრეს.

ამავე პერიოდში საქართველოს მოქალაქეობა მიიღო აზერბაიჯანის 15-მა მოქალაქემ, ხოლო მოქალაქეობა შეუწყდა 199 ადამიანს.

საქართველოს მოქალაქეობა ჩვეულებრივი წესით მიენიჭა ბანგლადეშის  ორ მოქალაქეს, ორს კი უარი ეთქვა.

ეგვიპტის ორ მოქალაქეს გამარტივებული წესით მიენიჭა მოქალაქეობა და ამდენივე  გავიდა მოქალაქეობიდან.

მოქალაქეობის მიღების მოთხოვნით ამ პერიოდში ერაყიდან  40-მა პირმა გააკეთა განაცხადი, თუმცა არც ერთი მოთხოვნა არ დაკმაყოფილდა. ამავე პერიოდში საქართველოს მოქალაქეობა შეუწყდა ექვს ერაყელს.

ინდოეთიდან  28 განაცხადი არ დაკმაყოფილდა, მხოლოდ ერთმა მიიღო მოქალაქეობა. ხუთ ადამიანს საქართველოს მოქალაქეობა შეუწყდა. საქართველოში სულ 9 335 ინდოელი ცხოვრობს, მათგან 6259 სტუდენტია, ხოლო 2435 მუშაობს. დანარჩენები საქართველოში სხვადასხვა მიზნით იმყოფებიან.

ლიბანიდან მხოლოდ ექვსმა პირმა მიიღო საქართველოს მოქალაქეობა. ნიგერიიდან  შვიდი განაცხადი იყო და არც ერთი არ დაკმაყოფლა. პაკისტანიდან  მხოლოდ ერთ ადამიანს მიენიჭა საქართველოს მოქალაქეობა.

სამხრეთ აფრიკის რესპუბლიკიდან ამ პერიოდში ექვსმა ადამიანმა მიიღო საქართველოს მოქალაქეობა. საუდის არაბეთიდან  სამი განაცხადი იყო შემოსული და არც ერთი არ დაკმაყოფილდა.

სირიიდან  42 პირი ითხოვდა მოქალაქეობას და მხოლოდ ერთს მიენიჭა საქართველოს მოქალაქეობა.

ყაზახეთიდან კი 58 პირს მიენიჭა საქართველოს მოქალაქეობა, 40 განაცხადი არ დაკმაყოფილდა.

  • ბინადრობა და ორმაგი მოქალაქეობა – ბათუმი

ამ პერიოდში ბათუმში ორმაგი მოქალაქეობის უფლების მქონე 3 712 ადამიანი ცხოვრობს. აქედან, ყველაზე მეტი – 1967 რუსეთის მოქალაქეა, 1270 – თურქეთის, 105 – უკრაინის, 99 – ისრაელის, 62 – საბერძნეთის, 30 კი – აშშ-ის. სხვა ქვეყნების მაჩვენებლები შედარებით დაბალია.

ბინადრობის მოწმობა (როგორც დროებითი, ასევე მუდმივი) ბათუმში მცხოვრები უცხოელების შემთხვევაში, გაცემულია 3 698 ადამიანზე. აქედან ყველაზე მეტი – 1212 ამ შემთხვევაშიც რუსეთის მოქალაქეებზე მოდის,  841 – თურქეთის, 472 – ინდოეთის, 133 – ირანის, 454 კი – უკრაინის.

წყარო: საქართველოს იუსტიციის სამინისტრო

  • ბინადრობა

„ბათუმელების“ მიერ იუსტიციის სამინისტროდან ოფიციალურად გამოითხოვილი ბოლო ორი წლის დეტალური მონაცემები ასე გამოიყურება:

2016 წლის 16 სექტემბრიდან 2018 წლის 17 აგვისტომდე 52 758 პირმა მოითხოვა ბინადრობის, ანუ საქართველოში ლეგალურად ცხოვრების უფლება. აქედან 38 284 პირმა მოიპოვა ეს უფლება.

მათ შორის ეთნიკურად თურქი არის 4 088 პირი, აქედან, მუდმივი საინვესტიციო ბინადრობის უფლება მოიპოვა ხუთმა ადამიანმა, 265-ს მუდმივი ცხოვრების უფლება მიენიჭა, 661-ს – ოჯახის გაერთიანების მიზნით, 144 პირს სასწავლო ბინადრობის უფლება აქვს, 2946 პირი კი შრომითი ბინადრობის უფლებით სარგებლობს.

საქართველოში ბინადრობის უფლება ასევე მიუღია 10 957 ირანის მოქალაქეს, მათ შორის მოკლევადიანი ბინადრობის უფლება – 3 605 პირს, ოჯახის გაერთიანების მიზნით – 1 428 პირს, შრომითი ბინადრობის უფლება 5 179, მუდმივი ცხოვრების ნებართვა კი 120 პირს.

ბოლო ორი წლის მანძილზე საქართველოში მოკლევადიანი ბინადრობის უფლება მიენიჭა ორ ავღანელს. ოჯახის გაერთიანების მიზნით ბინადრობის უფლება აღიდგინა ოთხმა პირმა, სასწავლო მიზნით ათი პირი ცხოვრობს, შრომითი ბინადრობის ნებართვა კი 11 პირზეა გაცემული.

მუდმივი საინვესტიციო ბინადრობის უფლებით საქართველოში ცხოვრების უფლება მიიღო აზერბაიჯანის სამმა მოქალაქემ, მუდმივი ცხოვრების – 308 პირმა. ოჯახის გაერთიანების მიზნით ცხოვრების უფლება კი მოპოვებული აქვს 144 აზერბაიჯანელს, შრომითი უფლებით სარგებლობს 321 პირი, სასწავლო მიზნით ცხოვრების ნებართვა 25-მა აზერბაიჯანელმა მიიღო.

ალჟირიდან, ოჯახის გაერთიანების მიზნით, სამი პირი ცხოვრობს, სასწავლო მიზნით კი, ორი ადამიანი იმყოფება.

ბანგლადეშიდან მუდმივი ცხოვრების უფლება მოიპოვა ამ დროისთვის ორმა პირმა, სასწავლო ბინადრობის უფლება – 11-მა, შრომითი ბინადრობის უფლება კი – 17-მა ადამიანმა მიიღო.

ბაჰრეინიდან სასწავლო მიზნით ერთი ადამიანი ცხოვრობს საქართველოში, შრომითი ბინადრობის უფლება მოიპოვა ორმა პირმა.

ბურუნდიდან სპეციალური ბინადრობის უფლებით იმყოფება ხუთი ადამიანი, ორს კი შრომითი ბინადრობის უფლება აქვს.

აფრიკის ქვეყნებიდან – გამბია, განა და გაბონი, შრომითი ბინადრობის უფლება აქვს ერთ პირს, სპეციალური უფლება – სამ პირს, სასწავლო კი – ერთს.

ეგვიპტიდან მუდმივი ცხოვრების უფლება მოპოვებული აქვს 29 ადამიანს, სასწავლო ნებართვა აქვს 184 პირს, შრომითი კი – 269 პირს. ოჯახის გაერთიანების მიზნით საქართველოში ამ პერიოდში 32 ეგვიპტელი ცხოვრობს.

წყარო: საქართველოს იუსტიციის სამინისტრო

ეთიოპიიდან ორ ადამიანს აქვს სასწავლო ბინადრობის უფლება და ამდენივეს შრომითი ბინადრობის უფლება.

ბოლო ორი წლის მანძილზე მუდმივი საინვესტიციო უფლებით ისარგებლა ცხრა ერაყელმა, სასწავლო ბინადრობის უფლებით – 460-მა, ხოლო 19-მა პირმა შრომითი ბინადრობის უფლება მიიღო.

ზიმბაბვედან რვა ადამიანს მიენიჭა სასწავლო ბინადრობის უფლება, ერთს კი მუდმივი ცხოვრების უფლება აქვს.

თურქმენეთიდან შრომითი ბინადრობის უფლებით სარგებლობს 50 ადამიანი, სასწავლოთი – სამი, ოჯახის გაერთიანების მიზნით კი – 49 პირი.

სასწავლო ბინადრობის უფლება მისცა სახელმწიფომ 6 259  ინდოელს, შრომითი ბინადრობის უფლება – 2 435 პირს, 162 პირს აქვს მუდმივი ცხოვრების უფლება, 24-ს კი  – მუდმივი საინვესტიციო ცხოვრების უფლება.

ინდონეზიიდან შრომითი ბინადრობის უფლებით 14 პირი სარგებლობს, სასწავლო ნებართვა კი ორ ადამიანს აქვს.

ნეპალიდან სასწავლო ბინადრობის ნებართვა აქვს 46 პირს, შრომითი კი – 25 პირს.

ნიგერიიდან სასწავლო ბინადრობის უფლება მოიპოვა 451-მა ადამიანმა, შრომითი ნებართვა კი – 24 პირმა.

პაკისტანიდან სასწავლო ბინადრობის ნებართვა მიიღო 68-მ, შრომითი კი – 129 ადამიანმა.

საუდის არაბეთიდან ამ პერიოდში სასწავლო ბინადრობის ნებართვა სამმა პირმა მიიღო, შრომითი – 17-მა, მუდმივი საინვესტიციო ნებართვა კი – ორმა.

სირიიდან სასწავლო ბინადრობის უფლება მოიპოვა 262-მა პირმა, შრომითი – 28-მ და მუდმივი საინვესტიციო ცხოვრების უფლება – ექვსმა პირმა.

სასწავლო ბინადრობის უფლება აქვს სომალიდან 19 ადამიანს, სუდანიდან  – 60 პირს, შრი-ლანკადან  -111 პირს.

ჩინეთიდან ამ პერიოდში 178 ადამიანს აქვს მოპოვებული საქართველოში მუდმივი ცხოვრების უფლება, 85 ოჯახის გაერთიანების მიზნით იმყოფება, 2 916 პირი კი შრომითი ბინადრობის უფლებით სარგებლობს.

ამავე პერიოდში საქართველოში მუდმივი ცხოვრების უფლება მოიპოვა 369  უკრაინელმა, 138 უკრაინელი კი ოჯახის გაერთიანების მიზნით ცხოვრობს.

ინფოგრაფიკა: ია ფრანგიშვილი

წინა წლების ანალოგიური მონაცემები შეგიძლიათ იხილოთ აქ:

თურქეთისა და სხვა ქვეყნების მოქალაქეები საქართველოში

მითები და რეალობა „თურქულ უბანზე“

 

გადაბეჭდვის წესი


ასევე: