დღეს, 21 სექტემბერს, საავტორო კინოს ბათუმის საერთაშორისო ფესტივალზე კინოთეატრ „აპოლოში“ შემდეგი ფილმები იქნება ნაჩვენები:
- 12 საათზე: „დროის ხიდები“, რეჟისორი: ოდრიუს სტონისი
„დროის ხიდები“ ლატვიელი რეჟისორების, ოდრიუს სტონისა და ქრისტინა ბრიდეს 2017 წელს გადაღებული ფილმია ბალტიისპირა ქვეყნების დოკუმენტური კინოს ისტორიის შესახებ. ფილმი წელს კარლოვი-ვარის კინოფესტივალზე აჩვენეს.
- 14 საათზე: „წყნარი ქუჩა“, რეჟისორი: ალექსანდა მარკოვა; „მოკლე“, რეჟისორი: რუსლან აღაზადე; „სუპერპრიზი“, რეჟისორი: კონსტანტინე ჭელიძე; „უნდა გიყვარდეს კუბრიკი“, რეჟისორი: ალმა ანდრესკუ; „საკვები მიტანით“, რეჟისორი: იაზან ალ გჰაზავი; „სიტყვა“, რეჟისორი: იგორ ვიშნევსკი.
- 16.30 საათზე: „ვნება და ხმაური დასავლეთ ბერლინში 1979-1989“, რეჟისორები: კლაუს მაეკი, იორგ ჰოპპე, ჰეიკო ლანგე
ფილმი 1980-იანის წლების დასავლეთ ბერლინს გვაჩვენებს. ფილმის მთხრობელი მუსიკოსი და პროდიუსერი მარ რიდერია, რომელიც ინგლისიდან გერმანიაში, ბერლინში ჩავიდა და ქალაქის კულტურული ცხოვრების ეპიცენტრში აღმოჩნდა. ფილმში გამოყენებულ საარქივო მასალაში ნახავთ ნიკ ქეივს, ბლიქსა ბარგელდს და სხვა მუსიკოსებს.
- 18.30 საათზე: „მკვდარი ცხენის ნისლეული“, რეჟისორი: ტარიკ აკტაში
„მკვდარი ცხენის ნისლეული“ სტამბულში მცხოვრები რეჟისორის, ტარიკ აკტაში პირველი სრულმეტრაჟიანი მხატვრული ფილმია, აქამდე იგი ფოტო და ვიდეოხელოვნებითა და მულტიმედიაპროექტებით იყო დაკავებული. გამოცემა variety წერს, რომ ფილმმა საავტორო კინოს მოყვარულებს შესაძლოა ცნობილი თურქი რეჟისორის, ნური ბილგე ჩეილანის გახმაურებული ფილმი – „ერთხელ ანატოლიაში“ გაახსენოს (ეს ფილმი 2011 წელს აჩვენეს ბათუმის კინოფესტივალზე), თუმცა ეს მსგავსება მხოლოდ ზედაპირულია. ფილმი იმ სოფელშია გადაღებული, სადაც რეჟისორი საზაფხულო არდადეგებს ატარებდა ბავშვობაში. რეჟისორმა ამ ფილმისთვის წელს ლოკარნოს კინოფესტივალის ჯილდო მიიღო, როგორც საუკეთესო თანამედროვე რეჟისორმა.
- 20.30 საათზე: „სტიქსი“, რეჟისორი: ვოლფგანგ ფიშერი
გერმანელი რეჟისორის, ვოლფგანგ ფიშერის „სტიქსი“ ამბავია მოგზაურ ქალზე, რომელიც ღია ოკეანეში ემიგრანტების გემს გადააწყდება. ფილმმა წელს ბერლინის კინოფესტივალის სამი ჯილდო მოიპოვა.
- 22.30 საათზე: „ზაფხული“, რეჟისორი: კირილ სერებრენნიკოვი
„ზაფხული“ რეჟისორის უახლესი ფილმია, რომლის პრემიერაც წელს, კანის კინოფესტივალზე გაიმართა. ფილმი გასული საუკუნის 80-იანი წლების ლენინგრადს გვაჩვენებს, როცა ქალაქში პოლიტიკური რეპრესიების ფონზე როკმოძრაობა ძლიერდება.
___________
კინოფესტივალზე დასწრება უფასოა. ჩვენებებზე დასწრებისთვის საჭიროა ე.წ. „უფასო ბილეთი“ (რაც დაჯავშნისა და კონტროლისთვის გამოიყენება), რომლის აღებაც კინოთეატრ „აპოლოს“ BIAFF საინფორმაციო ცენტრშია შესაძლებელი.
ბათუმში კინოფესტივალი 23 სექტემბრამდე გაგრძელდება.
_____________
მთავარ ფოტოზე: კადრი ვოლფგანგ ფიშერის ფილმიდან „სტიქსი“
