აჭარის ფინანსთა და ეკონომიკის ყოფილმა მინისტრმა – დავით ბალაძემ „ალიანსი ჯგუფში“ დაიწყო მუშაობა. ამის შესახებ ყოფილი მინისტრი „ფეისბუქში“ წერს. ის სამედიცინო კომპანია „ევექსის“ თანამშრომლებს დაემშვიდობა, სადაც დავით ბალაძე მინისტრობის შემდეგ ბოლო წელიწად-ნახევარი მუშაობდა.
რა ტიპის ურთიერთობაში იყვნენ აქამდე კომპანია და ყოფილი მინისტრი? – დავით ბალაძე, აჭარის ფინანსთა და ეკონომიკის ყოფილი მინისტრი, ახლა იმ კომპანიაში იმუშავებს, ვის სასარგებლოდაც ორი წლის წინ უკვე იმუშავა, მინისტრობის დროს. 2016 წელს, მინისტრის სავარძლის დატოვებამდე, ბალაძის უწყებამ ბათუმის საკრებულოს ბათუმის ბულვართან ახლოს, რუსთაველის ქუჩაზე მიწის ნაკვეთის კონკრეტული კომპანიისთვის პირდაპირი განკარგვის ფორმით გადაცემა მოსთხოვა.
საკრებულო სამინისტროს მოთხოვნას დათანხმდა. ბათუმის საკრებულოს 2016 წლის 12 ივლისის განკარგულება, რომელსაც საკრებულოს მაშინდელი თავმჯდომარე – ირაკლი ჭეიშვილი აწერს ხელს, ამ სიტყვებით სრულდება:
„ეთხოვოს აჭარის ავტონომიური რესპუბლიკის ფინანსთა და ეკონომიკის სამინისტროს (დ. ბალაძე) უზრუნველყოს წინამდებარე განკარგულების პირველი პუნქტით უსასყიდლოდ საკუთრების უფლებით გადაცემული ქონების საჯარო რეესტრში რეგისტრაცია და გადაცემული უძრავი ქონების მიღებისათვის საჭირო კანონმდებლობით გათვალისწინებული სხვა ღონისძიებების გატარება“.
რა მიმართულებით იქნება დირექტორი ყოფილი მინისტრი კომპანია „ალიანს ჯგუფში?“ – ამ კითხვით „ბათუმელებმა“ „ალიანსი ჯგუფს“ გუშინ, 19 სექტემბერს მიმართა, მაგრამ ორდღიანი ლოდინის მიუხედავად პასუხი ვერ მივიღეთ. კომპანიის კონსულტანტმა საზოგადოებასთან ურთიერთობის საკითხებში, ირაკლი ფარულავამ, თავდაპირველად გვითხრა, რომ შეხვედრაზეა, შემდეგ კი ჩვენი სატელეფონო ზარები და შეტყობინება უპასუხოდ დატოვა. ტელეფონს არც კომპანიის ერთ-ერთმა მესაკუთრემ, გია ბიწაძემ, უპასუხა და არც ყოფილმა მინისტრმა, დავით ბალაძემ. „ალიანსი ჯგუფის“ საქალაქო ტელეფონის ნომერზე დღეს [20 სექტემბერი] ინფორმაციის დაზუსტებას დაგვპირდნენ, თუმცა შემდეგ გვითხრეს, რომ ამ საკითხებზე კომენტარი ირაკლი ფარულავამ უნდა გააკეთოს, რომელიც ახლა შვებულებაშია. „როცა ვნახავთ, გადავცემ თქვენს კითხვას,“ – გვითხრა „ალიანსი ჯგუფის“ ოპერატორმა.
კომპანიას ჯერ არ დაუსრულებია პროექტი, რისთვისაც 2016 წელს აჭარის ფინანსთა სამინისტროსგან ბათუმში, რუსთაველის ქუჩაზე, მიიღო მიწის ნაკვეთი [სულ 3263 კვ.მეტრი]. ეს ნაკვეთი სამინისტრომ 978 900 აშშ დოლარად მიყიდა კომპანია „ეიბიეს ფრივილიჯ ქლაბ რიზორთსის“ 100-ნომრიანი სასტუმროს აშენების პირობით. კომპანიას თანხა ბიუჯეტში 6 თვის განმავლობაში უნდა ჩაერიცხა.
საჯარო რეესტრის მონაცემებით, ამჟამად მიწის ნაკვეთი რუსთაველის 42-სა და ნინოშვილის 39-ში კომპანია „ალიანსი ფრივილიჯს“ ეკუთვნის. ზუსტად ამ ტერიტორიაზე უნდა აეშენებინა კომპანიას „ეიბიეს ფრივილიჯ ქლაბ რიზორთსის“ 100-ნომრიანი სასტუმრო. ამ კომპანიის დამფუძნებელი და 100% წილის მესაკუთრე იყო აკაკი სონგულია.
მოგვიანებით კომპანიის საფირმო სახელწოდება შეიცვალა – „ალიანსი ფრივილიჯით“. რეესტრის ბოლო ამონაწერის მიხედვით, კომპანიაში აკაკი სონგულია უკვე წილის 13%-ს ფლობს. ის ამ კომპანიის გენერალური დირექტორიცაა. კომპანიის დანარჩენ წილებს ფლობენ: თემურ ბიწაძე, ავთანდილ გორგილაძე და ბესიკ ჟღენტი.
კომპანია „ალიანს ჯგუფის“ ინტერნეტგვერდის მიხედვით, „ალიანსი ფრივილიჯი“ ახალი და ექსკლუზიური პროექტია „ალიანს ჯგუფისგან“ და „ალიანს ფრივილიჯში“ კომპანიის პარტნიორი მსოფლიოში ცნობილი სასტუმროების ბრენდი – მარიოტ ინტერნეიშენალია.
54-სართულიანი სასტუმრო კომპლექსის მშენებლობა რუსთაველის ქუჩაზე, დელფინარიუმის წინ, 2020 წელს უნდა დასრულდეს. აკაკი სონგულიას თქმით, 160-ნომრიანი სასტუმრო „მერიოტი“ 2021 წელს გაიხსნება. კომპანია პროექტში 80 მილიონი აშშ დოლარის ინვესტიციის განხორციელებას აპირებს.
ოპოზიცია ამ დრომდე ხშირად აპროტესტებდა იმას, რომ სასტუმროს მშენებლობა ნებართვის გარეშე დაიწყო. „მშენებლობის ნებართვა გაცემულია,“ – გვითხრეს ბათუმის მერიის პრესსამსახურში.
ამ თემაზე:
ბულვართან 54-სართულიანი კომპლექსი აშენდება – კომპანიაში კომენტარს არ აკეთებენ
