განათლება,მთავარი,სიახლეები

ბათუმის მეოთხე საჯარო სკოლაში მოსწავლეებს სომხურ ენასაც შეასწავლიან

19.09.2018 • 18234
ბათუმის მეოთხე საჯარო სკოლაში მოსწავლეებს სომხურ ენასაც შეასწავლიან

ბათუმის მე-4 საჯარო სკოლის პირველ კლასში ეროვნებით შვიდი სომეხი მოსწავლე მიიღეს. როგორც სკოლის დირექტორი მანანა თავართქილაძე გვეუბნება, პირველკლასელები ქართულ სექტორში ისწავლიან, თუმცა სკოლა აპირებს მოსწავლეებს დამატებითი საგანმანათლებლო მომსახურებაც გაუწიოს – ასწავლოს სომხური ენა.

„25-ბავშვიანი კლასია, სადაც ეროვნებით 7 სომეხი მოსწავლე გვყავს. მშობლებმა დაწერეს განცხადება დამატებითი საგანმანათლებლო მომსახურების შესახებ და გვთხოვეს, რომ სომეხი ეროვნების ბავშვებისთვის მშობლიური ენაც გვესწავლებინა. სკოლას ამის რესურსი აქვს, შეუძლია აიყვანოს სომხური ენის პედაგოგი“, – გვეუბნება დირექტორი.

მისი თქმით, დამატებითი მომსახურების შესახებ გადაწყვეტილება განათლების სამინისტროსთან უნდა შეათანხმონ.

ბათუმში ბოლო ოთხი წელია არ არსებობს არც ერთი სკოლა, სადაც სომეხი ეროვნების ბავშვები შეძლებენ მშობლიური ენის შესწავლას. სომხური ენის შემსწავლელი კურსები არსებობს სომხურ სამოციქულო ეკლესიასთან. სომეხი ეროვნების ბავშვები  ძირითადად რუსულ სკოლებში სწავლობენ.

 

გადაბეჭდვის წესი


ასევე: