რატომ დატოვა სამინისტრომ საჯარო სკოლის მასწავლებლები ბეჭდური სახელმძღვანელოების გარეშე

ბათუმის მე-2 საჯარო სკოლის ინგლისური ენის მასწავლებელი, ტრენერი, ქეთი პაპავა „ბათუმელებთან“ ამბობს, რომ ახალი გრიფირებული სახელმძღვანელოები სკოლებში პედაგოგებისთვის დამხმარე ბეჭდური რესურსის გარეშე შევიდა. მისი თქმით, წინა გრიფირების დროს სახელმწიფომ გამომცემლობებს სატენდერო პირობებში ჩაუდო მოთხოვნა, რომ მასწავლებლისთვის დამხმარე ბეჭდური რესურსები მიეწოდებინათ, ახალი ტენდერი კი ამას არ ითვალისწინებდა.

„მე, როგორც პედაგოგს, გაკვეთილზე აუცილებლად მჭირდება მასწავლებლის წიგნი, მოსწავლის წიგნი და რვეული, რომელსაც წინა წლებში გვაწვდიდნენ, წელს კი ეს რესურსი არ მოგვაწოდეს.

გარდა ამისა, წინა სახელმძღვანელოებს თან ახლდა აუდიოდისკები, ტესტური სამუშაოებისთვის რესურსი, რომელიც ახლა არ მოგვეწოდა. ახალი სახელმძღვანელოები ითხოვს თვალსაჩინოებას, რომელიც ასევე არ შემოსულა სკოლებში. თუ ჩვენ გვინდა ნორმალური სასწავლო პროცესი, ყველა ეს ბეჭდური რესურსი პედაგოგებს უნდა მოგვაწოდონ“.

ქეთი პაპავას თქმით, აღნიშნული რესურსების ნაწილი ელექტრონულად არსებობს, თუმცა ის ყველა პედაგოგისთვის ალბათ თანაბრად ხელმისაწვდომი ვერ იქნება.

„პირველიდან მეექვსე კლასის ჩათვლით ვასწავლი უცხო ენას, წარმოიდგინეთ, ყველა ეს ბეჭდური რესურსი რაზეც ვისაუბრე, უნდა შევიძინო საკუთარი სახსრებით, რომელიც სულ ცოტა, 200 ლარი მაინც დამიჯდება“.

პედაგოგის თქმით, სკოლებს არ აქვთ იმის ფინანსური შესაძლებლობა, რომ ყველა მასწავლებელს ამოუბეჭდოს და მიაწოდოს ბეჭდური სასწავლო რესურსები. „ვფიქრობ, ეს სამინისტროს უნდა გაეთვალისწინებინა და უზრუნველეყო პედაგოგები მასწავლებლის, მოსწავლის წიგნითა და რვეულით, რომელიც არის მნიშვნელოვანი საგაკვეთილო პროცესში,, – ამბობს ქეთი პაპავა.

მე-16 საჯარო სკოლის ქიმიის პედაგოგი, ტრენერი ია კუპრაძეც მიიჩნევს, რომ პედაგოგისთვის ბეჭდური სასწავლო რესურსი მნიშვნელოვანია.

„მე ნაკლებად ვიყენებ ბეჭდურ რესურს, რადგან ტრენერი ვარ მეთოდოლოგიაში და თვითონ ვმუშაობ ახალ მეთოდებზე, მაგრამ პედაგოგების საკმაოდ დიდ ნაწილს ნამდვილად სჭირდება ბეჭდური რესურსი“.

„ბათუმელები“ ბაკურ სულაკაურის გამომცემლობას დაუკავშირდა, რომლის სახელმძღვანელოებიც სკოლების დიდმა ნაწილმა აირჩია.

გამომცემლობის წარმომადგენელი თათა ჩხაიძე ამბობს, რომ მათ საჯარო სკოლის პედაგოგებისთვის ბეჭდური დამხმარე რესურსების უსასყიდლოდ მიწოდების უფლება არ აქვთ.

„განათლების სამინისტროს მოთხოვნა იყო ასეთი, რომ ყველა რესურსი ყოფილიყო ელექტრონულად და განთავსებულიყო ჩვენს ვებგერდზე“.

თათა ჩხაიძის თქმით, გამომცემლობა დამხმარე ბეჭდურ რესურს მხოლოდ იმ კერძო სკოლებს აწვდის, რომლებმაც მათი სახელმძღვანელოები აირჩიეს.

„ჩვენს სახელმძღვანელოებს მოჰყვება მასწავლებლის წიგნი, რომელშიც დეტალურად არის გაწერილი ყველა გაკვეთილის სცენარი, ასევე, მოსწავლის წიგნი და რვეული.

ეს ყველაფერი არსებობს ელექტრონული სახითაც, თუმცა ბეჭდური სახით მხოლოდ კერძო სკოლის პედაგოგებს ვაწვდით“.

თათას თქმით, ელექტრონულად არსებობს აუდიოფაილები, მასწავლებლის წიგნს პირველ კლასში მოჰყვება worksheet-ი (კითხვები და სავარჯიშოები), რომელიც შეუძლია მასწავლებელმა ამობეჭდოს და გამოიყენოს გაკვეთილზე.

„გარდა ამისა, არის „ფლეშ ქარდი“ (flash card) და დაახლოებით 13 პოსტერი ელექტრონულად, რომელიც ჯერ არ დაბეჭდილა, მაგრამ ვებგვერდზე იტვირთება და, სავარაუდოდ, დაიბეჭდება კიდეც“. როგორც თათა გვეუბნება, იგივე სიტუაციაა ბუნებაში, ხელოვნებაში და ა.შ.

თათა ჩხაიძის თქმით, მოსწავლის წიგნი და მოსწავლის სამუშაო რვეული, ზოგ შემთხვევაში, გაყოფილია ორ ნაწილად და თითოეული კომპონენტი 6-დან 9 ლარი ღირს.

„ვინაიდან საჯარო სკოლის მასწავლებლებს სამინისტრო არ ურიგებს ამ წიგნებს, ჩვენს ვებგვერდზე  ყველა ეს რესურსი ელექტრონულად გვიდევს. მაგრამ პედაგოგს მხოლოდ მასწავლებლის წიგნის ჩამოტვირთვა შეუძლია, სხვა რესურსებით კი ონლაინ უნდა ისარგებლოს“.

თათა ჩხაიძის თქმით, გამომცემლობა საჯარო სკოლებს ვერც თვალსაჩინოებებს მიაწვდის უსასყიდლოდ. „სამწუხაროდ, ეს იყო სამინისტროს გადაწყვეტილება, ამიტომ ვერ ვურიგებთ  ბეჭდურ ეგზემპლარებს“. მისი თქმით, სამინისტრომ იგივე პირობები ჩაუდო სხვა გამომცემლობებსაც სატენდერო პირობებში.

ბათუმის პირველი საჯარო სკოლის დირექტორი ნატალია მგელაძე ამბობს, რომ მის სკოლაში არის იმის ფინანსური რესურსი, რომ საჭიროების შემთხვევაში პედაგოგს ელექტრონული რესურსი ამოუბეჭდონ. „მასწავლებელს ვერ დავავალდებულებ, რომ ყველა კლასში ბეჭდური რესურსი შეიძინოს. თუმცა ელექტრონულად ყველა საჭირო მასალა ხელმისაწვდომია და შეუძლიათ გამოიყენონ,“ – გვეუბნება ის.

მე-10 საჯარო სკოლის დირექტორი დათო ეცადეიშვილი ამბობს, რომ პედაგოგებისთვის სკოლაში არანაირი ბეჭდური რესურსი ამ დროისთვის არ არის შესული. „თუმცა, ვისაც დასჭირდება, ელექტრონული რესურსი უნდა გამოიყენოს“.

 

 

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com