ენმ: პროკურატურა კონკრეტულ დანაშაულებზე გამოძიებას არ იწყებს

„პროკურატურა კონკრეტულ დანაშაულებზე გამოძიებას არ იწყებს. აჭარის მთავარი პროკურორი მაღალჩინოსნებს ხელს აფარებს,“ – აცხადებს რეზო ხარაზი, „ერთიანი ნაციონალური მოძრაობის“ წევრი. მან დღეს ბრიფინგი გამართა და პროკურატურას კონკრეტულ საქმეებზე გამოძიების დაწყების შესახებ ინფორმაციის მიწოდება მოსთხოვა.

რეზო ხარაზის თქმით, ბოლო პერიოდში „ნაციონალურმა მოძრაობამ“ პროკურატურას სხვადასხვა საქმის შესახებ დოკუმენტები მიაწოდა, რადგან იკვეთებოდა სისხლის სამართლის დანაშაულის ნიშნები.

„ეს ეხებოდა, მაგალითად, ქობულეთში სტადიონის მშენებლობას; მაგისტრალზე, გვირაბთან გზის მშენებლობის შეჩერებას; სასაფლაოების მოწყობის პროექტს, ანგისის სტადიონს, რომელიც გახსნიდან ერთ კვირაში დაიხურა… არც ერთ საქმეზე პროკურატურას ინფორმაცია არ მოუწოდებია, დაიწყო თუ არა გამოძიება.

პროკურატურის ერთ-ერთმა მაღალჩინოსანმა გუშინ პირად საუბარში გვითხრა, რომ არც ერთ საქმეზე, რაც ჩამოგითვალეთ, გამოძიება არ დაიწყება,“ – ამბობს რეზო ხარაზი.

პროკურატურას ამ თემაზე კომენტარი ამ დრომდე არ გაუკეთებია.

ნეტგაზეთის მასალების სხვა გამოცემებში გადაბეჭდვის წესი


ავტორი