ბათუმში, მწვანე კონცხის პლაჟი, ერთ-ერთი გამორჩეული ადგილია როგორც ადგილობრივებისთვის, ისე ტურისტებისთვის. პლაჟზე, ერთ-ერთი ცენტრალური გასასვლელის წინ კი, გუბე დგას, რომელიც თითქმის დაჭაობებულია. აქ წყალი პლაჟზე, მწვანე კონცხის დასახლებიდან გამომავალი მილიდან ღიად მოედინება. წყალზე გადასასვლელად კი სახელდახელო „ხიდია“ მოწყობილი.
პლაჟის ოფიციალური მესაკუთრე საჯარო რეესტრში დაფიქსირებული არაა, თუმცა ის ბათუმის მუნიციპალიტეტს ეკუთვნის. პლაჟს ბიძინა ივანიშვილის კომპანია „ბიზნეს დეველოპმენტი“ 49 წლის ვადით უსასყიდლოდ ითხოვდა.
ბათუმის საკრებულომ გასული წლის სექტემბერში მხარი დაუჭირა მუნიციპალიტეტის გარკვეული ქონების აჭარის მთავრობისთვის გადაცემას. ამ ქონებაში შედიოდა „ბიზნეს დეველოპმენტზე“, გადასაცემი მწვანე კონცხზე მდებარე 6 346 კვ.მ პლაჟიც, პირობებში კი პლაჟის დასუფთავება, მოვლა-პატრონობა და კეთილმოწყობა შედიოდა.
„პლაჟი იჯარით აღარ გადაგვიცია. პროცესი შეჩერდა. ბოლო დროს კომპანიის მიერ მოთხოვნა აღარ იყო“ – უთხრეს „ბათუმელებს“ აჭარის ფინანსთა და ეკონომიკის სამინისტროში.
კომპანია „ბიზნეს დველოპმენტს“ მწვანე კონცხზე მრავალფუნქციური ტურისტული კომპლექსის მშენებლობა უკვე დაწყებული აქვს, 2017 წლის თებერვალში კომპანიამ ყოფილი აგრარული უნივერსიტეტისა და საერთო საცხოვრებლის შენობები [3239,62 კვ.მ და 4912,07 კვ.მ] ასევე, მათზე დამაგრებული 13 640 კვ.მ მიწის ნაკვეთი, აჭარის ფინანსთა და ეკონომიკის სამინისტროს მიერ გამოცხადებულ აუქციონზე 4 600 000 ლარად შეიძინა.
მწვანე კონცხის პლაჟი / 25.08.2018 / მილიდან შემომავალი წყალი პლაჟზე
„ჭაობი“ მწვანე კონცხის პლაჟზე / 25.08.2018 /
„ხიდი“ მწვანე კონცხის პლაჟზე / 25.08.2018 /
მწვანე კონცხის პლაჟი / 25.08.2018 /
მწვანე კონცხი, პლაჟზე ჩასასვლელი / 25.08.2018 /
ყოფილი საბაგირო გზის ჩასასხდომი ქვედა სადგური მწვანე კონცხის პლაჟთან / 25.08.2018 /
