ბათუმში გარევაჭრობისა და ხმის დონის დამრღვევებს ადგილზე დააჯარიმებენ

დღეიდან, პირველი აგვისტოდან, ბათუმის მერიის მუნიციპალური სერვისების სააგენტოს თანამშრომლებს უფლება აქვთ, სამართალდამრღვევვები დააჯარიმონ და ადგილზევე შეადგინონ ადმინისტრაციული სამართალდარღვევის ოქმები.

აქამდე ეს ფუნქცია, როგორც მერიაში ამბობენ, მხოლოდ მერიის ზედამხედველობის სამსახურს ჰქონდა, სადაც მონიტორინგის კუთხით სამი თანამშრომელი მუშაობს. მუნიციპალური სერვისების სააგენტოში კი, ამ მიმართულებით 44 თანამშრომელია დასაქმებული.

სერვისების სააგენტოს ინფორმაციით, მუნიციპალური ქონების აღრიცხვის, ინვენტარიზაციისა და მონიტორინგის 28 და ხმის დონის მონიტორინგის 16 თანამშრომელი ქალაქში 24-საათიან რეჟიმში ჩაატარებს რეიდებს.

ქონების აღრიცხვის, ინვენტარიზაციისა და მონიტორინგის 28 თანამშრომელი ქალაქში ძირითადად უკანონო გარევაჭრობასა და კაფე-ბარებისა თუ სხვა სავაჭრო ობიექტების მიერ უკანონოდ გადაკეტილ ტროტუარებს გაუწევენ მონიტორინგს.

მერიამ მათთვის სპეციალური უნიფორმებიც შეკერა. სააგენტოში აცხადებენ, რომ ფორმების შემოღების მიზანია, მოქალაქეებმა მონიტორინგის თანამშრომლები ამოიცნონ და დარღვევის აღმოჩენის შემთხვევაში ადვილად დაუკავშირდნენ მათ. სააგენტოს ინფორმაციით, ეს თანამშრომლები მერიაში რეორგანიზაციამდეც მუშაობდნენ სხვადასხვა სამსახურში.

სააგენტოს ინფორმაციით, ივლისის თვეში ხმის დონის დარღვევისთვის ქალაქის მასშტაბით 100-მდე პირი გააფრთხილეს და 28 დააჯარიმეს. ჯარიმა ფიზიკურ პირზე   150, იურიდიულ პირზე კი  500 ლარია. განმეორების შემთხვევაში, შესაბამისად – 300 და 1 000 ლარი.

საზოგადოებრივი ადგილების [ტროტუარი და სხვა] სარგებლობის თვითნებური შეზღუდვის შემთხვევაში ფიზიკური პირი – 500, იურიდიული პირი კი, 2 000 ლარით დაჯარიმდება. პირველად დაჯარიმებიდან 20 დღეში დარღვევის გამოუსწორებლობის შემთხვევაში, ფიზიკური პირი დაჯარიმდება 3 000 ლარით, ხოლო იურიდიული პირი – 4 000 ლარით.

______________________________________

მთავარი ფოტო: მონიტორინგის თანამშრომლები ბათუმის მერიასთან / მუნიციპალური სერვისების სააგენტოს ფოტო
ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com