აჭარის განახლებული მთავრობის პირველი სხდომა გაიმართა

ხულოში ახალი პროფესიული სასწავლებელი გაიხსნება – ამის შესახებ აჭარის ავტონომიური რესპუბლიკის მთავრობის თავმჯდომარემ თორნიკე რიჟვაძემ განაცხადა.

„განათლება და მაღალმთიანი აჭარა ეს არის ორი მთავარი განცხადებული პრიორიტეტი ჩემს სამთავრობო ხედვაში და ამ ნაწილში პროფესიული სასწავლებელი ხელს შეუწყობს როგორც განათლების ხელმისაწვდომობას, ისე იმ მიმდინარე პროექტებში ჩვენი ახალგაზრდების ჩართულობას, რაც მაღალმთიან აჭარაში ხორციელდება“ – აღნიშნა თორნიკე რიჟვაძემ მთავრობის სხდომაზე.

მთავრობის სხდომა

მთავრობის სხდომა

მისი თქმით, პროფესიული სასწავლებელი საშუალებას მისცემს მაღალმთიან აჭარაში მცხოვრებ ახალგაზრდებს ადგილზე დაეუფლონ სხვადასხვა პროფესიას და თავიანთი წვლილი შეიტანონ მომავალში მაღალმთიანეთში ტურიზმის განვითარების საქმეში.

ხულოს პროფესიული სასწავლებელი ქობულეთის საზოგადოებრივი კოლეჯის „ახალი ტალღის“ ფილიალი იქნება.

აჭარის მთავრობის თავმჯდომარემ თორნიკე რიჟვაძემ მთავრობის დღევანდელ სხდომაზე ეკონომიკური პოლიტიკის შესახებაც ისაუბრა. მისი თქმით, ეკონომიკური შედეგები, რაც რეგიონში მიიღწევა, აჭარის თითოეულ მკვიდრზე უნდა აისახოს. თორნიკე რიჟვაძემ ასევე აღნიშნა, რომ საგადასახადო შეღავათები აუცილებლად იქნება მიმართული აჭარისა და ბათუმის მეტი პოპულარიზაციისკენ და ხელს შეუწყობს დასაქმებას.

„ეკონომიკური განვითარების ხაზი რა თქმა უნდა გადის ინკლუზიურ ეკონომიკურ ზრდაზე და ეს გულისხმობს აჭარის თითოეულმა მკვიდრმა თავის თავზე იგრძნოს ის ეკონომიკური შედეგები, რაც ჩვენს ქვეყანაში მიიღწევა. ამისთვის კი ჩვენ გვაქვს კონკრეტული ეკონომიკური ინიციატივები, როგორც ტურიზმის, ასევე ეკონომიკის მიმართულებით, ასევე მომიჯნავე სექტორებში. შესაბამისად, ჩვენ ამ კონკრეტული ინიციატივებით ძალიან მალე შევძლებთ ჩვენი საქმიანობის და ეკონომიკური პოლიტიკის გატარების შედეგები თითოეულმა ჩვენგანმა იგრძნოს.

საგადასახადო შეღავათები მიმართული იქნება აჭარისა და ბათუმის მეტი პოპულარიზაციისკენ. როგორც კორპორატიული, ასევე წარმომადგენლობითი ოფისებისთვის შეიქმნება კონკრეტული საგადასახადო ინიციატივები, რომელიც ჩვენს რეგიონს მოუტანს როგორც ახალ წარმომადგენლობით ოფისებს, ასევე ხელს შეუწყობს დასაქმებას”- აღნიშნა აჭარის მთავრობის თავმჯდომარემ.

აჭარის მთავრობის თავმჯდომარემ ისაუბრა ასევე ტურიზმის ელჩის ინიციატივის შესახებ.

„ჩვენ სამიზნე ქვეყნებში გვეყოლება ტურიზმის ელჩები, რომელიც დაგვეხმარებიან მარკეტინგული თუ სხვა ტიპის აქტივობების განხორციელებაში, რადგან მეტ ადამიანს ჰქონდეს ინფორმაცია ჩვენს შესახებ. უახლოეს პერიოდში გვექნება პრეზენტაცია აღნიშნული პროექტის. ეს ასევე იქნება სახელმწიფოსა და კერძო სექტორს შორის თანამშრომლობის მოდელი, რომელიც საბოლოო ჯამში გამოიწვევს ტურიზმის სექტორის კიდევ უფრო განვითარებას და მოიზიდავს კიდევ უფრო მეტ ტურისტს აჭარაში. ელჩების სტატუსს შევთავაზებთ როგორც საქართველოს, ასევე ყველა ჩვენს უცხოელ მეგობარს, რომლებიც დაინტერესებული არიან აჭარის, ბათუმის პოპულარიზაციით. განსაკუთრებით იმ ადამიანებს, რომლებსაც აქვთ წვდომა იმ ტურისტულ სეგმენტებზე, რომელიც ჩვენი რეგიონისთვის მნიშვნელოვანია. იმ ადამიანების კონკრეტული სახელები და გვარები, რომლებიც ამ სტატუსით ისარგებლებენ, თქვენთვის მალე გახდება ცნობილი. “ – განაცხადა თორნიკე რიჟვაძემ.

თორნიკე რიჟვაძე

თორნიკე რიჟვაძე

დღეს აჭარის ავტონომიური რესპუბლიკის მთავრობის თავმჯდომარის თორნიკე რიჟვაძის ხელმძღვანელობით მთავრობის სხდომა გაიმართა. მინისტრთა კაბინეტმა დღის წესრიგით გათვალისწინებული 3 საკითხი განიხილა.

აჭარის ა.რ. მთავრობამ განიხილა განკარგულების პროექტი, რომელიც ითვალისწინებს აჭარის ავტონომიური რესპუბლიკის 2018 წლის რესპუბლიკური ბიუჯეტის ორი კვარტლის შესრულების მიმოხილვის აჭარის ავტონომიური რესპუბლიკის უმაღლეს საბჭოსთვის წარდგენას.  ორი კვარტლის შესრულების ანგარიში აჭარის ფინანსთა და ეკონომიკის მინისტრმა ჯაბა ფუტკარაძემ წარადგინა.

აჭარის ა.რ. მთავრობამ დღესვე მიიღო გადაწყვეტილება „სსიპ – ინფორმაციული ტექნოლოგიების სამსახურის შექმნისა და დებულების დამტკიცების შესახებ“ აჭარის ავტონომიური რესპუბლიკის მთავრობის 2017 წლის 17 მაისის N12 დადგენილების ძალადაკარგულად გამოცხადების თაობაზე. როგორც აჭარის ფინანსთა და ეკონომიკის მინისტრმა ჯაბა ფუტკარაძემ განმარტა,  საჯარო სამართლის იურიდიული პირის – ინფორმაციული ტექნოლოგიების სამსახურის რეალურად ამოქმედება მოცემულ ეტაპზე არ იქნა მიჩნეული მიზანშეწონილად, რადგან, როგორც დაწესებულების შენახვისათვის საჭირო საბიუჯეტო ხარჯების დამატებითმა გათვლებმა ცხადყო, მოცემულ ეტაპზე მსგავსი ტიპის დაწესებულების უპირობოდ შექმნისა და ფუნქციონირების არანაირი აუცილებლობა არ არსებობს.

აჭარის ა.რ. მთავრობის სხდომაზე მიიღეს ასევე განკარგულება აჭარის ავტონომიური რესპუბლიკის მთავრობის მიერ შექმნილი 6 საჯარო სამართლის იურიდიული პირის ხელმძღვანელთა ვაკანტურ თანამდებობაზე საჯარო კონკურსის გამოცხადების შესახებ.

ნეტგაზეთის მასალების სხვა გამოცემებში გადაბეჭდვის წესი


ავტორი