ულტრაბგერა და მისი როლი ორსულობის დროს

დღეს სამედიცინო დიაგნოსტიკის შესაძლებლობები პრაქტიკულად უსაზღვროა. ადრეული დიაგნოსტიკის მნიშვნელობა ერთიორად იმატებს, როდესაც საქმე ნაყოფის ჯანმრთელობას ეხება. ორსულთა პატრონაჟის სწორად წარმართვაში უდიდეს როლს ასრულებს ექოსკოპიური კვლევა. ამ მეთოდის უპირატესობას ერთიორად ზრდის მისი უსაფრთხოება.

 

დღეს ორსულობა ულტრაბგერითი კვლევის გარეშე წარმოუდგენელია. თითქმის ყველამ იცის, რომ ორსულობის მე-12 კვირიდან ექოსკოპიურად შესაძლებელია ნაყოფის სქესის დადგენა, ბევრიც საგულდაგულოდ ინახავს ჯერ კიდევ მუცლად მყოფი შვილის სურათს… მაგრამ ულტრასონოგრაფიის შესაძლებლობები ამით როდი ამოიწურება.

რა ინფორმაციას გვაწვდის ექოსკოპიური კვლევა, ნამდვილად უსაფრთხოა თუ არა და რამდენჯერ უნდა ჩაიტაროს ის ორსულმა?

ექიმი-რადიოლოგი თამუნა გოგიტიძის რჩევები:

ქალების უმრავლესობა ორსულობის დიაგნოსტიკისთვის ექსპრესტესტს მიმართავს, მაგრამ ორსულობის ამ გზით დადგენის შემდეგ მისი ექოსკოპიურად დადასტურებაც აუცილებელია.

ექიმი-რადიოლოგი თამუნა გოგიტიძე

ექიმი-რადიოლოგი თამუნა გოგიტიძე

ულტრაბგერითი კვლევით საშვილოსნოს ღრუს ორსულობისას სანაყოფე პარკის დანახვა მეხუთე კვირიდან არის შესაძლებელი, ტრანსვაგინალური (საშოსმხრივი) მიდგომით კი მისი ვიზუალიზაცია ხდება მეოთხე კვირიდანაც, როდესაც სანაყოფე პარკის დიამეტრი სულ 2-3 მმ-ია. მართალია, ამ ვადებზე ორსულობის დიაგნოსტიკა ტესტითაც შეიძლება, მაგრამ შარდით ექსპრესდიაგნოსტიკა ვერ გვაწვდის ინფორმაციას სანაყოფე პარკის ადგილმდებარეობაზე (საშვილოსნოს ღრუშია თუ მის გარეთ), თანაც პასუხი ყოველთვის არ არის სწორი, ამიტომ ორსულობის ექოსკოპიურად დადასტურება აუცილებელია.

სამწუხაროა, მაგრამ ფაქტია, რომ ყველა ორსულობა არ მთავრდება ჯანმრთელი ახალშობილის დაბადებით. ნაყოფის განვითარების ადრეულ ეტაპზე დაახლოებით 6% შემთხვევაში ვლინდება რომელიმე სინდრომის ულტრაბგერითი ნიშნები.

პირველი ეტაპი, რომელმაც შეიძლება გამოავლინოს ან უარყოს ნაყოფის განვითარების მანკების არსებობა ულტრაბგერითი კვლევაა. ულტრაბგერით კვლევებში არსებობს ე.წ. ულტრაბგერითი მარკერები. ამ მარკერებს წარმოადგენს ის ხილული ანატომიური ცვლილებები, რომელთანაც დაკავშირებულია ესა თუ ის სინდრომი ან განვითარების მანკი. უამრავი მასალა დაგროვდა ულტრაბგერით გამოკვლევებში, როგორც ფოტო ისე ვიდეომასალის სახით, რომლებზეც ასახულია ყველა აშკარა და ირიბი ნიშნები ამა თუ იმ მანკების შესახებ.

სინდრომების დიაგნოსტიკა, მისი ნორმიდან გადახრის გამოვლენა შესაძლებელია ორსულობის 11-დან მე-14 კვირის ჩათვლით, სწორედ ეს ვადაა მიჩნეული პირველ სკრინინგულ კვლევად ამ პათოლოგიების გამოსავლენად.

საბოლოო არბიტრს კი წარმოადგენს ამნიოცენტეზით ან ქორიონის ბიოფსიით მიღებული მასალის გენეტიკური კვლევა.

ნეტგაზეთის მასალების სხვა გამოცემებში გადაბეჭდვის წესი


ავტორი