მითი და რეალობა ქიმიოთერაპიის შესახებ

სიმსივნურ დაავადებებთან და მათ მკურნალობასთან დაკავშირებით ბევრი სტერეოტიპი არსებობს. რა არის რეალობა? – ამის შესახებ თამარ კონცელიძე საუბრობს, კლინიკური ონკოლოგი და ქიმიოთერაპევტი, რომელსაც 9-წლიანი გამოცდილება აქვს ონკოლოგიურ ქირურგიაში და არა ერთი ონკოლოგიური კლინიკური კვლევის მონაწილეა.

„კლინიკა „ნიუ პლაზმაში“ 2017 წლიდან ვმუშაობ. კლინიკა ონკოლოგიურ დაავადებათა მკურნალობის საჭიროების მქონე პაციენტებზეა ორიენტირებული. ჩვენი მიზანი ადამიანებისთვის მაღალი სამედიცინო მომსახურების მიწოდება, კომფორტის შექმნა და მათი ინფორმირებაა, რადგან ხშირად ისინი არასწორი ინფორმაციის მსხვერპლი ხდებიან.

თამარ კონცელიძე - ონკოქირურგი-მამოლოგი

თამარ კონცელიძე – ონკოქირურგი, მამოლოგი

კიბო საკმაოდ მძიმე თემაა სასაუბროდ, თუმცა დაავადებაზე ღია დისკუსიას, შედეგად ინფორმირებული საზოგადოება მოჰყვება.

დაავადების შესახებ ინფორმაციის ნაკლებობის გამო ადამიანებს ხშირად მცდარი წარმოდგენები აქვთ. როდესაც ამ მოსაზრებებს თავიანთ მეგობრებს, ახლობლებს და საზოგადოების წევრებს უზიარებენ, ამით ხელს უწყობენ არასწორი ინფორმაციის გავრცელებას და სტერეოტიპების დამკვიდრებას.

21-ე საუკუნეში, როცა მიღებული ინფორმაციის სიზუსტის გადამოწმება წამებშია შესაძლებელი, ადამიანებს აღარ უნდა ეშინოდეთ ონკოლოგიური დაავადებების.

„უხსენებელი“, „ცუდი დაავადება“ – ეს არის ტერმინები, რომლითაც კიბოს მოიხსენიებენ. წლების მანძილზე კიბოს დიაგნოზი ნიშნავდა სიკვდილს. თუმცა დღეს საქართველოში დაავადებულებს შესაძლებლობა აქვთ მიიღონ მაღალი ხარისხის, თითოეულ პაციენტზე ინდივიდუალურად მორგებული მკურნალობის პროგრამა. ახალი თაობის მედიკამენტები შანს აძლევს პაციენტს, დადებითი შედეგი მიიღოს.

სტიგმის, სტერეოტიპების და შიშის მიუხედავად, არსებობენ ადამიანები, რომლებმაც პირველებმა დაძლიეს ეს სირთულეები და თამამად დაიწყეს კიბოს შესახებ საუბარი. ისინი აღარ ერიდებიან მოყვნენ, თუ როგორ მოახერხეს სხვადასხვა სტადიაზე მყოფი დაავადებებისგან გათავისუფლება, როგორ იბრძოდნენ სიცოცხლისათვის და როგორ გაიმარჯვეს ამ ბრძოლაში.

თამარ კონცელიძე

თამარ კონცელიძე

საზოგადოების დიდი ნაწილი აღნიშნული დაავადებების შესახებ ინფორმაციის ნაკლებობიდან გამომდინარე ამჯობინებს მის იგნორირებას და ბედთან შეგუებას. ეს კი დიდი შეცდომაა, ვინაიდან ადრეული გამოვლენის შემთხვევაში, კიბოსგან განკურნება, ხოლო ჯანსაღი ქცევებით მისი განვითარების თავიდან არიდებაა შესაძლებელი.

მითი: კიბო კლავსსიმსივნის დიაგნოზი ნიშნავს სიკვდილს

  • რეალობა: კიბოს სახეობათა უმრავლესობა, რომელიც ადრე უკურნებლად ითვლებოდა, დღეს მკურნალობას ექვემდებარება. ადრეულ სტადიაზე აღმოჩენის დროს, შესაძლებელია თითქმის ყველა ადამიანი განიკურნოს სრულად კიბოსგან.

კიბოს განვითარების რისკ-ფაქტორებისა და პრევენციის უკეთ გაგებამ, ადრეულმა გამოვლენამ და მკურნალობის სფეროში მიღწევებმა, რევოლუციურად შეცვალა და გააუმჯობესა კიბოს მართვა და გამოსავალი.

ადრეულ სტადიაზე გამოვლენილი კიბო გაცილებით მეტად იკურნება და იშვიათად მთავრდება სიკვდილით, ვიდრე გვიან აღმოჩენილი.

მითი: კიბოს სიმპტომებით ვერ მიხვდები

  • რეალობა : კიბოს თითქმის ყველანაირი სიმპტომი შეიძლება ახლავდეს თან. ნიშნები და სიმპტომები იმაზეა დამოკიდებული, თუ სხეულის რა ნაწილშია კიბო, რამდენად დიდია მისი ზომა და რამდენად ძლიერ ეფექტს ახდენს ორგანოებსა თუ ქსოვილებზე.

    კიბოს მრავალ სახეობას გააჩნია წინასწარი, „გამაფრთხილებელი“ სიმპტომები ან ნიშნები. ეს შეიძლება იყოს მკერდში კვანძის არსებობა, ციებ-ცხელება, დაღლა, წონაში კლება, თუმცა უფრო გონივრულია წლის განმავლობაში გამოკვლევა გაკეთდეს, რომ ამ სიმპტომებს არ ელოდოთ და თავი მშვიდად იგრძნოთ.

მითი: ქიმიოთერაპია ცრუ იმედია
  • რეალობა: ქიმიოთერაპია არის მედიკამენტური მკურნალობის ერთ-ერთი სახეობა.როგორც ნებისმიერ მკურნალობას, მასაც აქვს გვერდითი მოვლენები, თუმცა ამჟამად ამ მოვლენების მართვა უკვე შესაძლებელია.სამწუხაროდ, საზოგადოებაში ქიმიოთერაპია ასოცირდება სიკვდილთან, რადგან ადრე ძირითადად დაგვიანებული სტადიის დროს გამოიყენებოდა. ახლა კი პერსონალიზებული მედიცინის ფონზე ხშირად საწყის ეტაპზეც ვიყენებთ პროფილაქტიკისთვის და შედეგებიც გაცილებით უკეთესია. ასევე არსებობს სიმსივნეების სხვადასხვა ტიპი, რომლებიც მხოლოდ ქიმიოთერაპიის საშუალებით იკურნება.

მნიშვნელოვანია, რომ ადამიანებმა საჯაროდ ვისაუბროთ ონკოლოგიურ დაავადებებზე, მათ მიმდინარეობაზე, მიღებულ შედეგებზე. საზოგადოებამ უნდა იცოდეს, რომ კიბოს განკურნება შესაძლებელია.

გახსოვდეთ, რომ ნებისმიერი დაავადების პროფილაქტიკა და ადრეული დიაგნოსტიკა ზრდის გამოჯანმრთელების შანსს, ახანგძლივებს სიცოცხლეს, ზოგავს თქვენს ენერგიას, დროს და ფულს.“

ნეტგაზეთის მასალების სხვა გამოცემებში გადაბეჭდვის წესი


ავტორი