„95 წლისაც რომ გახდეს, მაინც იქნება ბიჭი, რომელიც თაობებს ჩაუძვრა სულში“

რობერტ პლანტის კონცერტის დაწყებამდე სულ ცოტა დრო რჩება. შეკვეთილში, „ბლექ სი არენასათან“ ხალხი უკვე შეიკრიბა, ლეგენდარული მომღერლის მსმენელები არა მარტო საქართველოს სხვადასხვა კუთხიდან, არამედ უცხოეთიდან არიან ჩამოსული.

მწერალი ანა კორძაია-სამადაშვილი რობერტ პლანტის კონცერტზე თბილისიდან დღეს ჩამოვიდა, რამდენიმე მეტრის იქეთ რობერტ პლანტი ასწორებს ხმას ინსტრუმენტებზე და ნაცნობი სიმღერების ნაწყვეტები ისმის. ანა კონცერტამდე საკუთარ მოლოდინებსა და შეგრძნებებზე ყვება:

„რობერტ პლანტი არის კაცი, რომელმაც შექმნა უამრავი ადამიანის ბიოგრაფია, მათ შორის ჩემიც, ისე, რომ თვითონ ამის შესახებ წარმოდგენა არ აქვს. თუ ჩემში სამნახევარი ადამიანური თვისება მაინც არის, აწედან ერთნახევარი როკ-ენ-როლისგან, რობერტ პლანტისგანაა. 95 წლისაც რომ გახდეს ეს ბიჭი, მაინც იქნება ბიჭი, რომელიც თაობებს ჩაუძვრა სულში.

ვინც ფიქრობს, რომ ასაკშია და ისე ვერ მღერის, როგორც 70-იან წლებში, მათ ვეტყოდი, რომ მკვდარი ლომი სჯობს ცოცხალ ძაღლს. წარმოგიდგენიათ? ჩექსაუნდის [ხმის შემოწმების] დროს ქაშმირის ხმა მომესმა ახლა, რაც იმას ნიშნავს რომ აქვე ახლოს პლანტია, კაცი, რომელიც 45 წელია მიყვარს. დღეს აქედან უამრავ გაგიჟებულ ადამიანს გაიყვანენ და პირველი ალბათ მე ვიქნები“. 

რობერტ პლანტის კონცერტი საქართველოში „შავი ზღვის ჯაზფესტივალის“ ფარგლებში იმართება.

ნეტგაზეთის მასალების სხვა გამოცემებში გადაბეჭდვის წესი


ავტორი
თამუნა ნერგაძე არის "ბათუმელების" რეპორტიორი 2017 წლის ოქტომბრიდან