კურორტ გოდერძიზე კვადროციკლის გადავარდნის შედეგად ერთი ადამიანი გარდაიცვალა

კურორტ გოდერძიზე 10 ივლისს, საღამოს, უბედური შემთხვევის შედეგად, ახალგაზრდა მამაკაცი გარდაიცვალა, ხოლო ერთი პირი დაშავდა. მთის კურორტების მართვის კომპანიის ინფორმაციით, გარდაცვლილი კომპანიის თანამშრომელი იყო, ის კურორტის საბაგიროზე მუშაობდა.

„რაც ამ ეტაპზე ჩვენთვის არის ცნობილი, ისაა, რომ ჩვენი ორი თანამშრომელი, რომლებსაც დასრულებული ჰქონდათ სამსახურეობრივი მოვალეობა, კვადროციკლით მოდიოდნენ ჭანჭახის მთიდან, მძღოლმა საჭე ვეღარ დაიმორჩილა, რის შედეგადაც ეს ფატალური შედეგი დადგა. სამწუხაროდ, სხვა ინფორმაცია არ გვაქვს. რაც შეეხება მეორე თანამშრომელს, ის ბათუმის ერთ-ერთ კლინიკაშია გადაყვანილი და ველოდებით, რომ წუთი-წუთზე უნდა გამოწერონ. ჩაუტარდა გამოკვლევები, მსუბუქი დაჟეჟილობები ჰქონდა.“ – გვითხრეს კომპანია „მთის კურორტებში“.

კომპანიის ინფორმაციით დაღუპული ხულოს მუნიციპალიტეტის სოფელ დანისპარაულში ცხოვრობდა. ადგილობრივია დაშავებულიც.

შინაგან საქმეთა სამინისტროს ინფორმაციით, დაწყებულია გამოძიება სს კოდექსის 116-ე მუხლით.

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com