საკრებულო მსჯელობს, როგორ აიძულოს მოსახლეობა გადაიხადოს სანდასუფთავების გადასახადი

დღეს, 28 ივნისს, საკრებულოს სხდომაზე  მსჯელობდნენ იმის შესახებ, თუ როგორ უნდა აიძულონ მომხმარებელი, სანდასუფთავების მოსაკრებელი გადაიხადოს.

მერიის საფინანსო-საბიუჯეტო სამსახურის ხელმძღვანელის, არჩილ ვანაძის თქმით, დღეს არ არსებობს სანდასუფთავების გადასახადის იძულებით ამოღების მექანიზმი.

საკრებულოს წევრების მხრიდან იყო მსჯელობა, რომ სანდასუფთავების გადასახადი შესაძლოა მიებას წყლის ან ელექტროენერგიის გადასახადს. „თუ არ გადაიხდიან სანდასუფთავების მოსაკრებელს, მომხმარებლებს გაეთიშებათ წყალი ან შუქი,“ – ამბობდნენ საკრებულოს წევრები.

სანდასუფთავების მოსაკრებლის ადმინისტრირებას 2018 წლის პირველი მაისიდან შპს „სანდასუფთავება“ ახორციელებს, რომლის 100% წილის მფლობელი ბათუმის მუნიციპალიტეტია.

„მოსაკრებლის ადმინისტრირების ღონისძიებების გამკაცრების პარალელურად, მიზანშეწონილად ჩაითვალა მოსაკრებლის დარიცხვის თარიღი შემოწმების შედეგების მიხედვით განისაზღვროს 2018 წლის პირველი მაისით  – იმ პერიოდით, როდესაც მოსაკრებლის ადმინისტრირების უფლებამოსილება გადაეცა შპს „სანდასუფთავებას“.

მიმდინარე ეტაპისათვის შპს „სანდასუფთავების“ მიერ აქტიურად ხორციელდება ახალი აბონენტების რეგისტრაცია და არსებული აბონენტების მონაცემების განახლება,“ – ნათქვამია საკრებულოს დადგენილების პროექტში.

 

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com