სად შეგიძლია ხვალ სისხლის დონორი გახდე – აქცია ბათუმში

14 ივნისს  სისხლის დონორის მსოფლიო დღე აღინიშნება. აჭარის ჯანდაცვის სამინისტრო ამ დღესთან დაკავშირებით სისხლის უანგარო დონაციის აქციას აწყობს. აქციაში სამინისტროების, მუნიციპალიტეტების მერიებისა და სამედიცინო დაწესებულებების წარმომადგენლები ჩაერთვებიან.

სისხლის ჩასაბარებლად მსურველები ხვალ, 14 ივნისს, 11:00 საათზე, სისხლის ბანკ „ჰემა 2012“-ში (მის: ქ. ბათუმი, გორგასლის ქ. N159ბ) უნდა მივიდნენ.

🔹სისხლის ჩაბარება ყველას შეუძლია, თუ კი:

  • დონორობის მსურველის ასაკი 18-დან 65 წლამდეა;
  • თქვენი წონა 55 კგ-ზე მეტია;
  • ჰემოგლობინი ნორმის ფარგლებშია;
  • არ ხართ დაავადებული სისხლის გზით გადამდები ინფექციებით (აივ ინფექცია, ვირუსული ჰეპატიტები, სიფილისი, მალარია).

🔹სისხლის ჩაბარება არ შეგიძლიათ, თუ:

  • გაქვთ ან გქონდათ მაღალი ტემპერატურა გასული კვირის განმავლობაში;
  • მკურნალობთ ანტიბიოტიკებით ან სხვა მედიკამენტებით;
  • გაქვთ გულსისხლძარღვთა დაავადებები. ეპილეფსია, დიაბეტი, თირკმლის ან ღვიძლის ქრონიკული დაავადებები, ვენერიული დაავადებები;
  • უკანასკნელი დონაციის დროს დაკარგეთ გონება;
  • რეგულარულად მკურნალობდით სისხლის პროდუქტებით;
  • იყენებდით საერთო შპრიცს მედიკამენტის ვენაში შეყვანისთვის/მოიხმარდით ნარკოტიკს.

მნიშვნელოვანი ინფორმაცია:

  • სისხლის დონორი არ უნდა იყოს B და C ჰეპატიტის ვირუსის მატარებელი,
  • სტომატოლოგთან ვიზიტიდან უნდა იყოს გასული 1 თვე;
  • თუ აქვს ტატუ, გაკეთებიდან  6 თვე უნდა იყოს გასული;
  • არ უნდა იყოს აცრილი ბოლო 2 თვის განმავლობაში;
  • ბოლო 1 წლის განმავლობაში არ უნდა ჰქონდეს გაკეთებული ქირურგიული ოპერაცია;
  • დონორის წონა უნდა იყოს 55 კგ-ზე მეტი ქალებისთვის და  60კგ-ზე მეტი კაცებისთვის.

დონორობა არ შეუძლიათ  ორსულებს და მეძუძურ დედებს. ასევე, სისხლის გაღების დროს ქალს არ უნდა ჰქონდეს  მენსტრუალური ციკლი. დონორს 24 საათის განმავლობაში არ უნდა ჰქონდეს მიღებული ალკოჰოლი. სისხლის ჩაბარების დროს დონორი უნდა იყოს ნასაუზმევი და თან უნდა ჰქონდეს პირადობის დამადასტურებელი მოწმობა.

სისხლის გაღების შემდეგ ერთი საათის განმავლობაში აკრძალულია სიგარეტის მოწევა. დონორს განმეორებით სისხლის გაღება ორი თვის შემდეგ შეუძლია.

 

ნეტგაზეთის მასალების სხვა გამოცემებში გადაბეჭდვის წესი


ავტორი