სელფის მუზეუმი ეგოიზმის გასაშარჟებლად

სელფის მუზეუმი ლოს-ანჯელესში მდებარეობს და მნახველებს სთავაზობს დაათვალიერონ ცნობილი ნახატები, რომლებზეც პერსონაჟები სელფებს იღებენ. სხვა მუზეუმებისგან განსხვავებით, ამ სივრცეში მოსულებს თავისუფლად შეუძლიათ ფოტოების გადაღება, მათ შორის სელფების, შედევრების რეპროდუქციებთან ერთად.

მიქელანჯელოს დავითი, მონა ლიზა, ყურმოჭრილი ვან გოგი – მუზეუმში ყველა ნახატზე სელფის გადაღების პროცესია ნაჩვენები.

სოციალურ ქსელებში ყოველდღიურად მილიონობით სელფს განათავსებენ ინტერნეტმომხმარებლები. როგორი უცნაურიც არ უნდა იყოს, მუზეუმის დამაარსებლები მიიჩნევენ, რომ სელფი თანამედროვე ხელოვნების ერთ-ერთი ძირითადი მიმართულებაა და ადამიანის ნარცისული ბუნების დიდი დოზით გამოვლინებას უწყობს ხელს.

მუზეუმის დაარსებით მათ სურდათ სელფის ფენომენი ცოტა ხნით მაინც ეჩვენებინათ მნახველებისთვის როგორც სასაცილო, სახალისო მოვლენა. მუზეუმის იდეის ავტორებს სივრცის გახსნით სურდათ ეჩვენებინათ, რომ სელფის ფენომენი აჩვენებს ადამიანების სურვილს: ჩანდნენ სხვების თვალში მუდმივად იდეალურები, რომ ხშირად ხელოვნების ნიმუშებივით აღვიქვამთ საკუთარ თავს. მუზეუმის გახსნის ძირითადი მიზანი ამ ფენომენის გაშარჟება და ამავდროულად ვიზიტორების გახალისებაა.

ნეტგაზეთის მასალების სხვა გამოცემებში გადაბეჭდვის წესი


ავტორი
თამუნა ნერგაძე არის "ბათუმელების" რეპორტიორი 2017 წლის ოქტომბრიდან