5 მილიონი ევრო – ტენდერი აჭარის სოფლების წყალმომარაგებაზე 

აჭარის დაბებსა და სოფლებში წყალმომარაგებისა და კანალიზაციის სისტემის პროექტირებაზე საერთაშორისო ღია ტენდერი „აჭარის წყლის ალიანსმა“ გამოაცხადა. აჭარის სოფლებში წყალმომარაგების სისტემის მოსაწყობად 50 მილიონი ევროა გათვალისწინებული.

„აჭარის წყლის ალიანსის“ ინფორმაციით, ტენდერის მიზანია „აჭარაში დაბებისა და სოფლების წყალმომარაგებისა და კანალიზაციის გამწმენდი პროგრამისთვის დეტალური პროექტირება და ხარჯთაღრიცხვა, სატენდერო პროცედურების წარმართვის, სამუშაოთა ზედამხედველობისა და თანხმლები ღონისძიებების შესყიდვა“.

„დაბებისა და სოფლების წყალმომარაგებისა და კანალიზაციის გამწმენდი პროგრამა აჭარაში“ 50 მილიონი ევროთია დაფინანსებული. აქედან 40 მილიონი ევრო არის გერმანიის რეკონსტრუქციის საკრედიტო ბანკის [KFW] სესხი, ხოლო 10 მილიონი ევრო [KFW-ს და ევროკავშირის] გრანტი.

მთლიანი თანხის 10%, ანუ 5 მილიონი ევრო გათვლილია საკონსულტაციო მომსახურებისთვის. ორ კონსულტანტს კი ზემოაღნიშნული ტენდერით გამოავლენენ, სადაც მომსახურების თანხას თავად ტენდერში მონაწილე კომპანიები დაასახელებენ. ტენდერი 2018 წლის 29 ივნისს დასრულდება.

„აჭარის წყლის ალიანსში“ აცხადებენ, რომ ტენდერით შერჩეულ კომპანიებს ევალებათ, აჭარის დაბებსა და სოფლებში წყალმომარაგებისა და წყალარინების სისტემის:

  • დეტალური პროექტირება და ხარჯთაღრიცხვა;
  • ტენდერის გამოცხადება მშენებლობაზე და გამარჯვებულის გამოვლენა;
  • შემდგომში კი მშენებლობის ზედამხედველობა.

ეს იქნება პროგრამის პირველი ეტაპი.

„შესაძლოა ამ თანხით [50 მილიონი ევრო] მთლიანად მოეწყოს სისტემა, ან საჭირო დარჩეს თანხის დამატება. ამ შემთხვევაში საქართველოსა და აჭარის მთავრობებს მოუწევთ, იზრუნონ საჭირო თანხის მოძიებაზე,“ – აცხადებენ „ალიანსში“.

პროგრამა მოიცავს აჭარის დაბებსა და სოფლებს და არ მოიცავს ქალაქ ბათუმსა და ქალაქ ქობულეთს.

 

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com