მეტეოროლოგები: ზაფხულში ჰაერის ტემპერატურა ნორმაზე მაღალი იქნება

მსოფლიო მეტეოროლოგიური ორგანიზაციის ( WMO)-ს ექსპერტების დასკვნით, 2018 წლის ზაფხულის პერიოდში ბალკანეთის ნახევარკუნძულის, ხმელთაშუა ზღვის სანაპიროს და კავკასიის რეგიონის ამინდის ფორმირებას, წყნარ, ატლანტიკისა და ინდოეთის ოკეანეებში მიმდინარე და მოსალოდნელი პროცესები განაპირობებს. ინფორმაციას ამის შესახებ საქართველოს გარემოს დაცვის სააგენტო ავრცელებს.

სააგენტოს ცნობით, ზაფხულში ჰაერის საშუალო ტემპერატურა ნორმაზე (საშუალო მრავალწლიური მნიშვნელობა) მაღალი, ხოლო ნალექი ნორმაზე ნაკლებია მოსალოდნელი.

ექსპერტების დასკვნით, საქართველოში ჰაერის საშუალო ტემპერატურა 60%-იანი ალბათობით ნორმაზე 1- 2 გრადუსით მაღალი, ხოლო ნალექი 45%-იანი ალბათობით ნორმაზე ნაკლები იქნება.

ზაფხულის სეზონზე ჰაერის საშუალო ტემპერატურის ნორმა საქართველოს დაბლობსა და ბარში +20, +23; მთაში  +17, +20; მაღალ მთაში +14, +16 გრადუსს შეადგენს.

ზაფხულის სეზონზე ნალექის ნორმა შავი ზღვის სანაპირო ზოლში 500-580 მმ, კოლხეთის დაბლობზე – 250-500 მმ, მთაში – 220-260 მმ, მაღალ მთაში – 300-350 მმ, აღმოსავლეთ საქართველოს ბარში – 150-300, მთასა და მაღალ მთაში 190-300 მმ – ის ფარგლებში იქნება.

ნეტგაზეთის მასალების სხვა გამოცემებში გადაბეჭდვის წესი


ავტორი
გაზეთი "ბათუმელები" გამოდის 2001 წლიდან.