მთავარი,სიახლეები

ბათუმის მერია ადმინისტრაციულ შენობებში სახანძრო უსაფრთხოების სისტემას დაამონტაჟებს

04.06.2018 • 2600
ბათუმის მერია ადმინისტრაციულ შენობებში სახანძრო უსაფრთხოების სისტემას დაამონტაჟებს

ბათუმის მერიის ადმინისტრაციულ შენობებში სახანძრო უსაფრთხოების სისტემის მოწყობისთვის ქალაქის ბიუჯეტიდან 68 130 ლარია გამოყოფილი. სახანძრო უსაფრთხოების სისტემები დამონტაჟდება ბათუმში, ლუკა ასათიანის ქ. 25-ში, ლერმონტოვის ქ. 90-ში და ორბელიანის ქ. 10-ში მდებარე ადმინისტრაციულ შენობებში. მომსახურებას მერია ტენდერით შეისყიდის, რომელიც უკვე გამოცხადებულია.

სატენდერო პირობების მიხედვით, სახანძრო სიგნალიზაციის საკონტროლო პანელი უნდა დამონტაჟდეს პირველი სართულის ნიშნულზე… კვამლის მაუწყებლები უნდა დამონტაჟდეს ჭერის გეომეტრიულ ცენტრში ან თანაბრად განაწილებული კონტროლირებადი ფართობის ჭერზე. საგანგაშო ღილაკები უნდა დამონტაჟდეს ყველა გასასვლელში და კიბის უჯრედის გასასვლელში, იატაკიდან 1,2-1,5 მ სიმაღლეზე. სახანძრო სიგნალიზაციის სირენა უნდა დამონტაჟდეს ჭერიდან 0,3 მ-ზე და უნდა გამოსცემდეს განგაშის სიგნალს არანაკლებ 100 დბ/მ² სიძლიერით. გასასვლელებში უნდა დამონტაჟდეს შუქმაჩვენებელი „EXIT“;

შენობების ბოლო სართულებზე კვამლის მაუწყებლების ჭერში მონტაჟისთვის სახანძრო სიგნალიზაციის საკაბელო ქსელის გაყვანა უნდა განხორციელდეს სხვენიდან [სპეციალური საბურღი აპარატიტით, რომელიც არ გამოიწვევს დანაგვიანებას] მერიის მიერ მითითებულ ადგილებზე;

მიმწოდებელმა უნდა უზრუნველყოს აჭარის საგანგებო სიტუაციების მართვის მთავარ სამმართველოსთან შესრულებული სამუშაოების შესაბამისობის აქტის წარმოდგენა. თუ შესაბამისობის აქტში შესრულებული სამუშაოები არ შეესაბამება სახანძრო უსაფრთხოების სფეროში საქართველოს კანონმდებლობით დადგენილ მოთხოვნებს, შესრულებულ სამუშაოებზე მიღება-ჩაბარების აქტი არ გაფორმდება.

სისტემის სწორი ექსპლუატაციის პირობებში საგარანტიო პერიოდი უნდა შეადგენდეს არანაკლებ ორ წელს. მიმწოდებელი ვალდებულია მიღება-ჩაბარების აქტის გაფორმებიდან ერთი წლის განმავლობაში სისტემის ექსპლუატაციის პროცესს გაუწიოს ზედამხედველობა, რომლის განმავლობაშიც არანაკლებ თვეში ერთხელ უნდა მოახდინოს სრული შემოწმება და აღმოჩენილი დეფექტების აღმოფხვრა საკუთარი ხარჯებით, რაზეც გაფორმდება შესაბამისი აქტი.

ქალაქ ბათუმის მერიაში და საკრებულოში 250-მდე ადამიანია დასაქმებული.

 

გადაბეჭდვის წესი


ასევე: