მერია მცირე ბიზნესის კუთხით ძველი ბათუმის ეზოების პოტენციალის შესწავლას იწყებს

ბათუმის ისტორიული განაშენიანების საზღვრებში ეზოებში კომერციული პროექტების განვითარების მხარდაჭერის მიზნით, ბათუმის მერია შესაბამის კვლევას ჩაატარებს და პარალელურად ინფრასტრუქტურის მოწესრიგებისთვის საჭირო საპროექტო დოკუმენტაციას მოამზადებს. პირველ ეტაპზე 10 ეზოს პროექტი მომზადდება.

მომსახურებას მერია ელექტრონული ტენდერით შეისყიდის, რისთვისაც ქალაქის ბიუჯეტში 20 ათასი ლარია გათვალისწინებული. შესაბამისი ტენდერი უკვე გამოცხადებულია.

ტენდერში გამარჯვებულმა სამუშაოები ხუთ ეტაპად უნდა განახორციელოს:

პირველი ეტაპი დაეთმობა ეზოების პოტენციალის კვლევას მცირე ბიზნესის განვითარების მიმართულებით:

  • ბათუმის ისტორიული განაშენიანების საზღვრებში სახასიათო [განსაკუთრებული მდებარეობის, არქიტექტურის, ისტორიის, ტურისტებისთვის საინტერესო ელემენტების მქონე] ეზოების შერჩევა;
  •  ეზოების ინფრასტრუქტურის შესწავლა, ასევე ეზოებთან დაკავშირებული ისტორიული მონაცემების მოკვლევა და წარმოდგენა;
  • ეზოში მცხოვრებ მოსახლეობასთან საკითხის შეთანხმება. ამ ეტაპზე მიმწოდებელი შეისწავლის არსებობს თუ არა ეზოში ამხანაგობა, რამდენად არიან მზად ამხანაგობის წევრები ერთობლივი ბიზნესის დასაწყებად და შემსყიდველს წარუდგენს ამხანაგობის შესაბამის წერილობითი გადაწყვეტილებას [თანხმობას]. იმ შეთხვევაში თუ ამხანაგობა არ არსებობს, მიმწოდებელმა უნდა მოხდინოს ამხანაგობის ჩამოყალიბების პროცესის ორგანიზება;
  • ეზოების ჩამონათვალს ითანხმებს შემსყიდველი. ამასთანავე შესაძლებელია ეზოების ჩამონათვალის ეტაპობრივი შეთანხმება.

მეორე ეტაპზე ეზოების ჩამონათვალის შემსყიდველთან შეთანხმების შემდგომ, ეზოებში მცირე [მიკრო] ბიზნესის განვითარების მოდელების მომზადება:

  • ეზოების სახასიათო შტრიხების და არსებული ინფრასტრუქტურის მდგომარეობის გათვალისწინებით, ამხანაგობასთან შეთანხმებით, კონკრეტული მცირე ბიზნესის განვითარების მოდელების მომზადება;
  • ბიზნესის განვითარების მოდელების შესაბამისად, ეზოების ვიზუალური გაუმჯობესების დიზაინების შემუშავება;
  • ბიზნესის განვითარების მოდელსა და ეზოს ვიზუალური გაუმჯობესების დიზაინს ითანხმებს ბათუმის მერია.

მესამე ეტაპი იქნება სამუშაოების დეტალური პროექტირება:

  • შერჩეული ბიზნეს მოდელებიდან გამომდინარე, ბიზნეს გეგმების შემუშავება ამხანაგობასთან შეთანხმებით;
  • ეზოებში განსახორციელებელი სამუშაოების [მათ შორის: ბიზნესის დაწყებისათვის საჭირო ინვენტარის შეძენის] დეტალური პროექტირება და ხარჯთაღრიცხვის მომზადება [ბათუმის მერიის მიერ განსახორციელებელი სამუშაოების ხარჯთაღრიცხვა უნდა მომზადდეს ცალკე] და არ უნდა აღემატებოდეს 10 000 ლარს [თითოეულ ობიექტზე].

მეოთხე ეტაპზე მოხდება პროექტის პრეზენტაცია:

  • პროექტის შედეგების განხილვა, პრეზენტაცია;
  • პროექტის შედეგების შესახებ დეტალური ინფორმაციის წარდგენა მერიისთვის, პრეზენტაციის მოწყობა მედიის და დაინტერესებული პირებისთვის.

მეხუთე ეტაპზე ტენდერში გამარჯვებულს ევალება პროექტის მონიტორინგის ანგარიშის მომზადება და წარდგენა მერიაში [ანგარიში უნდა მოიცავდეს წარმატებული და წარუმატებელი პროექტების მოკლე მიმოხილვას შერჩეული ეზოების შესაბამისად. ასევე შესაბამისი ბიზნეს გეგმების განხორციელების ძირითად ბარიერებსა და გამოწვევებს, მათი დაძლევის რეკომენდაციებს].

პირველი ოთხი ეტაპი, ხელშეკრულების გაფორმებიდან 30-45-90 დღეში უნდა დასრულდეს, მეხუთე ეტაპი კი არაუგვიანეს 2018 წლის 10 დეკემბერს.

ახალი იდეის შესახებ ბათუმის მერმა, ლაშა კომახიძემ, მიმდინარე წლის თებერვალში არასამთავრობო ორგანიზაციებთან და მედიასთან შეხვედრისას განაცხადა.  მერის თქმით, პროექტის ფარგლებში გამოცხადდება კონკურსი ძველ ბათუმში მდებარე ეზოების კომერციულ დატვირთვაზე. კონკურსში გამარჯვებული კი 10 000 ლარით დაფინანსდება.

ამ თემაზე:

ბათუმის მერის იდეა: 10 000 ლარი ძველი ბათუმის ეზოებში კომერციული პროექტებისთვის

 

 

 

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com