დღეს ბათუმში ბავშვებისთვის დაგეგმილი ღონისძიებები საზაფხულო თეატრში გაიმართება

უამინდობის გამო ბათუმის მერიამ პირველ ივნისს, ბავშვთა დაცვის დღეს დაგეგმილი ღონისძიებები ბათუმის საზაფხულო თეატრში გადაიტანა. როგორც კულტურის ცენტრში გვითხრეს, რომელიც ამ ღონისძიებების ორგანიზატორია, ყველა ღონისძიება ჩატარდება, მათ შორის: კონცერტები, სახის მოხატვის აქციები და ა.შ. დარიგდება უფასო ნაყინი და პოპკორნი ბავშვებისთვის.

  • ბავშვების გართობაზე მთელი დღის განმავლობაში [12:00-დან – 20:00-საათამდე] იზრუნებენ ზღაპრის გმირები – კოსტიუმირებული მსახიობები – დისნეი, ჯამბაზები, იქნება ჭადრაკის თემატიკა, ოჩოფეხები, მეკობრე; გაიმართება საბავშვო კონცერტები, ქალაქში არსებული საბავშვო სტუდიების მონაწილეობით [მინიმუმ 5 სტუდია, თითო სტუდია არანაკლებ 40-წუთიანი პროგრამით].
  • მთელი დღის განმავლობაში ბავშვებს უფასოდ  დაურიგდებათ ბამბის ნაყინი [2500 ცალი], პოპკორნი [2500 ცალი], ჩამოსასხმელი ნაყინი [3000 ცალი], ჰელიუმის ფერადლენტიანი ბუშტები [2000 ცალი]; 
  • საზაფხულო თეატრში განთავსდება მინიმუმ ორი მომენტალური ფოტო ბეჭდვის აპარატი [ე.წ. „PhotoBooth“], რომლებითაც ბავშვებს 2000 ფოტოს გადაუღებენ და ადგილზე უფასოდ მიაწოდებენ, ანიმატორითა და გადაღებისთვის სხვადასხვა სახალისო აქსესუარებით; მოეწყობა რეტრო კომპიუტერული თამაშები –  8 სხვადასხვა რეტრო კონსოლი, 8 ტელევიზორი, მინიმუმ 300 რეტრო თამაში.

ღონისძიებისთვის ქალაქის ბიუჯეტიდან 29 850 ლარი დაიხარჯება.

ასევე, დღეს, ბავშვთა დაცვის საერთაშორისო დღესთან დაკავშირებით, ბათუმის სახელმწიფო უნივერსიტეტის ფოიეში მზრუნველობამოკლებული და სოციალური პრობლემების მქონე ბავშვების ნახატების გამოფენა-პერფორმანსი გაიმართება.

გამოფენაზე გამოტანილი იქნება ბათუმის საოჯახო ტიპის რამდენიმე სახლის ბავშვების ნახატები შექმნილი თემაზე –  მათი საოცნებო ან/და ახლანდელი გარემო.
გამოფენა-პერფორმანსი გაიმართება 13:00 საათიდან 16:00 საათამდე.
ნეტგაზეთის მასალების სხვა გამოცემებში გადაბეჭდვის წესი


ავტორი
ნანა კვაჭაძე, ჟურნალისტი ტელ: [0422] 27 45 12 ელფოსტა: kvachadze.n@gmail.com