მოქალაქე ფოტოატელიეს და „სიცილის ოთახს“ ბათუმის ბულვარში ათწლიანი იჯარით ითხოვს

ბათუმის ბულვარში, ბამბუკის ხეივნის მიმდებარედ არსებულ ერთსართულიან შენობას, სადაც ახლა ფოტოატელიე და ძველი, საბჭოთა პერიოდის დანატოვარი – სიცილის ოთახია განთავსებული, ფოტოგრაფი ვასილ ოსეფაიშვილი ათწლიანი იჯარით ითხოვს. სანაცვლოდ კი ქონების მესაკუთრეს, ბათუმის მერიას, ამ ტერიტორიაზე ტურისტული ობიექტის მოწყობასა და წელიწადში 7000 ლარის გადახდას ჰპირდება.

ბათუმის მერია თანახმაა 113 კვადრატული მეტრი  მიწის ნაკვეთი და მასზე დამაგრებული 89,43 კვადრატული მეტრი შენობა ბულვარში ვასილ ოსეფაიშვილს აუქციონის გარეშე პირდაპირი განკარგვით, სარგებლობის უფლებით გადასცეს. მერიამ შესაბამისი შინაარსის განკარგულების პროექტი უკვე მოამზადა და საკრებულოს დასამტკიცებლად გადაუგზავნა.

ბათუმის მერიის მუნიციპალური ქონებისა და სერვისების მართვის სამსახურის უფროსის, გოგა ლომაძის ინფორმაციით, რომელმაც განკარგულების განმარტებითი ბარათი მოამზადა, ვასილ ოსეფაიშვილს ამ ადგილზე კომპლექსური გასართობი ცენტრის განვითარების კონცეფცია აქვს მერიაში წარდგენილი, რომლის მიხედვითაც შენობისა და მიმდებარე ტერიტორიების სარესტავრაციო სამუშაოებიც იგეგმება.

„ამის შემდეგ ეს ადგილი გახდება ერთ-ერთი მიმზიდველი და  საინტერესო ლოკაცია ბათუმის მასშტაბით დამსვენებლებისა და ადგილობრივი მოსახლეობისთვის“,  – ნათქვამია განმარტებით ბარათში.

ამ ბარათის მიხედვით, პროექტის განხორციელების შემდეგ შენობის მიმდებარედ თანაბრად განაწილდება როგორც შენობა-ნაგებობა, ისე დეკორაციებითა და მცენარეებით მორთული ეზო.

საერთო ჯამში, გოგა ლომაძის ინფორმაცით, ბულვარში ერთ-ერთ ხალხმრავალ ადგილზე, ყოფილი ფოტოატელიეს ნაცვლად იგეგმება მრავალფუნქციური ტურისტული ობიექტის განთავსება, სადაც მოეწყობა ფოტოატელიე, სივრცე ფოტოსესიისთვის, ქართული კუთხე ეზოს მიმდებარე ტერიტორიაზე და მოსასვენებელი სივრცე.

ჩამონათვალშია ასევე:  „კაფე-ბარი ტყეში ქართულ-ევროპული სამზარეულოს სინთეზით.“ ოღონდ დაკონკრეტებული არ არის, რას გულისხმობს ეს ფორმულირება – „კაფე-ბარი ტყეში“ კაფეს სახელი იქნება, თუ ბამბუკის ხეივანში წარმოუდგენია მსურველს კაფეს მოწყობა.

ეს ყველაფერი 113 კვადრატულ მეტრზე უნდა განთავსდეს.

განმარტებით ბარათში ასევე ნათქვამია, რომ დაგეგმილია ტერასას მოწყობა კულტურული ღონისძიებებისა და შემოქმედებითი საღამოებისთვის. ეს აჩენს კითხვას, ხომ არ იგეგმება ახალი მშენებლობა ძველის დემონტაჟის ხარჯზე – თუმცა ამაზე განმარტებით ბარათში არაფერია ნათქვამი.

მერიის პრესსამსახურის ინფორმაციით, ტერიტორიაზე სამშენებლო პროექტით მერიის არქიტექტურის სამსახურისთვის არ მიუმართავთ, პროექტი არც კულტურული მემკვიდრეობის სააგენტოშია გადაგზავნილი.

გაითვალისწინა თუ არა მერიის ქონების მართვისა და სერვისების სამსახურმა ამ წერილის მომზადებისას ის, რომ საუბარია კულტურული მემკვიდრეობის ძეგლის ტერიტორიაზე და იქ როგორც ეზოს განვითარება, მცენარეების დარგვა და ნებისმიერი სახის სარეაბილიტაციო სამუშაოები კულტურული მემკვიდრეობის სააგენტოსთან უნდა შეთანხმდეს? – განმარტებით ბარათში არც ამაზე რაიმე ნათქვამი.

სამაგიეროდ, „ბათუმელებთან“ კონცეფციის რამდენიმე დეტალი თავად ვასილ ოსეფაიშვილმა დააზუსტა. მერიიდან საკრებულოში გადაგზავნილი ინფორმაციით, ვასილ ოსეფაიშვილი შენობის რეაბილიტაციას გეგმავს, თავად ვასილ ოსეფაიშვილის თქმით კი, არსებული შენობა იმდენად ძველია, რომ მასზე ტერასის დადგმა შეუძლებელია: „სამი მანქანა ნეშომპალაა მარტო მაგის სახურავზე.“

მან გვითხრა ასევე, რომ შესაბამის სამსახურებს იდეა წარადგინა იმის შესახებ, თუ რის გაკეთებას აპირებს ტერიტორიაზე: იდეის მოწონების შემთხვევაში ის მზად არის პროექტიც მოამზადოს. ოსეფაიშვილი ქართული კუთხის მოწყობაში ქართული სამოსის კუთხეს გულისხმობს: „სადაც შემოვლენ, მოირგებენ იმ სამოსს, რომელიც მოეწონებათ და ფოტოს გადაიღებენ“.

რაც შეეხება ბულვარში კაფეს მოწყობას, მისთვის უსიამოვნოა, როცა ბულვარში თევზის სუნი დგას, ამიტომ მის კაფეში საჭმელი არ იქნება: „მხოლოდ დესერტი იქნება ბავშვებისთვის, მაგალითად, ნაყინი, უფროსებისთვის კი – ყავა და წვენი. არ არის სასიამოვნო, გულით ავადმყოფი კაცი დასასვენებლად რომ ჩამოვა ბულვარში და იქ შემწვარი თევზის სუნი დახვდება.“

რაც შეეხება საიჯარო ფასს, ვასილ ოსეფაიშვილმა გვითხრა, რომ თანხა მას მერიაში განუსაზღვრეს.

ფოტო: ცაგო კახაბერიძე

ვასილ ოსეფაიშვილი

ნეტგაზეთის მასალების სხვა გამოცემებში გადაბეჭდვის წესი


ავტორი