კონკურსი დიზაინერებისთვის მოჭადრაკეთა ეროვნული გუნდების ჩაცმულობაზე

2018 წლის საჭადრაკო ოლიმპიადის საორგანიზაციო კომიტეტმა საქართველოს მოჭადრაკე ქალთა და ვაჟთა ოლიმპიური ნაკრები გუნდების სამოსის შექმნაზე კონკურსი გამოაცხადა. კონკურსში მონაწილეობა შეუძლიათ როგორც პროფესიონალ, ასევე დამწყებ დიზაინერებს.

ესკიზები უნდა იყოს შექმნილი კონკრეტულად ამ კონკურსისთვის და კონკურსის დასრულებამდე არ უნდა განთავსდეს  ვებგვერდებსა თუ სოციალურ ქსელში; კონკურსანტმა უნდა წარადგინოს ქალ და ვაჟ მოჭადრაკეთა უნიფორმის მინიმუმ ორი ესკიზი.

პირობების ჩამონათვალში მითითებულია, ასევე, რომ კონკურსანტმა უნდა გაითვალისწინოს, რომ სამოსი იქმნება მოჭადრაკეებისთვის, რომლებიც რამდენიმე საათს ჭადრაკის დაფასთან მსხდომნი ატარებენ და სამოსი, შესაბამისად, უნდა იყოს მაქსიმალურად მოსახერხებელი და კომფორტული.

კონკურსში მონაწილეობის მსურველებმა ესკიზები უნდა წარადგინონ 2018 წლის 25 ივნისამდე შემდეგ ელექტრონულ მისამართზე; uniform@batumichess.com 

პირველ, მეორე და მესამე ადგილზე გასული კონკურსანტებს გადაეცემათ  თანხა და სამახსოვრო საჩუქრები.

ქალთა და ვაჟთა სამოსი განიხილება ცალ-ცალკე. საუკეთესო სამეულს აარჩევს სპეციალური ჟიური: დიზაინერები – იკა ბობოხიძე და თეონა თავართქილაძე,

საუკეთესო სამეულიდან [როგორც კაცების, ასევე ქალების] საუკეთესოს კი საქართველოს მოსახლეობა სოციალური ქსელის გამოკითხვის შედეგად აარჩევს ოლიმპიადის ოფიციალურ ფეისბუქგვერდზე – batumi2018.

გამარჯვებული ესკიზების მიხედვით საქართველოს მოჭადრაკე ქალთა და ვაჟთა ნაკრები გუნდებისთვის სამოსის შეკერვას უზრუნველყოფს 2018 წლის საჭადრაკო ოლიმპიადის საორგანიზაციო კომიტეტი.

43-ე საჭადრაკო ოლიმპიადა „ბათუმი 2018“ ბათუმში 23 სექტემბრიდან 6 ოქტომბრამდე გაგრძელდება და მასში მსოფლიოს 189 ქვეყნის წარმომადგენელი მიიღებს მონაწილეობას.

 

ნეტგაზეთის მასალების სხვა გამოცემებში გადაბეჭდვის წესი


ავტორი