ხიჭაურიდან გოდერძის უღელტეხილამდე გაზსადენის პროექტისთვის 3,5 მილიონი ლარი გამოიყოფა

აჭარის ფინანსთა და ეკონომიკის სამინისტროს ინფორმაციით, ხიჭაურის დასახლებიდან გოდერძის უღელტეხილამდე საშუალოწნევიანი გაზსადენის მშენებლობის სამშენებლო დოკუმენტის პროექტის შესყიდვისთვის ბიუჯეტში 3 578 400 ლარი გამოიყოფა. პროექტის შესყიდვის შემდეგ კი დაიგეგმება გაზსადენის მშენებლობა, რაც მაღალმთიანი აჭარის გაზიფიკაციის პროგრამის მეორე ეტაპი იქნება.

გაზიფიკაციის პროგრამის პირველი ეტაპის ფარგლებში ბათუმიდან ხიჭაურამდე შენდება გაზსადენი, რომელიც ნაცვლად 2019 წლისა, მიმდინარე წლის აგვისტოში ან ნოემბერში უნდა დასრულდეს. ბიუჯეტის ცვლილებების პროექტში 862 600 ლარი დამატებით, პირველი ეტაპის სამუშაოების დასრულებისთვისაც არის გათვალისწინებული.

ამ ეტაპზე დასახლებული პუნქტების დაქსელვაზე აჭარის მთავრობას არც პროექტი აქვს და არც ფინანსები გამოყოფილი. მეტიც, ჯერ კიდევ არ არის გადაწყვეტილი, ვინ დააფინანსებს შესაბამის სამუშაოებს – საქართველოს, აჭარის მთავრობა თუ მუნიციპალიტეტებსაც ჩართავენ.

„მაღალმთიანი აჭარის გაზიფიცირების პროგრამა, რაც აჭარის მთავრობას აქვს, გულისხმობს ცენტრალური მილსადენის გაყვანას. ეს შემდგომში სოფლების გაზიფიცირების შესაძლებლობას მოგვცემს“, – განაცხადა ათი დღის წინ „ბათუმელებთან“ ნუგზარ ძნელაძემ, ფინანსთა და ეკონომიკის სამინისტროს სივრცითი მოწყობისა და ტექნიკური ზედამხედველობის დეპარტამენტის უფროსმა.

ამავე თემაზე:

როდის მიიღებს ბუნებრივ გაზს აჭარის მთის მოსახლეობა

 

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com