45 მეტრი სიმაღლის შენობა კვარიათის პლაჟზე – ნებართვა გაცემულია

შპს „ტმი“ კვარიათის პლაჟზე თორმეტსართულიან შენობას აშენებს. ბათუმის მერიის ინფორმაციით, შენობაში სასტუმროს ტიპის აპარტამენტებს განათავსებენ.

პლაჟზე მაღლივი სახლების მშენებლობას ეწინააღმდეგებიან ადგილობრივები, რომლებიც ყოველწლიურად, საზღვაო სეზონზე, საკუთარ სახლებში იღებენ დამსვენებლებს. იგივე მოსაზრებები აქვთ იმ კაფე-რესტორნებისა და ბუნგალოების მფლობელებს, რომლებმაც პლაჟთან ახლოს ტურისტული ობიექტების მოსაწყობად მხოლოდ მსუბუქი კონსტრუქცია გამართეს.

შენობა 45-მეტრი სიმაღლის იქნება. მერიის ინფორმაციით, მშენებლობის ნებართვა 2017 წლის დეკემბერშია გაცემული.

1462 კვადრატული მეტრი არასასოფლო-სამეურნეო მიწის ნაკვეთი კომპანიამ ანდრია პირველწოდებულის გზატკეცილზე, #9-ში, გასულ წელს დაირეგისტრირა.

შპს „ტმი“ საქართველოში 2017 წელს საფრანგეთის მოქალაქეებმა დააფუძნეს, კომპანიის 25 პროცენტი საფრანგეთის მოქალაქეს, რობერტ ჭანტურიას ეკუთვნის, დარჩენილი 75 პროცენტი კი, ასევე ფრანგული სააქციო საზოგადოება „სორეპრიმის“ საკუთრებაა.

კვარიათი

ნეტგაზეთის მასალების სხვა გამოცემებში გადაბეჭდვის წესი


ავტორი