განათლების სამინისტროში სკოლებსა და მშობლებს შორის კონტრაქტის სამუშაო დოკუმენტი არ აქვთ

როცა განათლების მინისტრმა, მიხეილ ჩხენკელმა, განათლების სისტემის სამოქმედო გეგმის პრეზენტაცია წარმოადგინა, ისაუბრა  სკოლასა და მშობელს შორის კონტრაქტის გაფორმებაზე.

მინისტრმა თქვა, რომ ფსიქოლოგებთან კონსულტაციის შედეგად შეიმუშავეს რეკომენდაციები, რომლებიც სკოლაში ფლაერების სახით დაარიგეს. პრეზენტაციის დროს ითქვა, რომ ფლაერებში მოცემულია რეკომენდაციები მასწავლებლებისთვის, მოსწავლეებისა და მშობლებისთვის.

„ბათუმელებმა“  სამინისტროდან მოითხოვა სკოლასა და მშობელს შორის გასაფორმებელი კონტრაქტის სამუშაო დოკუმენტი, თუმცა სამინისტროში გვითხრეს, რომ  სამუშაო დოკუმენტი ჯერ არ აქვთ. „ჯერ სამუშაო დოკუმენტის შექმნა მიმდინარეობს“, – გვითხრეს პრესსამსახურში.

მათივე ინფორმაციით, შემუშავების შემდეგ სამუშაო დოკუმენტი გარკვეული კატეგორიის სკოლებს (სოფლის, ქალაქის, დაბის) მიეწოდება განსახილველად.

„ბათუმელების“ კითხვაზე, რატომ მხოლოდ „გარკვეულ კატეგორიას“ და არა ყველას? სამინისტროში გვითხრეს, რომ სამუშაო დოკუმენტს ჯერ მხოლოდ რამდენიმე სკოლას მიაწვდიან, შემდეგ კი – ყველას.

„მნიშვნელოვანია, რომ დოკუმენტის განხილვაში სკოლებთან ერთად ჩართული იქნებიან მოსწავლეთა მშობლები და განხილული იქნება ყველა ის კომენტარი და შენიშვნა, რომლებიც მათი მხრიდან იქნება დაფიქსირებული“, – ამბობენ სამინისტროში.

სამინისტროს განმარტებით, როცა დოკუმენტი სკოლებს მიეწოდება, განხილვისა და სხვადასხვა პროცედურის დასრულების შემდეგ შემუშავებული იქნება ხელშეკრულების საბოლოო ვერსია და ახალი სასწავლო წლიდან  სკოლასა და მშობელს შორის კონტრაქტი გაფორმდება.

სამინისტრო იმედოვნებს, რომ ამ კონტრაქტის მეშვეობით გაიზრდება სკოლაში მშობელთა ჩართულობა  და მათი პასუხისმგებლობა, რაც „ავტომატურად სწავლის ხარისხისა და სკოლაში წესრიგის ამაღლებას შეუწყობს ხელს“.

როგორც სამინისტროში აცხადებენ, კონტრაქტი ითვალისწინებს სკოლასა და მშობელს შორის უფლებებისა და მოვალეობების გაწერას. სამინისტროში ამ დროისთვის არც ამ უფლება-მოვალეობების შესახებ დოკუმენტი არ დევს.

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com