ენმ-ის თქმით, წუხელ მათ აბაშიძის დროინდელი თანამდებობის პირები დაესხნენ თავს – ივანიშვილის ხეები

დღეს, 30 აპრილს, გამთენიისას, ციხისძირში მომხდარ დაპირისპირებასთან დაკავშირებით „ერთიანი ნაციონალური მოძრაობის“ ბათუმის ორგანიზაციამ განცხადება გაავრცელა. ენმ-ის განცხადებით „ბიძინა ივანიშვილს გადაჰქონდა სახელმწიფო საკუთრებაში არსებული ხე. ნაციონალური მოძრაობის ქობულეთის და ბათუმის საკრებულოს წევრებმა, ასევე უმაღლესი საბჭოს დეპუტატებმა, მოითხოვეს დოკუმენტების წარმოდგენა და უკანონობის აღკვეთა. ასობით პოლიციელის თვალწინ ქობულეთის საკრებულოს წევრი ვაჟა შავიშვილი და მისი ძმა, თენგიზ შავიშვილი თავს დაესხნენ ნაციონალური მოძრაობის დეპუტატებს“.

განცხადების ავტორების თქმით, დღეს, გამთენიისას, „ნაციონალური მოძრაობის“ წევრებზე თავდამსხმელები ასლან აბაშიძის გუნდის წევრები იყვნენ: „ვაჟა შავიშვილს დამთავრებული აქვს საბჭოთა კაგებეს სკოლა და იყო ასლან აბაშიძის სეპარატისტული ხელისუფლების უზენაესი საბჭოს დეპუტატი, ხოლო თენგიზ შავიშვილი იყო ასლან აბაშიძის ოდეერი პორტში, რომელსაც ლობირებდნენ რუსი გენერლები. ის უზიდავდა ასლან აბაშიძეს კორუფციულ წილებს პორტიდან. ასეთ კრიმინალებს ხელ-ფეხი გაუხსნა ივანიშვილმა, რადგან ისინი უშუალოდ ხელმძღვანელობენ ხეების გადატანას“.

„ნაციონალური მოძრაობის“ წევრების მიერ გავრცელებული განცხადების თანახმად, ამ ჯგუფის გავლენა იმდენად დიდია, რომ პოლიციას წუხანდელი ძალადობის შეჩერებაც კი არ უცდია: „პოლიცია არის ხელფეხშეკრული და გაფრთხილებული არიან, რომ არანაირი რეაგირება არ მოახდინონ მომხდარ დანაშაულზე. პოლიციელები უშუალოდ ესწრებოდნენ დანაშაულის ჩადენის პროცესს, თუმცა რეაგირებას რა ახდენდნენ, რადგან შინაგან საქმეთა მინისტრისგან, გახარიასგან და სუსის უფროსისგან, გომელაურისგან მიღებული ჰქონდათ დავალება, რომ რეაგირება არ მოეხდინათ.

ენმ შემდეგ მოთხოვნებს აყენებს:

  • დაუყოვნებლივ პოლიციის მიერ დაკავებული იქნან და დაისაჯონ დანაშაულის ჩამდენი პირები ძმები შავიშვილები, რომლებმაც ჩაიდინეს ძალადობა ჯანმრთელობის დაზიანებით
  • როგორც მოძალადეს და კაგებეს აგენტს, ვაჟა შავიშვილს შეუწყდეს ქობულეთის საკრებულოს წევრის უფლებამოსილება
  • დაიწყოს პროკურატურამ დაუყოვნებლივ გამოძიება შინაგან საქმეთა სამინისტროს მაღალი თანამდებობის პირების მიერ პოლიციაზე უკანონო დავალების გაცემასთან დაკავშირებით, რის გამოც პოლიციამ არ მოახდინა რეაგირება
  • დაიწყოს გამოძიება სახელმწიფო საკუთრებაში არსებული ხის დატაცებასთან დაკავშირებით.“

წუხელ, გვიან ღამით, ციხისძირში, დაახლოებით 20-30 პირი ერთმანეთს ფიზიკურად დაუპირისპირდა. კონფლიქტის ორი მონაწილე „ნაციონალური მოძრაობის“ წევრი ნოდარ დუმბაძე და ქობულეთის საკრებულოს წევრი, ბონდო თედორაძე იყო. მათი განცხადებით, დაპირისპირება ენმ-ის წევრებსა და ციხისძირში მცხოვრებ შავიშვილებს შორის მოხდა, რომელთა კომპანიასაც ციხისძირიდან ივანიშვილის პარკში ქაფურის ხე გადაჰქონდა.

შს სამინისტროს ინფორმაციით, გამოძიება სსკ-ის 126-ე მუხლით მიმდინარეობს, რაც ძალადობას გულისხმობს. „ბათუმელებმა“ ვაჟა შავიშვილთან სცადა დაკავშირება, თუმცა მან ზარებს არ უპასუხა. ვაჟა შავიშვილი ქობულეთის საკრებულოს წევრია „ქართული ოცნებიდან“.

ციხისძირში ტერიტორია მაგისტრალთან, სადაც ხეებს თხრიან, სახელმწიფოს საკუთრებაა. შესაბამისად, სახელმწიფოს კუთვნილ ტერიტორიაზე სამუშაოების წარმოებას და იქედან სახელმწიფო ქონების [ხეების] გატანა თუ განადგურება [ხის მოჭრა], მინიმუმ მესაკუთრესთან, ამ შემთხვევაში სახელმწიფოსთან, უნდა იყოს შეთანხმებული.  „ბათუმელებმა“ დაახლოებით ერთი თვის წინ გაარკვია, რომ ეს ასე არ არის.

 

ამავე თემაზე:

ივანიშვილის ხის გადატანის გამო მომხდარ ინციდენტზე გამოძიება დაიწყო

ივანიშვილის ხის გადატანის გამო მომხდარ ინციდენტზე გამოძიება დაიწყო

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com