ბათუმში ყოფილი „უნივერსამის“ შენობა შესაძლოა დაანგრიონ

შპს „DS Group“-ი  ბათუმში, პუშკინის #132-ში, სადაც სავაჭრო ცენტრი „მოსკოვი“ [ყოფილი „უნივერსამი“] და სარიტუალო დარბაზი „ოდიშია“ განთავსებული, ახალი მრავალფუნქციური ობიექტის მშენებლობას გეგმავს.

სავაჭრო ცენტრში დასაქმებულების ინფორმაციით, ისინი ტბელ აბუსერიძის ქუჩაზე, #5ა-ში, ამავე კომპანიის მიერ აშენებულ მრავალფუნქციური სახლის პირველ ორ სართულზე აპირებენ გადასვლას. „იქ გაიხსნება დიდი სავაჭრო ცენტრი, რომელიც იქნება კეთილმოწყობილი, თანაც ბევრად ცენტრალურ ადგილზე ვიქნებით, ვიდრე ახლა ვართ“, – ამბობს მზია ფარტენაძე, რომელიც ამ დრომდე სავაჭრო ცენტრ „მოსკოვში“ წინდების ბიზნესითაა დაკავებული. იგივე მოსაზრება აქვს აქ დასაქმებულების უმეტესობას. ისინი ფიქრობენ, რომ ახალ მისამართზე უფრო მეტი მომხმარებელი ეყოლებათ.

შპს „N+“-ის  დირექტორი ნუკრი სალაძე, რომელიც ამ დრომდე შპს „მოსკოვის“ მოიჯარე იყო, ამბობს, რომ  სავაჭრო ცენტრისთვის ისევ საიჯარო პირობით ტბელ აბუსერიძის ქუჩაზე, #5ა-ში გადადის: „ალბათ ორ ან სამ თვეში გადავალთ, შენობა დასრულებულია და მიმდინარეობს შიდა სამუშაოები.“

შპს „მოსკოვის“ საკუთრებაში არსებული შენობა, რომელიც მესაკუთრეებმა შპს „DS Group“-ს   უკვე მიჰყიდეს [4161 კვადრატული მეტრი], ორსართულიანია და კულტურული მემკვიდრეობის დაცვის ზონაშია მოქცეული. შესაბამისად, კანონმდებლობის მოთხოვნით, ახალი პროექტი სააგენტოს ზონალურ საბჭოსთან უნდა შეთანხმდეს, შემდეგ კი, პროექტს ბათუმის მერიის არქიტექტურის სამსახური განიხილავს.

„DS Group“-ის იურისტის, ამირან ცეცხლაძის ინფორმაციით, კომპანიას ადგილი უკვე გამოსყიდული აქვს და ახლა პროექტის ესკიზზე მუშაობს, რომ შემდეგ ის კულტურული მემკვიდრეობის სააგენტოს წარუდგინოს.

სააგენტოში განმარტეს, რომ „DS Group“-მა პუშკინის #132-ში მშენებლობის პროექტით ზონალურ საბჭოს ერთხელ უკვე მიმართა, თუმცა საბჭომ განცხადება არც კი განიხილა, რადგან კომპანიამ პროექტი ისე შეადგინა, რომ მომიჯნავედ გადაფარა არქეოლოგიური მუზეუმის საკუთრებაში არსებული ტერიტორია.

ნეტგაზეთის მასალების სხვა გამოცემებში გადაბეჭდვის წესი


ავტორი