თურქეთის სასამართლომ გერმანიაში მცხოვრები ჟურნალისტის დაპატიმრების ორდერი გასცა 

2 აპრილს თურქეთში სასამართლომ გაზეთ Cumhuriyet-ის ყოფილი მთავარი რედაქტორის, ჯან დუნდარის დაპატიმრების ორდერი გასცა და წითელი ცირკულარით გამოაცხადა ძებნა.

საქმე ეხება გაზეთ Cumhuriyet-ში 2015 წლის მაისში გამოქვეყნებულ მასალას, სადაც ნათქვამი იყო, რომ თურქეთის მთავრობას იარაღი გადაჰქონდა სირიაში ისლამისტებისთვის.

დუნდარი 2015 წლის ნოემბერში დააპატიმრეს შპიონაჟის, ტერორისტული ორგანიზაციის დახმარების, სახელმწიფოს გადატრიალებისა და სახელმწიფო საიდუმლოების გამჟღავნების ბრალდებით. ყველა ბრალდება ეყრდნობოდა Cumhuriyet-ში გამოქვეყნებულ მასალებს, რომლის რედაქტორიც იყო დუნდარი. მასთან ერთად დააკავეს ჟურნალისტი, გამოცემის ანკარის ბიუროს ხელმძღვანელი, ერდემ გულიც. დაკავებულები სამი თვის განმავლობაში იყვნენ ციხეში, შემდეგ კი თურქეთის საკონსტიტუციო სასამართლომ მათი დაკავება სიტყვის თავისუფლების შეზღუდვად მიიჩნია და ჟურნალისტები გაათავისუფლეს.

„გარდიანის“ ცნობით, ერდოღანმა სასამართლოს მიერ ბრალდებულად გამოცხადებამდე დაადანაშაულა დუნდარი თურქეთის საერთაშორისო რეპუტაციის შელახვაში და განაცხადა, რომ იგი ამისათვის დიდ საფასურს გადაიხდიდა.

დუნდარი 2016 წლიდან გერმანიაში ცხოვრობს და გერმანული გამოცემა Die Zeit-ისთვის წერს სვეტებს.

ამავე თემაზე: გაზეთი ზამანი: თურქეთის პოლიციამ სტამბოლში პრეს-ოფისები დაარბია 

ნეტგაზეთის მასალების სხვა გამოცემებში გადაბეჭდვის წესი


გულნარ სალიმოვა