მთავარი,სიახლეები

ვინ იცავს ბსუ-ში საგამოცდო ტესტებს წინასწარ ნახვისგან

23.03.2018 • 1932
ვინ იცავს ბსუ-ში საგამოცდო ტესტებს წინასწარ ნახვისგან

ბათუმის შოთა რუსთაველის სახელმწიფო უნივერსიტეტის რამდენიმე სტუდენტი [მათ ვინაობას არ ვასახელებთ] ამბობს, რომ ტესტის სწორი პასუხები წინასწარ გაიგო და გამოცდა წარმატებით ჩააბარა. სტუდენტები ყვებიან, რომ საგამოცდო ტესტი სხვადასხვა გზით მოიპოვეს. „ვთქვათ, ექვსი ჩასაბარებელი გამოცდიდან ორის ტესტი ყოველთვის გვაქვს“, – ამბობს ერთ-ერთი მათგანი.

ისინი ამბობენ, რომ ტესტების მოპოვებას სტუდენტები სხვადასხვა გზით ახერხებენ.

რა სისტემით უზრუნველყოფს უნივერსიტეტი საგამოცდო ტესტების დაცვას? – შეკითხვა ბათუმის სახელმწიფო უნივერსიტეტის ხარისხის უზრუნველყოფის სამსახურის უფროსს, ანზორ ბერიძეს დავუსვით. „ეს გამორიცხულია,“ – ირწმუნება იგი. ადმინისტრაციის წარმომადგენელი დარწმუნებულია, რომ თუკი ვინმე ტესტს ან სწორ პასუხებს გამოცდამდე ნახავს, ეს აუცილებლად გამჟღავნდება და „ამბავი არ დაიმალება“.

„პროფესორი სილაბუსის შესაბამისად ადგენს ტესტებს, რომელსაც თავად ტვირთავს გამოცდების ცენტრში, სადაც ტარდება ელექტრონული ტესტირება. ტესტთან გამოცდამდე შეხება მხოლოდ გამოცდების ცენტრის ხელმძღვანელს და ერთ ტექნიკურ თანამშრომელს აქვს. მათი პირდაპირი პასუხისმგებლობაა, არ გაამჟღავნონ ტესტის სწორი პასუხები წინასწარ. ელექტრონული სისტემა შესაძლოა გატეხოს ვინმემ, დღეს ტექნიკურად ყველაფერია შესაძლებელი, მაგრამ ასეთი შემთხვევა არ გვქონია,“ – გვითხრა ანზორ ბერიძემ.

რეაგირების რა ბერკეტი აქვს უნივერსიტეტის ადმინისტრაციას, თუკი აღმოჩნდება, რომ სტუდენტმა ტესტის სწორი პასუხები გამოცდამდე გაიგო? – „მარტივად შესაძლებელია ამის დადგენა – გავესაუბრებით და ვნახავთ, რეალურად რა იცის… არა, ეს არ იქნება გამოცდა, მაგრამ პროფესორმა ხომ წინასწარ იცის, ცოდნის რა დონე აქვს დაახლოებით სტუდენტს, გავესაუბრებით ჯგუფს და დავადგენთ. ასე ზუსტად ახლა ვერ გეტყვით, როგორი იქნება ჩვენი რეაგირება, კონკრეტულ სიტუაციაში კონკრეტული გადაწყვეტილება იქნება მიღებული,“ – ამბობს ანზორ ბერიძე.

მთავარი ფოტო: „ბათუმელების“ არქივი

გადაბეჭდვის წესი


ასევე: