მესაკუთრე ყოფილი ეროვნული ბანკის შენობაზე დაშენებას გეგმავს

ბათუმში, მემედ აბაშიძისა და გამსახურდიას ქუჩების გადაკვეთაზე მდებარე კულტურული მემკვიდრეობის ძეგლზე, ეროვნული ბანკის ყოფილ შენობაზე, მესაკუთრეს ერთი სართულის დაშენება სურს. შესაბამისი პროექტით აჭარის კულტურული მემკვიდრეობის სააგენტოს მესაკუთრემ, შპს „სტარ კაპიტალმა“ უკვე მიმართა. სააგენტო პროექტის განხილვას კულტურული საბჭოს სხდომაზე დღეს, 15 მარტს, გეგმავს.

ყოფილი ეროვნული ბანკის შენობა ბათუმში აჭარის ფინანსთა და ეკონომიკის სამინისტრომ 9 მილიონ 200 ათას ლარად და პირობით 2017 წლის ნოემბერში გაყიდა. საპრივატიზებო პირობების მიხედვით, მყიდველმა 24 თვის ვადაში ამ შენობაში არანაკლებ ოცნომრიანი სასტუმრო, საზოგადოებრივი დანიშნულების ობიექტი უნდა გახსნას და არანაკლებ 12 მილიონი ლარის ინვესტიცია განახორციელოს;

ამ დროისთვის მფლობელი შენობის ინტერიერის დასუფთავებისა და სარემონტოდ მომზადების სამუშაოებს აწარმოებს. ჯერჯერობით კომპანიას სამუშაოების დაწყების ნებართვა არ აქვს.

ყოფილი ეროვნული ბანკის შენობის ინტერიერი

 

ბათუმი, მემედ აბაშიძის #25, კულტურული მემკვიდრეობის ძეგლი

კომპანიის მფლობელის, ზურა ნასყიდაშვილის ინფორმაციით, შენობის ინტერიერის პროექტს ბელგიელი დიზაინერი მოამზადებს. ბელგიურმა კომპანიამ მოამზადა დაშენების პროექტიც. ესკიზის მიხედვით, კომპანიას მანსარდის ტიპის სართულის დაშენება სურს ღია აივნით, სადაც მომავალში კაფეს განათავსებს.

ეროვნული ბანკის ყოფილი შენობა ბათუმში
ფოტო: ცაგო კახაბერიძე

ყოფილი ეროვნული ბანკის შენობა გასულ წელს კომპანია „სტარ კაპიტალმა“ შეიძინა. თავის მხრივ, ეს კომპანია 2015 წელს დააფუძნეს. მისი მფლობელი იგივე კომპანიაა, რომელსაც 2016 წელს აჭარის მთავრობამ მართვაში გადასცა ანბანის კოშკი. მაშინ კომპანიას „ბუსთ ჯორჯია ერქვა“. დაფუძნების ეტაპზე კომპანიის 67 პროცენტი ესპანეთის მოქალაქეს, ბარტოლომე სორელ სელმანკას ეკუთვნოდა, დარჩენილი 33 პროცენტი კი – ზურა ნასყიდაშვილს. რეესტრის მონაცემების მიხედვით, დღეს კომპანიის ასივე პროცენტის მფლობელი ზურა ნასყიდაშვილია. კომპანიამ სახელიც შეიცვალა.

ყოფილი ეროვნული ბანკის შენობა ბათუმში
ფოტო: ცაგო კახაბერიძე

ნეტგაზეთის მასალების სხვა გამოცემებში გადაბეჭდვის წესი


ავტორი