მთავარი,მთიანი აჭარა,სიახლეები

ქედაში მცხოვრები 30-მდე ოჯახი განსასახლებელია – გეოლოგიური დასკვნა

14.03.2018 • 2230
ქედაში მცხოვრები 30-მდე ოჯახი განსასახლებელია – გეოლოგიური დასკვნა

ქედის მუნიციპალიტეტში მცხოვრები სამი ოჯახი განსასახლებელია, ორი ოჯახი ქვათა ცვენის საფრთხის წინაშე იმყოფება, ექვსი ოჯახის საცხოვრებელი სახლი გამაგრებას საჭიროებს, ხოლო 22 საცხოვრებელ სახლთან ფერდსამაგრი კედელია მოსაწყობი – ეს დასკვნა გეოლოგებმა ქედის მუნიციპალიტეტის სხვადასხვა სოფელში მცხოვრებ ოჯახებთან დაკავშირებით ბოლო გეოლოგიური შესწავლის საფუძველზე დაწერეს.

გეოლოგიური დასკვნებით, განსახლებას სოფელ მეძიბნაში მცხოვრები გენადი დუმბაძის, კვაშტაში – შუქრი ბერიძისა და სოფელ აგარაში – თემურ ბერიძის ოჯახები ექვემდებარებიან.

ქედის მერიის ჯანდაცვის სამსახურის უფროსი, დავით თედორაძე განმარტავს, რომ ოჯახები, რომლებიც განსახლებას ექვემდებარებიან, სამინისტროს 25 000-ლარიან მიზნობრივ პროგრამაში ჩაერთვებიან. რაც შეეხება ქვათა ცვენას, თედორაძე აღნიშნავს, რომ ოჯახები, რომელთა საცხოვრებელ სახლთან, გეოლოგიური დასკვნებით, ქვათა ცვენა არის მოსალოდნელი, მერია ვითარების შესასწავლად სპეციალისტებს მოიწვევს და იმ შემთხვევაში, თუ საფრთხის შემცველი ქვების აფეთქება შესაძლებელია, აფეთქებით დაშლიან ან გაამაგრებენ.

„სახლის ადგილმონაცვლეობის, გამაგრებასა და დამცავი კედლების მოწყობასთან ერთად გეოლოგებმა 21 ოჯახს ჩამონადენი წყლის რეგულირების რეკომენდაცია მისცა,“ – ამბობს დავით თედორაძე.

დავით თედორაძის ინფორმაციით, მიმდინარე წელს ქედის მერიას მეწყერსაწინააღმდეგო ღონისძიებების გასატარებლად 351 000 ლარი აქვს გამოყოფილი, გეოლოგების მიერ რეკომენდებულ საცხოვრებელ სახლებთან ფერდსამაგრ სამუშაოებს კი, ეტაპობრივად განახორციელებენ. რაც შეეხება სახლების გამაგრებას, სამსახურის უფროსი ამბობს, რომ  თუ საცხოვრებელ სახლებზე დაზიანებები გეოლოგიური პროცესებით არის გამოწვეული და სახლის გამაგრება დიდ თანხას მოითხოვს, მერია ოჯახებს სახლების გასამაგრებლად ფინანსურად დაეხმარება.

„ბიუჯეტში მეწყერსაწინააღმდეგო  ღონისძიებებისთვის გამოყოფილი თანხა ფერდსამაგრი სამუშაოებისა და საწრეტი არხების მოწყობას გულისხმობს. ეტაპობრივად, საცხოვრებელ სახლებთან ფერდსამაგრი სამუშაოები განხორციელდება. რაც შეეხება სახლების გამაგრებას, თუ საცხოვრებელი სახლის გასამაგრებლად დიდი სამუშაოები იქნება ჩასატარებელი, საკითხს განსახილველად სამთავრობო სხდომაზე გავიტანთ, თუმცა, კონკრეტულად რა სამუშაოები არის ჩასატარებელი სახლების გასამაგრებლად, ეს მაშინ გახდება ცნობილი, როდესაც სპეციალისტები სახლების მდგომარეობას შეისწავლიან და შესაბამისი ხარჯთაღრიცხვა მომზადდება,“ – აცხადებს დავით თედორაძე.

დავით თედორაძის თქმით, ამ ეტაპზე ქედაში განსახლებას 30-მდე ოჯახი ექვემდებარება.  23 ოჯახს უკვე უშუამდგომლეს.

რაც შეეხება ქვათა ცვენას, მისივე თქმით, გასულ წელს, რეკომენდაციის შესაბამისად, მოხდა ქვების დაშლა.

გადაბეჭდვის წესი


ასევე: