ერთი წლის მძიმე ავადმყოფი ბავშვის დედის ღია წერილი „კრედო ბანკს“

2016 წელს მიკროსაფინანსო ორგანიზაცია „კრედოსგან“ სესხის სახით ავიღე 2000 ლარი. თანხა უნდა დამეფარა 2018 წლის 2 იანვრისთვის. ცხრა თვის განმავლობაში კეთილსინდისიერად ვასრულებდი ხელშეკრულებით ნაკისრ ვალდებულებას და ამ ხნის განმავლობაში გადახდილი მაქვს 1305,65 ლარი [ძირი თანხა]. გადასახდელი თანხა მთლიანად იყო – 3249 ლარი.

თანხის აღება პირადი ჯანმრთელობის მდგომარეობის გამო დამჭირდა – ფეხმძიმობის პერიოდში ვირუსი შემეყარა. სამწუხაროდ, ამის მიუხედავად, შემეძინა შვილი გამოხატული ნაკლოვანებით – მას მგლის ხახა აქვს და ასევე სხვადასხვა სახის დარღვევა. ახლა ჩემი შვილი ერთი წლის და 3 თვისაა.

ბავშვი საჭიროებს სპეციალურ კვებას, რაც ძალიან ძვირი ჯდება. იმის გამო, რომ ბავშვი, ფაქტობრივად, მშიერი მყავდა, მივმართე „გაზეთ ბათუმელების“ რედაქციას. მათ დაწერეს სტატია ჩემი შვილის მდგომარეობის შესახებ. სტატიის გამოქვეყნების შემდეგ, ქველმოქმედმა ბიზნესმენმა და კიდევ სხვებმა თანხა შემიგროვეს – სულ 600 ლარი.

გარდა ამისა, აჭარის ტელევიზიის ორგანიზებით გაიმართა საქველმოქმედო კონცერტი, რის შემდეგაც ტელევიზიის დირექტორმა, ნათია კაპანაძემ, შემოსავლებიდან 1190 ლარი ჩამირიცხა.

თანხის ნაწილი თბილისში ექიმთან ვიზიტის დროს დავხარჯე, ნაწილი ბავშვის საკვების შეძენას მოვახმარე. ამ ეტაპზეც ცალკეული ადამიანების მცირედი შემოწირულობებით ვახერხებ ბავშვისთვის საკვების შეძენას და მოუთმენლად ველოდები მარტის თვის დადგომას. სწორედ ამ თვიდან დამენიშნება სოციალური დახმარება – 160 ლარი და იმედი მაქვს, რომ ყოველდღიურად აღარ ვიცხოვრებ იმის შიშით, რომ ხვალ ჩემს შვილს საჭმელს ვეღარ ვუყიდი.

ჩემი და ჩემი შვილის მდგომარეობას ისიც ართულებს, რომ ჯანმრთელობის მძიმე მდგომარეობა აქვს ჩემს მეუღლეს. ის გარკვეული პერიოდი იმყოფებოდა საპატიმრო დაწესებულებაში და მის მიმართ განხორციელებული სხვადასხვა ძალადობის გამო, მას სჭირს ფსიქიკური აშლილობა. ჩემი მეუღლე ბოლოს ფსიქონევროლოგიურ დაწესებულებაში იწვა 2014 წელს.

ახლა ჩემი მეუღლე მძიმედ არის…

ახლახან ჩემი მეუღლის ახლობლებმა, რომლებიც „კრედოდან“ სესხის გამოტანის დროს თავდებში დაგვიდგენენ, აცნობეს, რომ თუ არ გადავიხდი დავალიანებას „კრედო“ მათგან თანხას სასამართლოს გზით ამოიღებს. ამ ოჯახებს თავი ძლივს გააქვთ, მაგრამ ჩვენი გულსაკლავი ყოფის გამო ვერ გვითხრეს უარი თავდებობაზე და ახლა ჩვენი წყალობით ისინიც შეიძლება აღმოჩნდნენ მძიმე მდგომარეობაში. ჩემი პირადი ტრაგედია, ახლა უკვე სხვისთვისაც უბედურების წყარო შეიძლება გახდეს.

ამ ყველაფრის გამო სხვა გამოსავალს ვეღარ ვხედავ და მოგმართავთ თხოვნით: იქნება მოახერხოთ და დავალიანება როგორმე ჩამომაწეროთ. უკიდურეს შემთხვევაში, იქნებ საპროცენტო თანხა ჩამომაწეროთ, ხოლო დარჩენილი ძირი თანხა გამიწეროთ გრაფიკით. პირობას გაძლევთ, შესაძლებლობის გაჩენისთანავე გადავიხდი დავალიანებას.

მე ჩემი მდგომარეობის გამო მივმართე ჟურნალისტებს. მათ ამიხსნეს, რომ შემეძლო მომემართა თქვენთვის, რადგან „მიკროსაფინანსო ორგანიზაცია კრედო“ საქართველოში თავდაპირველად ჩამოყალიბდა როგორც სოციალური პროექტი  და რომ მისი ძირითადი მიზანი სოციალურად მძიმე მდგომარეობაში მყოფი ადამიანების მხარდაჭერა იყო. ვიცი, ეს არ ნიშნავს იმას, რომ „კრედო“ ადამიანებს ფულს უნდა ჩუქნიდეს, მაგრამ გამონაკლისებს/რისკებს, ადამიანურ უბედურებებს ხომ ვერ გამოვრიცხავთ. თავდაპირველად მეც ხომ არ მეგონა, რომ ჩემი ცხოვრება ასე შემოტრიალდებოდა. იქნებ გადაწყვიტოთ, რომ ჩემი შემთხვევა განიხილოთ, როგორც თქვენი კომპანიის რისკი.

მე ამ წერილს სასოწარკვეთილი გწერთ. არ ვიცი რა გავაკეთო იმისათვის, რომ ჩემმა შვილმა წონაში მოიმატოს. ექიმები მეუბნებიან, რომ ის 12 კილოგრამს თუ არ მიაღწევს, ოპერაციას ვერ გაუკეთებენ, რადგან ვერ გადარჩება. ახლა ის მხოლოდ 7 კილოგრამს იწონის – არასათანადო კვების გამო ვერ ახერხებს ბავშვი წონაში მომატებას.

იქნებ, შეძლოთ და გულთან მიიტანოთ ჩემი მწარე რეალობა.

ის, რომ სიმართლეს გწერთ, დასტურდება იმ დოკუმენტებით, რასაც გიგზავნით.

შენიშვნა: მოქალაქემ ეს წერილი „კრედო ბანკს“ 2018 წლის 14 თებერვალს გაუგზავნა. დღეს მოქალაქეს სოციალურ ქსელში მოწერეს, რომ ამ წერილზე „30 დღის განმავლობაში მოხდება გამოხმაურება“. მოქალაქემ 6 მარტს იუსტიციის სამინისტროს აღსრულების ეროვნული ბიუროსგან მიიღო შეტყობინება წარმოების დაწყების შესახებ. მას აცნობეს, რომ განცხადების ჩაბარებიდან 10 დღეში დაიწყება აღსრულების პროცედურა.

ნეტგაზეთის მასალების სხვა გამოცემებში გადაბეჭდვის წესი


ავტორი
გაზეთი "ბათუმელები" გამოდის 2001 წლიდან.