განათლება,მთავარი,სიახლეები

71-80 წლის 2 501 მასწავლებლისთვის განსხვავებულ პენსიაზე სამინისტრო არ მსჯელობს

14.03.2018 • 6304
71-80 წლის 2 501 მასწავლებლისთვის განსხვავებულ პენსიაზე სამინისტრო არ მსჯელობს

საქართველოს განათლებისა და მეცნიერების სამინისტროში „ბათუმელებს“ უთხრეს, რომ მასწავლებელთა განსხვავებულ საპენსიო პოლიტიკაზე არ მუშაობენ.

ოფიციალური მონაცემებით, საქართველოს სკოლებში 80 წელს გადაცილებული 224 მასწავლებელი მუშაობს, 71-80 წლის ასაკის კი 2 501 მასწავლებელი.

„ბათუმელებში“ გამოქვეყნებული სტატიის შემდეგ, პენსიონერი პედაგოგები განსხვავებული პენსიის შესახებ თავიანთ მოსაზრებებს „ფეისბუქში“ გამოთქვამდნენ. მათი აზრით, აუცილებელია, რომ სახელმწიფომ პედაგოგები ღირსეული პენსიით უზრუნველყოს, ასეთ შემთხვევაში 70 წლის და მეტი ასაკის პედაგოგებს სკოლაში მუშაობა აღარ მოუწევთ.

„ბათუმელებმა“  პედაგოგების განსხვავებულ პენსიასთან დაკავშირებით განათლების სამინისტროს წერილობით 15 თებერვალს მიმართა.

კითხვაზე, ხომ არ აპირებს განათლების სამინისტრო შეიმუშავოს საქართველოს პარლამენტში საკანონმდებლო ინიციატივა პენსიონერი პედაგოგების განსხვავებული საპენსიო უზრუნველყოფის მიზნით? განათლების სამინისტროდან „ბათუმელებს“ მოსწერეს:

„ზოგადი განათლების შესახებ” საქართველოს კანონში ცვლილებების პროექტების თანახმად, მასწავლებლის საქმიანობის დაწყება და შეწყვეტა განხორციელდება საქართველოს განათლებისა და მეცნიერების სამინისტროს მიერ დამტკიცებული მასწავლებლის საქმიანობის დაწყებისა და შეწყვეტის წესის შესაბამისად.

აღნიშნული წესის შესამუშავებლად შეიქმნება სამუშაო ჯგუფი, რომელიც სამინისტროს, სსიპ – მასწავლებელთა პროფესიული განვითარების ეროვნული ცენტრის წარმომადგენლებითა და განათლების სპეციალისტებით, ასევე სკოლის მოქმედი დირექტორებით იქნება დაკომპლექტებული.

ასევე, სამინისტროს კომპეტენციის ფარგლებში გაცნობებთ, რომ გააგრძელებენ თუ არა საპენსიო ასაკის პედაგოგები საქმიანობას სკოლაში, ამ საკითხზე მსჯელობა არ მიმდინარეობს“.

განსხვავებული პენსიის პრაქტიკა საქართველოში არსებობს. ამით, ძირითადად, დეპუტატები, სამხედროები და პოლიციელები სარგებლობენ.

ამავე თემაზე: საჯარო სკოლებში 70-80 წლის 2 501 მასწავლებელი მუშაობს

გადაბეჭდვის წესი


ასევე: