მერიაში არ იციან, რა თანხა შევიდა ბიუჯეტში ტროტუარების მოღობვიდან [ფოტო]

კომპანიებსა თუ ფიზიკურ პირებს კანონი ავალდებულებს, დროებით სარგებლობაში აღებული ტროტუარის ყოველ 1 კვ/მ-ზე თვეში 1 ლარი გადაიხადონ. მშენებლობის დამცავი ღობეებით ბათუმში არაერთი ტროტუარი სანახევროდ ან მთლიანადაა გადაკეტილი. ეს უსახური ღობეები, ერთი მხრივ, აზიანებს ქალაქის იერსახეს, მეორე მხრივ კი, ფეხით მოსიარულეებს მანქანების ნაკადში აიძულებს მოძრაობას.

კანონი მოღობილი ტროტუარის მოსაკრებლის შესახებ თითქმის ერთი წელია ამოქმედდა, თუმცა ბათუმის მერიაში არ იციან, რა თანხა შედის ქალაქის ბიუჯეტში იმ გადასახადების სახით, რომელსაც საზოგადოებრივი ტერიტორიის/სივრცის დროებითი სარგებლობისთვის იხდიან. მერიისგან წერილობით მიღებული დოკუმენტებიდან შეუძლებელია იმის გარკვევაც, თუ ვის არ აქვს გადახდილი აღნიშნული გადასახადი.

„გეგზავნებათ საზოგადოებრივი ტერიტორიის/სივრცის დროებითი სარგებლობისათვის გადახდილი თანხების შესახებ ინფორმაცია. აქვე გაცნობებთ, რომ მოსარგებლეთა მიერ რიგი გადახდებისას არ არის მითითებული გადახდის დანიშნულება. შესაბამისად, ვერ მოხდა მათი სრული იდენტიფიცირება ზემოთ მოცემულ მოსაკრებლის სახეობაში“, – აღნიშნულია მერიისგან მიღებულ დოკუმენტებში.

ბათუმის მერიის ინფორმაციით, მიწის იჯარიდან და მართვაში [უზურფრუქტი, ქირავნობა და სხვა] გადაცემიდან მიღებულმა შემოსავალმა 2017 წელს 918 ათას 747 ლარი შეადგინა. აქედან, საზოგადოებრივი სივრცის დროებით სარგებლობის მოსაკრებელი [რისი იდენტიფიცირებაც მერიამ მოახერხა] არის 219 ათას 600 ლარი, დანარჩენი კი მიწის იჯარიდან და მართვაში გადაცემიდან მიღებული შემოსავალია.

მერიისგან გამოვითხოვეთ იმ იურიდიულ თუ ფიზიკურ პირთა ჩამონათვალიც, რომლებსაც საზოგადოებრივი ადგილების სარგებლობის თვითნებური შეზღუდვისთვის ან/და საკრებულოს მიერ დადგენილი პირობების დარღვევისთვის დაეკისრათ პასუხისმგებლობა ან ზიანის ანაზღაურება. ბათუმის მერიამ მხოლოდ ეს ინფორმაცია მოგვაწოდა:

„ადმინისტრაციული ზედამხედველობის განყოფილების თანამშრომლების მიერ 2017 წლის 27 მარტიდან დღემდე საზოგადოებრივი ადგილების სარგებლობის თვითნებურად შეზღუდვისათვის დაწერილია 208 ადმინისტრაციული სამართალდარღვევის ოქმი“.

ზედამხედველობის სამსახურში „ბათუმელებს“ განუმარტეს, რომ ეს ოქმები, ძირთადად, უნებართვო გარევაჭრობას [საფეხმავლო სავალი ნაწილის შეზღუდვებს] უკავშირდება და არა მხოლოდ მშენებლობის დამცავი ღობეებით შემოსაზღვრულ ტროტუარებს.

„საზოგადოებრივი ტერიტორიის/სივრცის დროებითი სარგებლობის წესი“, ახალი რედაქციით, ბათუმის საკრებულომ 2017 წელს დაამტკიცა და ის იმავე წლის 27 მარტიდან ამოქმედდა.

ამ წესის მიხედვით, საზოგადოებრივი ადგილების სარგებლობისთვის, ასევე საზოგადოებრივ სივრცეში სხვადასხვა ნივთის განთავსებისთვის, დაინტერესებულმა პირმა ბათუმის ბიუჯეტში უნდა გადაიხადოს გარკვეული საზღაური.

გადასახდელი საზღაური განსაზღვრულია შემდეგი ოდენობით:

[checklist]

1 გრძივი მეტრი სიგრძის ხაზობრივი ნაგებობის განთავსება – 1 ლარი;
საზოგადოებრივ ტერიტორიაზე/სივრცეში სამშენებლო [დამცავი, უსაფრთხოების] ღობის განთავსება – საზოგადოებრივი ადგილის სარგებლობის ყოველ შეზღუდულ 1კვ/მ-ზე თვეში 1 ლარი;
საზოგადოებრივ ტერიტორიაზე/სივრცეში სხვადასხვა ნივთის [მათ შორის, კიბის უჯრედის, აგრეგატის და სხვა მსგავსი ტიპის ნივთის/ნაგებობის] განთავსება – ერთი ერთეული ნივთი 1 000 ლარი.
გზაჯვარედინებზე არსებული მიწისქვეშა საკომუნიკაციო არხით სარგებლობა – 1 გრძივი მეტრი 83 ლარი.

[/checklist]

ამავე წესის მიხედვით, საზღაურს იხდიან ერთჯერადად, წინასწარ, საზოგადოებრივი ადგილების სარგებლობის შეზღუდვის, საზოგადოებრივ ტერიტორიაზე/სივრცეში სხვადასხვა ნივთის განთავსების ხელშეკრულების გაფორმებამდე, ანუ, თანხმობის/ნებართვის გაცემამდე.

დადგენილი საზღაურის გადახდისაგან თავისუფლდება სახელმწიფო, ავტონომიური რესპუბლიკის და მუნიციპალიტეტის ორგანოები, ასევე მათ მიერ დაფუძნებული [მათ დაქვემდებარებაში არსებული] ორგანიზაციები.

რაც შეეხება უსახურ ღობეებს, ბათუმის მერიაში ამბობენ, რომ ბოლო ერთი წელია სამშენებლო ღობის კონსტრუქცია და ზომები შეტანილია ძირითად პროექტში და ამ პროექტის მიხედვით იხილავენ ღობის საკითხსაც.

„ქალაქში ზოგიერთ ადგილზე უკვე გამოსწორდა მდგომარეობა ამ კუთხით, ესთეტიკურ სილამაზესაც აძლევენ უკვე. ძველ ღობეებს კი ვერაფერი მოვუხერხეთ – იწერება ოქმები და იგზავნება სასამართლოში. სასამართლო შემდეგ ან აჯარიმებს, ან არა. ჯარიმაც დაბალია, სადღაც 50 ლარამდე. ვცდილობთ გამოვასწოროთ მდგომარეობა უსახური ღობეების მხრივ… ბევრი მშენებელი ასწორებს კიდეც, ნელ-ნელა უკვე კულტურა შეეცვალათ“, – აცხადებენ ბათუმის მერიაში.

[red_box]ფოტორეპორტაჟი ბათუმის ქუჩებიდან[/red_box]