ბათუმის ბულვარში ფეხით მოსიარულეთა ბილიკის [პრომინადის] დაზიანებული ადგილების რეაბილიტაცია მიმდინარეობს. „ბათუმის ბულვარში“ აცხადებენ, რომ მთლიანი პრომინადის შეცვლა ბევრ თანხასთან არის დაკავშირებული და შეცვლის აუცილებლობა არ არის, ამიტომ დაზიანებულ ადგილებს ამოჭრიან და მის ადგილზე რკინაბეტონის ახალ საფარს მოაწყობენ.
პლაჟის გასწვრივ, პრომინადზე დაწყებული სამუშაოები პირველ მაისამდე უნდა დასრულდეს. სამუშაოების მწარმოებელ კომპანიასთან ხელშეკრულება ბულვარის ადმინისტრაციას 148 ათას 895 ლარზე აქვს გაფორმებული.
ახალ ბულვარში პრომინადს ხშირად აზიანებს ზღვის შტორმი. აქვს თუ არა ბულვარის ადმინისტრაციას სპეციალისტების დასკვნა იმ ადგილებთან დაკავშირებით, რომლებიც, ფაქტობრივად, სტიქიის ზონაა და კაპიტალური სამშენებლო სამუშაოები მიმდინარეობს? – ბულვარში აცხადებენ, რომ „პრომინადს, მართალია, შტორმიც აზიანებს, თუმცა ზოგი ნაწილი ისედაც იყო ამორტიზებული“.
909 ათას 9 ლარს დახარჯავს ბულვარი არდაგანის ტბიდან აკვაპარკამდე და კობალაძის ქუჩის მიმდებარე ტერიტორიების [ალეების] კეთილმოწყობის სამუშაოებში. ბულვარის ადმინისტრაციაში ამბობენ, რომ აქ გაკეთდება პლაჟზე გასასვლელები, დაიგება დეკორატიული ფილები, შემდეგ კი ამ ტერიტორიაზე დაემატება სკამები. ეს სამუშაოები მიმდინარე წლის 7 ივნისამდე უნდა დასრულდეს.
ახალ ბულვარში არსებული დეკორატიული არხებისა და შადრევნების კაპიტალური სარემონტო სამუშაოებისთვის გამოცხადებულ ტენდერში გამარჯვებული ბულვარის ადმინისტრაციას ჯერ არ გამოუვლენია. ამ სამუშაოების შესყიდვის სატენდერო თანხა 155 ათას 894 ლარია.
ასევე, შერჩევა-შეფასების ეტაპზეა ტენდერი, რომელიც ახალ ბულვარში ფილების, ბორდიურებისა და წვიმამიმღები ჭების კაპიტალურ რემონტს ითვალისწინებს. ამისთვის ბულვარს 2 მილიონ 83 ათას 556 ლარი აქვს გამოყოფილი. სამუშაოები ორ ეტაპად უნდა ჩატარდეს. პირველი ეტაპი – ხელშეკრულების გაფორმებიდან 75 დღის განმავლობაში – ამფითეატრის მოედნიდან მეჯინისწყლის ხიდამდე; მეორე ეტაპი – 2018 წლის პირველი ოქტომბრიდან 45 დღის განმავლობაში – მეჯინისწყლის ხიდიდან კაჩინსკის ქუჩის მოსახვევამდე [ახალი ბულვარის დასაწყისი].
303 ათას 507 ლარი კი ბულვარში ფეხით მოსიარულეთა ბილიკის გასწვრივ პალმის მინათების (ტერა) და გარე განათების ორფთიან ბოძებზე ელექტროკაბელების შეცვლისა და დამიწებების აღდგენის სამუშაოებისთვისაა გამოყოფილი.
პრომინადი ბათუმის ახალ ბულვარში / 14.03.2018 / გურამ მურვანიძის ფოტოები
