„უკვე დაგეგმილი მქონდა სხვა შეხვედრა“ – ბათუმის მერი საკრებულოს ოპოზიციას არ შეხვდა

ბათუმის მერი, ლაშა კომახიძე, საკრებულოს ფრაქცია „ერთიანი ნაციონალური მოძრაობის“ სხდომაზე არ მივიდა. სხომის დაწყებამდე რამდენიმე წუთით ადრე ლაშა კომახიძემ მერიის შენობა დატოვა.

„მოვიდა წერილი თხოვნით შეხვედრაზე, თუმცა წერილი მოვიდა დაგვიანებით, უკვე დაგეგმილი იყო სხვა ღონისძიებები. მე მათ მივმართე წერილით, რომ აუცილებლად შევხდები და შევთავაზე, რომ გადავიტანოთ შეხვედრა ამ თვის ბოლოს. ასევე, თუ რაიმე შეკითხვა აქვთ, შემიძლია წერილობითი სახით გავუგზავნო პასუხი,“ – უთხრა ბათუმის მერმა ჟურნალისტებს.

ფრაქციამ – „ერთიანი ნაციონალური მოძრაობა“ ბათუმის მერს შეხვედრის თაობაზე წერილი 7 მარტს გაუგზავნა. „ეს ნიშნავს იმას, რომ ბათუმის მერი გაურბის პასუხისგებლობას,“ – აცხადებს ფრაქციის თავმჯდომარე, მირდატ ქამადაძე.

ფრაქციაში რამდენიმე თემას ასახელებენ, რომლის ირგვლივაც ოპოზიციას სურდა მერისთვის შეკითხვების დასმა. მშენებლობები, რეორგანიზაცია ბათუმის მერიაში, უფასო სასადილოები, საბავშვო ბაღების აღმზრდელების ხელფასი…

„ფრაქციას აქვს კითხვები, მათ შორის, რუსეთში, პეტროზავოდსკში მერიის ანსამბლის გასტროლთან დაკავშირებით. ლაშა კომახიძე თავდაპირველად ამ ინფორმაციას უარყოფდა, მაგრამ აღმოჩნდა, რომ მერიის კონკრეტული თანამშრომლები ვიზებს ელოდებოდნენ რუსეთიდან. მე მინდა ვკითხო მერს: როგორ აღმოჩნდა ისე, რომ მსგავსი გასტროლი მზადდებოდა ისე, რომ მერმა არაფერი იცოდა?“ – კითხულობს მირდატ ქამადაძე.

ფრაქცია „ერთიანი ნაციონალური მოძრაობა“ ბათუმის საკრებულოში / 14.03.2018

ნეტგაზეთის მასალების სხვა გამოცემებში გადაბეჭდვის წესი


ავტორი