უცხოეთის მოქალაქეს ქალის ცემისთვის ასამართლებენ

„თავს დამნაშავედ ვცნობ, ვცემე,“ – მიმართა მოსამართლე ლევან გელოვანს ბრალდებულმა გულშა ს.-მ. პროკურატურის ვერსიით, მან ბათუმის ერთ-ერთ ღამის კლუბში გოგოს სცემა. მას ძალადობის მუხლით ედავებიან. მოსამართლის კითხვაზე, სად მუშაობთ? ბრალდებულმა თქვა, რომ ბათუმში არსად მუშაობს, თურქმენეთიდანაა და ტურისტია.

გულშა ს. მეორე წელია, რაც საქართველოში ცხოვრობს. ის ცემისთვის ერთხელ უკვე გაასამართლეს და ჯარიმაც გადაიხადა. ბოლო შემთხვევის შემდეგ სასამართლომ ბრალდებული 1500 ლარის გირაოს სანაცვლოდ გაათავისუფლა.

„მიმდინარეობს თუ არა მოლაპარაკება საპროცესო შეთანხმებაზე?“ – იკითხა მოსამართლემ. მას პროკურორმა, შოთა ქემაშვილმა, უთხრა, რომ მოლაპარაკების სურვილი ჰქონდა, მაგრამ ბრალდებულთან დაკავშირება ვერ მოახერხა. „მუდმივი საცხოვრებელი ადგილი არ აქვს, ტელეფონზე არ პასუხობდა,“ – დასძინა პროკურორმა.

მტკიცებულებები, რაც პროკურატურამ წინასასამართლო სხდომაზე წარმოადგინა, ბრალდებულმა უდავოდ მიიჩნია. დაცვის მხარეს ამ საქმეში რაიმე სახის მტკიცებულება არ აქვს.

ძალადობა გულისხმობს ცემას ან სხვაგვარ ძალადობას, რამაც დაზარალებულის ფიზიკური ტკივილი გამოიწვია. ეს მუხლი სასჯელის სახით ითვალისწინებს ჯარიმას, საზოგადოებისთვის სასარგებლო შრომას 120-დან 180 საათამდე, ან ერთ წლამდე თავისუფლების აღკვეთას.

ნეტგაზეთის მასალების სხვა გამოცემებში გადაბეჭდვის წესი


ავტორი