ტრენინგებში მონაწილეობის მისაღებად TI არასამთავრობოებისგან განაცხადებს იღებს

„საერთაშორისო გამჭვირვალობა – საქართველო“ სამეგრელო-ზემო სვანეთში, იმერეთსა და აჭარაში არასამთავრობო ორგანიზაციებისთვის ტრენინგების ციკლში მონაწილეობის მისაღებად იწყებს დოკუმენტების მიღებას. ტრენინგები ნორვეგიის საგარეო საქმეთა სამინისტროს მხარდაჭერით ჩატარდება.

ტრენინგების ციკლის მიზანია არასამთავრობო ორგანიზაციებს, მოქალაქეთა საინიციატივო ჯგუფებს, ასოციაციებს და გაერთიანებებს მიეცეთ საშუალება უკეთ დაგეგმონ საკუთარი საქმიანობა საზოგადოებრივი სიკეთეების უზრუნველსაყოფად, ადგილობრივი, ავტონომიური და ცენტრალური ხელისუფლების ანგარიშვალდებულებისა და გამჭვირვალობის ხარისხის ასამაღლებლად.

ტრენინგები მოიცავს მონაცემთა ბაზებში მუშაობის უნარების, სამოქალაქო აქტივიზმისა და ადვოკატირების, ადგილობრივ და საერთაშორისო დონორ ორგანიზაციებთან ურთიერთობის სწავლებას და ანტიდასავლური პროპაგანდის წინააღმდეგ ბრძოლის მეთოდების გაზიარებას.

ტრენინგების ციკლის ფარგლებში გათვალისწინებულია 4-4 ტრენინგის ჩატარება 2018 წლის განმავლობაში ქუთაისში, ზუგდიდსა და ბათუმში. პროექტით გათვალისწინებულია სხვა მუნიციპალიტეტებში მოქმედი ორგანიზაციების თანამშრომელთა და მოხალისეთა ტრანსპორტირების ხარჯის დაფარვა. თითო ორგანიზაციიდან ტრენინგზე დასწრების საშუალება მაქსიმუმ 3 წარმომადგენელს ექნება.

ტრენინგების ჩატარების პარალელურად, „საერთაშორისო გამჭვირვალობა – საქართველო“ თითოეულ ორგანიზაციასთან გააფორმებს თანამშრომლობის მემორანდუმს.

განაცხადის წარდგენის პროცესი:

დაინტერესებულმა ორგანიზაციამ ელექტრონულ მისამართზე:  jobs@transparency.ge უნდა გააგზავნოს შემდეგი დოკუმენტები ქართულ ან ინგლისურ ენაზე:

  • სამეწარმეო რეესტრში ორგანიზაციის რეგისტრაციის უახლესი ამონაწერი;
  • ორგანიზაციის მიერ განხორციელებული აქტივობების მოკლე ჩამონათვალი (მაქსიმუმ 500 სიტყვა);
  • დონორი ორგანიზაციების ჩამონათვალი, რომელთა ფინანსური მხარდაჭერით, ორგანიზაციამ სხვადასხვა დროს ჩაატარა აქტივობები (განიხილება ისეთი ორგანიზაციების განაცხადებიც, რომელთაც ამ დრომდე არ ჰქონიათ დონორი ორგანიზაციების მიერ მხარდაჭერილი პროექტები).

ასევე, დოკუმენტების მიღება შესაძლებელია ორგანიზაციის ცენტრალურ და რეგიონულ ოფისებში 10:00-18:00 საათამდე (ორშაბათიდან-პარასკევის ჩათვლით), შემდეგ მისამართებზე:

  • თბილისი, აღმაშენებლის გამზ. 61, 0102, ტელ:+ 995 322 92 14 03
  • ქუთაისი, თამარ მეფის ქ. 21, 4600, ტელ: +995 0431 25 45 31
  • ბათუმი, ფარნავაზ მეფის ქ. 74, 6010, ტელ:+995 0422 29 44 88
  • ზუგდიდი, ცოტნე დადიანის ქ. 2, 2100, ტელ: +995 0415 22 37 20

განაცხადის სახელწოდებაში უნდა მიუთითოთ „ტრენინგებში მონაწილეობა“.

განაცხადის წარმოდგენის ბოლო ვადაა 2018 წლის 11 მარტი.

არასრულად წარმოდგენილი განაცხადი არ განიხილება.

ქალაქ ბათუმში ტრენინგი გაიმართება 2018 წლის 22 მარტს.

 

„საერთაშორისო გამჭვირვალობა – საქართველო“ საერთაშორისო გამჭვირვალობის გლობალური  ანტიკორუფციული მოძრაობის ეროვნული ბიუროა საქართველოში. „საერთაშორისო გამჭვირვალობა – საქართველოს“ საქმიანობის მიზანია საჯარო ინსტიტუტების განვითარების, კარგი მმართველობისა  და კანონის უზენაესობის დამკვიდრების ხელშეწყობა, მთავრობის გამჭვირვალობისა და ანგარიშვალდებულების უზრუნველყოფა, სამართლიანი და დემოკრატიული არჩევნების მხარდაჭერა და საყოველთაოდ აღიარებული ადამიანის უფლებების დაცვა. ჩვენი საქმიანობისა და პროექტების შესახებ დამატებითი ინფორმაციისათვის ეწვიეთ ვებ გვერდს http://transparency.ge
ნეტგაზეთის მასალების სხვა გამოცემებში გადაბეჭდვის წესი


ავტორი