ექვსი ექიმი ჯანდაცვის მინისტრის ბრძანებას საკონსტიტუციო სასამართლოში ასაჩივრებს

ექვსი ექიმი საკონსტიტუციო სასამართლოში ჯანმრთელობისა და სოციალური დაცვის მინისტრის ბრძანებას ასაჩივრებს. დავის საგანი ჯანდაცვის მინისტრის, დავით სერგეენკოს მიერ ხელმოწერილი 2017 წლის 28 ივნისის ბრძანებაა, რომელიც დამატებით სწავლის ვალდებულებას უდგენს ექიმს, ვინც რეზიდენტურა ან ორდინატურა უცხოეთში დაამთავრა, მაგრამ ამისთვის იმაზე უფრო მცირე დრო დახარჯა, ვიდრე საქართველოში დასჭირდებოდა.

„სამინისტრო ბოროტად იყენებს შესაძლებლობას და ნორმის მოქმედებას ავრცელებს იმ პირებზეც, რომლებმაც ლეგიტიმური მოლოდინის არსებობის გამო [ვინაიდან 26 წლის განმავლობაში, მთელი დამოუკიდებლობის პერიოდის მანძილზე, მსგავსი რეზიდენტურის შედეგები უპრობლემოდ იყო აღიარებული], უკვე გაიარა რეზიდენტურა სხვა სახელმწიფოებში, ან ჩააბარა ასეთ პროგრამაში ამ ბრძანების ამოქმედებამდე,“ – ნათქვამია კონსტიტუციურ სარჩელში.

საექიმო საქმიანობისთვის სავალდებულოა სასერტიფიკატო გამოცდის ჩაბარება. ამ გამოცდამდე ექიმმა საექიმო სპეციალობის მოწმობა უნდა მოიპოვოს კანონმდებლობით დადგენილი წესით. მოსარჩელეები აღნიშნავენ, რომ მათ უსამართლოდ მოუწევთ ათასობით ლარის დახარჯვა და დამატებით რამდენიმე წლით სწავლა.

„იმ შემთხვევაში, როცა უცხოეთში მიღებული დიპლომისშემდგომი განათლების (პროფესიული მზადების) ხანგრძლივობა ნაკლებია საქართველოში მოქმედ შესაბამისი საექიმო სპეციალობის სარეზიდენტო პროგრამის ხანგრძლივობაზე და/ან პირს უცხოეთში დიპლომისშემდგომი განათლება (პროფესიული მზადება) მიღებული აქვს კლინიკური ასპირანტურის ან კლინიკური ორდინატურის ფორმატში, სახელმწიფო სასერტიფიკაციო გამოცდაზე დაშვების მიზნით, ამ მუხლის პირველი პუნქტით დადგენილი ვალდებულების გარდა, ასევე, აუცილებელია, საექიმო სპეციალობის მაძიებლის მოწმობის ფლობა, მოქმედი კანონმდებლობით განსაზღვრული წესის მიხედვით,“ – წერია ჯანმრთელობის დაცვის მინისტრის ბრძანებაში. ბრძანების ამ ნაწილის არაკონსტიტუციურად მიჩნევას ითხოვენ ექიმები.

„საქართველოს შრომის, ჯანმრთელობისა და სოციალური დაცვის მინისტრის ბრძანებით, თვითნებურად ხდება არათანაბარი პირობების შექმნა და უთანასწორო სამართლებრივი რეჟიმის ჩამოყალიბება,“ – აღნიშნავენ მოსარჩელეები.

საკონსტიტუციო სასამართლოს სარჩელის დასაშვებობის საკითხი ჯერ არ განუხილავს.

 

ნეტგაზეთის მასალების სხვა გამოცემებში გადაბეჭდვის წესი


ავტორი