ინიციატივა ბაღის მასწავლებლების ხელფასების მომატებაზე საკრებულომ არ განიხილა

დღეს, 27 თებერვალს, ბათუმის საკრებულოს რიგგარეშე სხდომაზე „ერთიანი ნაციონალური მოძრაობის“ ინიციატივას, რომელიც საბავშვო ბაღების მასწავლებლებისთვის ხელფასის მინიმუმ 100 ლარით გაზრდას შეეხებოდა, საკრებულოს უმრავლესობამ მხარი არ დაუჭირა.

საკრებულოს თავმჯდარის, სულიკო თებიძის თქმით, საბავშვო ბაღის თანამშრომლების ხელფასები გაზრდილია. „ამ თვეში აიღეს 80 ლარით გაზრდილი ხელფასი და ვიცი მერის პოზიცია, რომ კიდევ გაიზრდება,“ – განაცხადა სულიკო თებიძემ.

ენმ-ეს წევრების განცხადებით კი, საბავშვო ბაღების თანამშრომლებს ხელფასი არ გაზრდიათ. უბრალოდ, საკანონმდებლო ცვლილების შესაბამისად, მოხდა პრემიის, დანამატისა და ხელფასის გაერთიანება.

„თქვენ რაც განაცხადეთ, ეს არ შეესაბამება სინამდვილეს. მათი სახელფასო ფონდიდან მოხდა თანხის გადმოტანა და არა ზრდა. კეთილი ინებეთ და მხარი დაუჭირეთ ამ ადამიანების ხელფასების ზრდას და არა მათი პრემიებიდან და მე-13 ხელფასიდან გადაანაწილოთ თანხა,“ – განაცხდა ლევან ანთაძემ.

„თქვენ გულმოდგინეთ ამტკიცებდით, რომ ჩვენი ხელფასები კი არ იზრდება, ამას ისედაც ვიღებდით, უბრალოდ გაერთიანება ხდება პრემიის და ხელფასისო, ბაღის თანამშრომლების შემთხვევაში კი რატომ ითვლება ეს ხელფასის ზრდად?“- ჰკითხეს საკრებულოს თავმჯდომარეს ენმ-ს წევრებმა.

ენმ-ს წევრებმა საკრებულოს სხდომა პროტესტის ნიშნად დატოვეს.

 

 

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com